21/02/2026
🌙 صايمين.. بصح "الدوخة" و "الفشلة" مور الفطور علاه؟ 🤦🏻♀️
بصفتي طبيبة تغذية، بزاف يوصلوني شكاوي في رمضان: "يا دكتورة، غير ناكل نفشل، كرشي تتنفخ، ونحس روحي حابة غير نرقد !" 😴
الحقيقة المرة: المشكلة ماشي في الصيام، المشكلة في "صدمة" المعدة بعد 15 ساعة راحة. كي نهجموا على الطاولة مرة وحدة (شربة، بوراك، حلو، عصائر..)، الجسم يبعث قاع الدم للجهاز الهضمي، والسكر يطلع للسما ويعاود يهبط بسرعة.. والنتيجة؟ فشلة تامة.
✅ كيفاش تفطري "ذكاء" وتخلي جسمك خفيف؟
إليكِ خطة الطريق لإفطار صحي ومريح:
قاعدة الـ 10 دقائق: ابداي بـ (تمرة + كاس ماء دافئ أو لبن). صلي المغرب وخلي المعدة "تفيق" بلي الأكل راه جاي.
سيد المائدة (السلطة): ما تهمليهاش! الألياف هي اللي تفرني امتصاص السكريات وتخليكِ تحسي بالشبع بلا انتفاخ.
ترتيب الطبق: اقسمي طبسك (نصف خضر، ربع بروتين، وربع كربوهيدرات معقدة).
امضغي مليييييح: المعدة ما عندهاش سنان! المضغ الجيد هو نصف عملية الهضم.
اشربي بذكاء: الماء اشربيه بجرعات صغيرة بين الفطور والسحور، ماشي لتر كامل وقت الأكل.
نصيحة من القلب: رمضان فرصة باش نقيو أجسامنا، ماشي باش نرهقوها. خلي الماكلة تكون وقود لنشاطك وصلاتك، ماشي سبب في عجزك.
صيامكم صحي وبالصحة فطوركم! ✨
