عيادة طه للطب العام Taha clinic

28/07/2026

01/07/2026

صباح الخيرات ..ان شاء الله تكونو بخير
نداء ل وحدة من متتبعات العيادة
كيحل رحمة
اتصلي بالعيادة لأمر ضروري جدا في اقرب وقت من فضلك

21/06/2026

سلام عليكم...يسعد مساءكم
حبيت نحكيلكم اليوم على سبب من أسباب نقصان الوزن المفاجئ😥 وهو سبب خفي كثيرا مايتأخر تشخيصه
حالة وحدة من متتبعاتنا صرالها نزول في الوزن على مدى أشهر وتعب وإسهال .😴..بعدما درنا الفحص كامل ..والايكوڨرافي كلش كان عادي ...وبعد التحاليل رجعت النتيجة كيما شكينا فيها نشاط مفرط في الغدة الدرقية هو سبب عملية الايض الزايد والحرق الكبير والتعب
🎉 والحمد لله بعد التشخيص والعلاج المناسب والسير على نظام غذائي صحي ...تحسنت كثيرا ورجعت نشاط الغدة قريب من الطبيعي...والحاجة لي فرحتها وفرحتنا معاها زادت 2كيلو ماشاء الله في ظرف اسبوعين .....ثم 6كيلو في ظرف شهر بعد المداومة على العلاج 🥰🥰

10/06/2026

🛑 هبلتنا عقلية السوبيرماركت والفاهم يفهم.. وعلاه رانا ضايعين في المتاهات؟ (اسمعني مليح يا المواطن الصالح والموهوب!)

🌹يا أخي العزيز، اليوم تحب نهدرو كاش كاش ولا اللي فالڨلب على اللسان؟.
عندنا في خنشلة وفي بلاد الشاوية كامل، حكمتنا واحد العقلية هبلتنا في الكوتي سانتي (Côté santé). تلقى الواحد فينا:

عندي السطر في عيني؟ نروح ديراكت لـ l'Ophtalmologue،
عندي ألم في راسي؟ ديراكت عند الـ Neurologue!
عندي السطر في كرشي ديراكت l'gastrologue
المريض يولي هو اللي يدير Diagnostic لروحو ويوجه مريضو للأطباء!

☕أقعد تشرب فنجان قهوة مخلط بالشيح بشوي عسل حر واسمعني مليح كيفاه رانا نضيعو في المتاهات، وعلاه الـ Médecin généraliste (الطبيب العام) هو الصح، وهو الـ Chef d'orchestre تاع الحكاية كامل وهو العرصة نتاع منظومة الصحة في جميع الدول الكبرى:

1️⃣ الرؤية الشمولية (La vision holistique): تلسكوب ضيق ضد نظرة رادار 360° 🛰️
شوف، الـ Spécialiste يخدم بـ Télescope ضيق بزاف (وهذا الدور نتاعو وما يتلامش بالعكس نحبوه يخدم خدمتو ويتقنها كما يجب).
طبيب الـ Gastro يشوف غير l'Estomac وأخواتها،
وطبيب الـ Rhumato يبانلو العالم كامل حابس في الـ Genou وأخواته،
وطبيب القلب Cardio عندو القلب وفقط،
وطبيب العينين كيف كيف ....الخ
أما الطبيب العام؟ لا لا يا الشيخ، هذاك هو الـ Radar 360°. هو الوحيد اللي يربط الخيوط ببعضها ويخدم بـ Raisonnement clinique يجمع فيه الشمل.

🔥 وعيش معايا الحالة:
تجيك مريضة تشكي من إحمرار في العين وآلام في مفاصل الحوض. لو كان تروح للمختصين مباشرة: تاع العين يعطيها قطرة ويمشي، وتاع المفاصل يعطيها مضاد التهاب، وتقعد المسكينة تدور في Cercle vicieux (حلقة مفرغة).

أما الطبيب العام المتمكن؟ يجمع الـ Faisceau d'arguments، ويربط الأعراض مع بعض ليصل إلى التشخيص المثالي والعلاج النافع بإذن الله
مثال: يربط العين بالمفاصل ويفيق بلي رانا أمام حالة نادرة SPA مثلا!

2️⃣ حائط الصد (Le Gatekeeper): حارس البوابة ضد التقرعيج الطبي! 🛡️
بلا طبيب عام، المريض يولي يدير في Nomadisme médical (يعني الترحال الطبي). يصرف ساشي دراهم على Bilan biologique ما عندو حتى معنى، ويدير Scanner و IRM من راسو جيست على جال توسوس برك.
✅الطبيب العام المتمكن، اللي عندو لي Compétences وعندو كل الإمكانيات، هو اللي يفك اللغز في خمس دقائق.
✅هو الـ Filtre: اللي يحميك من المصاريف الزايدة والـ Surdiagnostic.
✅هو الـ Aiguilleur: اللي يوجهك للتخصص الدقيق وبـ Lettre d'orientation واضحة ومستهدفة.

🚨 هدرة حق وباش نكونو واقعيين ومنطقيين، ما نقولش بلي كل الأطباء عندهم نفس المستوى، الدنيا هاذي فيها وعليها في كل الميادين. بصح الشاذ لا يقاس عليه!

الطبيب العام اللي واڨف على روحو، يقرا ويطور في لي كومبيطونس نتاعو، هو اللي نحكيو عليه وهو اللي يستاهل يكون حارس البوابة لصحتك. بلا بيه، تروح للمختص الخطأ، تضيع الوقت، والـ Pronostic (التطور الطبي) تاع المرض قادر يتعقد ويصعب العلاج نتاعو

3️⃣ رفيق العمر (Suivi au long cours): الوقاية خير من ألف أوردونونس📑
المختص يداوي الـ Organe (العضو) المصاب ويمشي. يبرالك العظم ولا السنة، يخلاص الدور نتاعو؛
✅بصح شكون اللي يقعد معاك طول العمر Bars؟ شكون اللي يدير الـ Gestion تاع الـ Polymédication (تداخل الأدوية) كي تعود تشرب دواء القلب مع دواء الغدة مع دواء المفاصل باش ما يديرولكش كوارث في الكلاوي؟
هو الطبيب العام! هو اللي يدير Prévention primaire (الوقاية الأولية)، هو اللي يضبط الـ Hygiène de vie، وهو اللي يفيق بالمرض في مرحلة الـ Dépistage précoce قبل ما يفوت الفوت.

📌 خلاصة القول:
الطب المختص يعالج المرض، أما الطب العام فيعالج المريض كإنسان.

بلا طبيب عام قوي ومتمكن، المنظومة الصحية نتاعنا تولي عبارة عن Des îles isolées (جزر معزولة)، والمريض مسكين يغرق في وسطهم بين ليزاناليز والـ RDVات البعيدة.
المرة الجاية كي تحس بـ "وخزة" ولا "دوار"، ما تروحش تلعبها بروفيسور في بلاصة البروفيسور. فوت على الـ Généraliste، خلي السيد يخدم بـ Démarche scientifique، ومن بعد يرحمها ربي!
🩺 د. بلال بعلي

إذا عجبك المنشور وحسيت بلي هاذ العقلية لازم تتغير في مجتمعنا خلي رأيك في التعليقات

09/06/2026

يسعد مساءكم متتبعين صفحتنا الكرام......
أود اعلامكم انو غدا صباحا ان شاء الله عندي مداخلة في حصة صحتنا بإذاعة الجلفة على الساعة العاشرة .حول موضوع 🍯🍯فقدان الشهية ونقصان الوزن 🍯🍯🍯كونوا في الاستماع فضلا 🥰🥰🥰🌹🌹🌹🌹🌹
وتصبحون على ألف خير🌹🌹

07/06/2026

الطب غيرنا كثيرا يا أمي ...
أصبحت أكره الزحام .. والأصوات المدوية ..
أصبحت أألف الجلوس بمفردي ..
وأحب الهدوء .....
أصبحت أبادر ب أنا آسفة .. مع أني لست آسفة .. ومع أني لدي مئات المبررات .. ولكن لم يعد لدي طاقة لسردها .. والدخول في امتحان هل بدا لهم ذاك مقنعا أم لا ...
النقاش والجدال وكثرة القيل والقال ..ترهقني كثيرا يا أمي ...
لقد كبرت يا أمي .. وأصبح أغلب ما يشغل الفتيات في عمري لا يشغلني ..
أصبحت أكره الميديا .. وكل شيء مزعج يشبهها ...
وأنتظر الاجازات لأجامل نفسي بالغرق في النوم ..
أصبحت لا أخاف الظلام يا أمي ..
ترين ذاك اليوم الذي عجزت فيه عن النوم لأني رأيت قطة ميته ...
لم أعد كذلك ... فأصبحت أقابل المرضى في الصباح.. ولا أجدهم في المساء .. ومع ذلك أعود الى منزلي وأنام ملئ عيني ...
لا أعلم .. ولكن مجالسة كتب الطب لفترات طويلة ..تجعل الكثير من أحاديث البشر ساذجة .. وتجعل شكواهم غير مقنعه ...
وربما لم أعد أتقبل سوى سذاجة الأطفال .. لأنها سذاجة صادقة .. ❤
أنا كبرت في هذا العام ربما 10 أعوام ..
أصابتنا الشيخوخه ونحن في ريعان شبابنا ..

أعاننا الله ❤️

01/06/2026

01/06/2026

عيد سعيد لكل أطفالنا....ربي يحفظهم ويكبرهم على طاعتو وشفاعتو ويجعلهم صالحين مصلحين يارب 🎈🎈🌹🌹