31/01/2025
جيت نحكي في موضوع حكيت فيه بزاف قبل بصح في الاعادة إفادة
❌️درت حصة تاع بلازما ماعطاتنيش نتيجة
❌️️درت حصة إبرة النضارة ماتبدل والو
❌️️درت حصة هيدرافيشل وجهي ضوا شوية ومبعد رجع هوهو
❌️درت تقشير كيميائي ماعطاني حتى نتيجة
❌️درت جلسة تاع فراكشنال لاثار حب الشباب ماراحوش
انا سمعتك .... جاء دورك باه تسمعيني :
✅️معظم اللي يقيسوني عندهم بشرة متعبة ، فيها بقع بنية ، تجاعيد رقيقة ، بشرة جافة او دهنية وفي كلا الحالتين déshydratée، يعني شايحة من داخل ، تقولك وجهي تاعب ونحسو مدخن ، اول سؤال تقولك وش لازمني وثاني سؤال شحال من حصة؟
‼️نسقسيها وش راكي تستعملي فالدار ؟ تقولك والو وفي احسن الحالات diadermine( مافهمتش علاه تموتو عليها🤔)
😚صديقتنا مولات البقع نلقاها مجربة اي حاجة يقولولها عليها واي حاجة تتحط فالوجه والنتيجة طبعا كارثية ، اااااه و صاحبتنا ماديرش écran solaire, وإلا دارتو ديرو من صباح للعشية
🤨صديقتنا مولات حب الشباب تلقاها كيف كيف تجرب اي حاجة يقولولها عليها وماكانش bouton ماخربتش فيه ، واكيد عمرها ما دارت تنظيف للبشرة ، حتى وتشربي الدوا اهم حاجة في علاج حب الشباب هو تنظيف البشرة العميق والروتين الصحيح فالدار
🤭نجيو لصديقتنا مولات البشرة الجافة لي ماتستعمل والو لوجهها البشرة تاعها مجوعتها مسكينة ماتشرب ماء ماتاكل خضر ، ماتدير كريم مرطب يعني rien de rien وتجي تقولي وجهي دار تجاعيد وانا صغيرة
🥱هذا كامل لي قلتو وكاين اكثر منو يخليني نقولك بلي حصة واحدة ماتكفيييييش ياصديقتي لازم حصص بزاااف ولازم عناية خاصة فالدار وكاين عوامل بززززاف يلعبو ضدك منهم طبيعة بشرتك ، عمرك، وطريقة عيشك ، وstress, الحمل ، الولادة ،......الخ
😇تنظيف الوجه ماشي مرة فالعام ولا عامين ، التقشير على الاقل مرتين فالسنة ، ابر النضارة على الاقل اربع مرات فالسنة ، البلازما على الاقل 6مرات فالسنة ..... وطبعا عمرك يلعب دور كبير في عدد الحصص والنتائج المتوقعة ودوامها
😪ماكانش حاجة دائمة لأنك ياصديقتي راكي تكبري والخلايا تاعك راهي تكبر وتعجز وتجديد الخلايا يولي طويييل والكولاجين ينقص ودهون الوجه تنقص والبشرة تترهل ، الجادبية الأرضية وراهي ضدك😅
الا بغيتي تبقاي صغيرة وبشرتك مشدودة لازم تمديلها حقها ماكانش نتائج دائمة من دون عناية ولي يقولك العكس يكدب عليك
نتمنى نكون واضحة وفهمتوني ، ...
منقولة ربي يبارك في يدين اللي كتبتها 🤩
