لمسة جمال و شفاء

14/08/2026

سؤال للمتزوجات 👀😂

هل نتي من النوع لي تحكي لزوجك على كل حاجة تضرك؟
ولا من النوع لي ما تثقيش فالرجال وتحافظي على أسرارك؟ 😂🤭

أنا جوابي في أول تعليق 👇

وانتوما؟ 🌸

13/08/2026

🔴 بكل صراحة هل تأذيت من أحد لدرجة انك دعيت عليه في صلاتك ؟ٰ

12/08/2026

🌸 حبيباتي حبيت نعلمكم حاجة ❤️
بما أنو كنت رايحة نبدل السكن ونغيب عليكم الأسبوع الماضي، ومتيسرتليش هاذ المرة 😅
قررت نستغل هاذ الأيام ونخدم آخر مواعيد الحجامة وعلاج الخلعة قبل ما نغيب عليكم أسبوع إن شاء الله 🌿🤍
يعني لي كانت حابة تدير جلسة، ما تخليش الوقت يفوتها 🥰
📌 المواعيد محدودة هاذ الأيام
وبإذن الله كي نكمل أموري ونستقر في السكن الجديد، نرجع نخدم عادي ❤️
📞 للحجز: 0664136449
📩 أو راسليني فالخاص
شكون كانت تستنى باش تحجز؟ 👀❤️


#الحجامة

10/08/2026

@أبرز المعجبين

09/08/2026

هذا المنشور ماشي كيما أي منشور… ❤️
هذا المنشور من أعماق قلبي، ورح يحسو بيا غير الناس لي عاشو نفس الإحساس…
شحال صعيب الإنسان يستنى حاجة كل شهر، ويقول: «ممكن الشهر هذا…»
وبعدها ما يلقاش…
ويجي الشهر الثاني بنفس الأمل، ونفس الانتظار… 💔
لي يعرفوني وقراب مني، يعرفو بلي عندي ثقة كبيرة في الله عزوجل، ونعلم مليح بلي كل شيء يكتبهولي ربي فيه خير، وعندي يقين بلي ربي رح يرزقني ولو بعد حين. 🤍
بصح مرات… الإنسان يضعف.
تخيلو إنسان يستنى الذرية كل شهر…
إذا تأخرت العادة يومين، نبدا نتخيل بلي يمكن هاذ المرة رح نولي أم…
نتخيل روحي حاملة روح صغيرة داخلي، ورح تكون عوض ليا على حرمان عشتو من الأهل، والإخوة، والأصدقاء، ومن بزاف حوايج تمنيت نعيشهم وما عشتهمش…
ونتخيل بلي رح نمد لطفلي كل الحنان والحب لي نقدر عليه، خاطر أنا كبرت وأنا نحس بنقص كبير في الحب والاهتمام من العائلة لي ربتني…
وكبر معايا هاذ الإحساس، وبقى داخلي فراغ كبير.
شحال حابة نكون أم صالحة… 🥺
شحال حابة نجهز حتى أنا ملابس الولادة، ونعيش ذاك الشعور تاع الخوف والفرحة في نفس الوقت…
حابة نشد طفلي بين يدي، ونحبه ونحميه ونهتم بيه، ونعطيه الأمان والحنان لي كنت نحتاجه أنا…
وعمري ما نأذيه ولا نخليه يحس بالوجع لي حسيت بيه أنا. 🤍
هاذ المنشور ما درتوش خاطرني ضعيفة، ولا باش نجيب التعاطف من الناس.
مجرد إحساس حبيت نوصلو…
وفي نفس الوقت، حبيت الناس لي يحبوني يدعولي من قلوبهم. 🤲🏻
ومن فضلكم، هادوك لي رح يقولولي على وصفات وخلطات وأطباء…
ربي يبارك فيكم ويجزيكم كل خير ❤️
بصح كل إنسان يعلم بحالو، وكل واحد عندو ظروفو وقصتو، والدعاء وحدو في هاذ اللحظة يكفيني. 🤍
ربي لا تذرني فردًا وأنت خير الوارثين. 🤲🏻❤️

09/08/2026

السلام عليكم ورحمة الله وبركاته يا ملكات 👑

​في المنشور السابق حكينا على الجرح وعرفنا وين راهو يروح وقتنا... اليوم جيتكم بالدواء والحلول العملية لي رايحة ترجعلك هيبتك، وراحة بالك.
​شوفي هو التغيير ما يجيش في نهار، بصح يبدأ بـ خطوة واحدة ونيّة صادقة. هاكي الخطة الذهبية:

​1⃣ إحياء بركة البكور :

​السر هو نوم الليل: باش تنوضي بكري، لازم ترقدي بكري! نحي الشاشات قبل النوم ولو بساعة.
​نوضي مع صلاة الفجر: صلي صلاتك افتحي تواقي باش تضربك نسمة الهواء وريحة القهوة والناس كامل راقدة... هاديك هي "ساعة البركة" لي تقضي فيها نص شغلك بلا تعب.

​2⃣ المصحف هو سر البركة (وردك اليومي):
​اجعلي عندك "ورد لا يتأخر"، مثلاً صفحتين بعد كل صلاة مفروضة، أو ديري ورد ليلي قبل النوم
​النتيجة؟ راح تلقاي روحك قريتي 10 صفحات في اليوم بلا ما تحسي، وربي يباركلك في صحتك ووقتك وشغلك.

​3⃣ التخطيط والعيش بذكاء (الروتين اليومي):
​ورقة وقلم كل نهاية اسبوع : اكتبي أمور أساسية حابة تديريهم
​قاعدة كل يوم نصف ساعة : ماشي لازم الدار تكون تعكس 100% كل يوم! ركزي على الأهم ثم المهم باش ما تعيايش.

​وقت لنفسك ولعائلتك: كي تنظمي وقتك، راح تلقاي وقت تقعدي فيه مع ولادك تقصروا، ووقت لزوجك، وأهم حاجة... وقت لروحك تديري فيه ماسك ولا تشربي قهوتك بسكون.

​4⃣ التحكم في الهاتف :
​كي نوضي الصباح ما تمسيش التيليفون حتى تكملي الشغل كافئي بيه روحك ، وقبل ما ترقدي بساعة حطيه بعيد عليك.
​
​نظفي عالمك الافتراضي: ديري إلغاء متابعة (Unfollow) لكل صفحة تضيعلك وقتك ولا تحسسك بالنقص وتأنيب الضمير.

​💡 النتيجة لي راح تشوفيها:
​🌸 راح يروح عليك هداك الشعور بالذنب والفشل.
​🌸 راح تحسي بروحك منظمة، مرتاحة، ومولاة بيتك بالصح.

🔴 ​تذكري دائماً: الوقت هو حياتك... وما تخلّيش حياتك تضيع في المشتتات لي نديرلكم عليها منشور وحدو باذن الله

​شاركي المنشور باش تعم الفائدة 💦

08/08/2026

السلام عليكم ورحمة الله وبركاته يا ملكات 👑

اليوم حبيت نهدرو في موضوع راهو واقع في بيوتنا وحياتنا، وڨاع رانا طايحين في هاد الفخ (إلا من رحم ربي). موضوع "مضيعة الوقت".

​شوفي يا ختي، الوقت هو الحاجة الوحيدة لي كي تروح ما توليش. وباش نكونو صريحات مع رواحنا، هاو ليك وين راهو يروح وقتنا:

​📱 سحر الهاتف والتقلاب بلا فايدة: نوضو الصباح، أول حاجة نديروها نرفدو التيليفون ندخلو للمواقع وإنستغرام نقولو "غير 5 دقائق ونحطو" نلقاو رواحنا جزنا ساعتين وثلاثة! تلقاينا نتبعوا في حياة الناس وناسيين حياتنا

​ النوم حتّى لنص النهار وعدم البكور: وين راحت البركة تاع زمان؟ "البركة في البكور" كي نوضو مع الظهر النهار نلقاوه خلاص نوضو عيانين.. مخلوعين.. وفشلانين... لا شغل يطلع ولا قراية تتسڨم.

​📖 هجر المصحف وقراءة القران: شحال من مرة جاز علينا نهار كامل ما فتحناش فيه كتاب الله؟ ما قريناش حتى صفحة؟ نلقاو الوقت للڨصرة والتيليفون، وما نلقاوش 10 دقائق لكلام الله لي هو نور لقبرنا ودنيتنا وبيه رب يباركلنافي وقتنا !

​📋 العيشة بعشوائية بلا جدول يومي ولا روتين: نوضو هكذاك برك، لي جات في الطريق نديروها بلا تخطيط بلا أهداف و في الأخير تاع النهار نلقاو رواحنا ما درنا والو

النتيجة ⭕️
▪️تولي تقولي راني نجري غير مور الشغل وماطلعش وعييت

▪️راني حاسة روحي غير نهنبر على العايلة واحد ماره حاس بيا

▪️تولي تحسي بالذنب والفشل وتأنيب الضمير مما يعكس على نفسيتك

▪️ماتلقايش وقت لا للأولادك ولا لنفسك ولا لزوجك

واش هو الحل ⁉️
الحل نقدمو باذن الله في المنشور التالي تبعيني ولا تنسي نشر القناة لتعم الفائدة

08/08/2026

🔥 برومو الأحد والاثنين فقط! 🔥

🌿علاج الخلعة بـ 100 ألف فقط ❤️
📅 لمدة يومين فقط

📌 الخدمة بالموعد فقط

📩 الحجز على الخاص

📞 0664136449

#الحجامة

08/08/2026

😂😂 قصة اليوم مع الحجامة:
جاتني وحدة قالتلي: «راني خايفة من الحجامة 😭 نخاف توجعني!»
قلتلها: «ما تخافيش حبيبتي، غير ريلاكس 😌»
قالتلي: «بصح إذا وجعتني؟ 😭»
قلتلها: «نصبر عليك 😂»
دارت الحجامة… كي كملنا قالتلي: «هااااا؟ هذا هو؟ 😳😂 أنا كنت حاسبة روحي داخلة لعملية جراحية 😂😂»
ومن نهارها ولات كل مرة تقولي: «وقتاه نعاود نجي؟ 😂❤️»
الخلاصة: أكبر حاجة تخوف في الحجامة هي الخوف منها قبل ما تجربيها 😂

درك قولولي بصراحة 👇😂 نتي من جماعة: «نخاف من الحجامة 😭» ولا من جماعة: «وين نجي نديرها؟ 😂😂»

#الحجامة #الجزائر #حجامة

08/08/2026