05/06/2026
فوطو عجبتني برك حطيتها مهيش موضوعي
موضوع تعي جماعة لباك ولخاوتهم باك ولا ولادهم كملو قراو منشور فلخر كاين نصائح ملاح🫡
نوضي درك وجدي لولدك ولا خوك ولا لروحك هذو لحوايج لحنقلك عليهم
- الاستدعاء
-بطاقة التعريف (أو رخصة قيادة أو جواز السفر)
هذو تحطهم فلمقلمة مع لادوات باش متنساهمش فلفترة لمسائية اونكا تبدل حوايجك ومتنساش فوتوكوبي عليهم فزوز
- مقلمة فاها أدواتك المدرسية
- آلة حاسبة علمية من الأفضل casio ولا. Kajib
- ستيلوات زرق وكحل دي زوز علقل
- قلم تصحيح ايفاصور تستخدمو غير شوية متكثروش
- ممحاة نوعية جيدة
- قلم رصاص
- مبراة
- أقلام التلوين
- مسطرة 20 سم فيريفي تدريجات تيعها لازم واضحة
- كوس ومنقلة ومدور و graveuse
حط قرعة ماء صغيرة وحبات تمر ان وجد
اهم حاجة نوصي علاها نصف ساعة قبل توزيع لاوراق لتقعدو فاها فلقسم
الافضل تريح وحدك وتكنترولي روحك وتتفكر وش قريت وتروبوزي ومتريحش مع ناس باسكو حتتلفلك سواء من معلومات يهدروهم نت متعرفهمش وميهموش ولا من ستراس ونشر سلبية لحتلقاه لذا الاحسن تريح وحدك
نقطة اخرى مهمة نوصي علاها كي تطيح فموقف معرفتيش تجاوب على سؤال حط راسك عطابلة وتنفس مليح ومبعد رجع قرا سؤال برزانة نورمال دي شوي وقت باش متغلطش وتفضلك تعاود وتضيع وقت اكثر
⚠️اختيار الموضوع :
تقرا لموضوعين في زوز وتحكم قلم رصاص وكل موضوع تحط نقطة بحدا كل كستيون تقدر تجاوب علاها ولا عندك فكرة اولية ملاحة علاها
مبعد تحسب قداه من كستيون تقدرلها فكلا لموضوعين وتقارن وكي تخير سيبون طبق لوخر اكوتي
هذو برك نقاط مهمة باقي امور عادية كيما اي اماحان فات عليكم وربي يوفقكم كل
وشبيبة خلولهم دعوة فاجركم🫡❤️
fine
