د/اماني توفيق علام استشاري الأنف والأذن والحنجرة

17/07/2026

الطفل اللي بيتنفس من الفم بيتغير شكل الفك عنده وفتح الفم يؤدي إلى جفاف الفم وبالتالي روائح كريهة وتسوس الأسنان والاختناق المتكرر أثناء النوم وبالتالي نوم غير منتظم يؤدي لتشتت التركيز بالنهار والغفوات المتكررة اللي بتؤدي للتأخر الدراسي وأثناء الغفوات دي ممكن يحصل تبول لا ارادي للطفل

16/06/2026

15/05/2026

إيه اللي بيعرف الناموسة اننا نمنا وليه بتزن جمب ودننا ؟
الناموسة بتنجذب لريحة ثاني أكسيد الكربون المنبعث من الأنف واللي بيزيد تركيزه أثناء النوم والناموسة بتشمه هو وريحة العرق من علي بعد عشرات الأمتار
لما بتقرب الناموسة للإنسان بتبدأ تفحص المكان كويس علشان تشوف اكتر مكان مناسب لسحب الدم واللي بيكون بروتين مهم جداً للإناث في فترة وضع البيض
الأذن مكان مكشوف والجلد رقيق والأوعية الدموية ظاهرة وكمان ريحة شمع الأذن جاذب لانثي البعوض
طيب بتزن إزاي... لأ هي مش بتزن هو جناحها بيضرب ٥٠ مرة في الثانية الواحدة ودا اللي بيعمل الصوت القوي ده وغالباً دي بتبقي انثي
وعلي عكس الأفكار الموروثة إن الناموس ينجذب للضوء لأ الناموس بينشط في الظلام أكثر فالاضاءة طاردة للناموس هو بينجذب لحرارة اللمبة فقط
دا بوست بمناسبة زن الناموس اللي بيعلن دخول فصل الصيف

11/05/2026

🚨 إوعى تعمل كده لو كلب عضّك… حتى لو الناس حواليك بيقولوا كده بثقة.! ⚠️
90% من اللي بيتعضوا من كلب في مصر… بيعملوا نفس الغلطة أول 5 دقايق

في عز زحمة الكلام عن أزمة الكلاب في شوارعنا والجدال اللي مبيخلصش بين (المحبين والمعارضين) في فجوة وعي مرعبة ممكن تضيع حياتك في ثانية إحنا مش قدام مجرد جرح إحنا قدام سباق مع الزمن ضد فيروس (السعار) اللي لو تمكن من الجهاز العصبي بتبقى نسبة الوفاة 100%.. ملوش علاج في العالم كله 🛑

الخطورة مش في العضة بس الخطورة في سيستم الجدعنة"
الغلط اللي بنشوفه في الشارع من الناس اول ما تلاقي حد اتعض من كلب : 👇
🚫 أوهام الإنقاذ اللي بتسرّع الموت:
📍كتم الجرح بالبن : أول ما حد بيتصدم بمنظر الدم بعد العض .. تلاقي اللي بيجري ويقولك اكتم الجرح بسرعه بشوية بُن عشان النزيف يوقف
بس الحقيقة أن البُن بيعمل سدادات خشنة بتحبس لعاب الكلب الملوث بالفيروس جوه الأنسجة وبتحميه من الماية والمطهرات. إنت كدة بتخزن الفيروس جوه جسمك وبتديله الأمان عشان يوصل لأعصابك أسرع

📍 مشكلة الرباط الضاغط : بتشوف الناس بتربط فوق العضة بحزام أو قماشة جامد جداً فاكرين إن اللى دخل جسمهم سِم و بيمشي في الدم وعايزين يمنعوه يوصل للقلب بسرعة

بس الحقيقة أن فيروس السعار (Rabies) بيمشي في الأعصاب (زي سلك الكهرباء) مش في الدم. الربط ده مش هيوقفه ثانية واحدة لكنه هيقطع الدورة الدموية عن إيدك أو رجلك تماماً لحد ما تموت الخلايا وتعمل (غرغرينا) تضطرنا للبتر.. وإنت لسه في خطر السعار

📍جريمة خياطة الجرح: أحياناً الجرح بيكون واسع فالناس تجري على دكتور (مش متخصص) عشان يلم الجرح ويخيطه فوراً
و الحقيقة أن خياطة جرح عضة الكلب مُحرمة طبياً في البداية لأن الفيروس ده (لاهوائي) وخياطة الجرح يعني إنك بتقفل عليه الأوكسجين وبتوفر له البيئة المثالية عشان يتكاثر بجنون جوه جسمك

✅ تعالى بقي أقولك البروتوكول المنقذ (إزاي تدمر الفيروس قبل ما يدمرك) :
1️⃣ الصابون هو (السلاح السري): الناس بتستهون بالصابون وبتبحث عن مطهرات غالية لكن العلم بيقول إن فيروس السعار محاط بغلاف دهني الصابون هو المادة الوحيدة اللي بتعمل (Dissolve) وتذويب للغلاف ده فتدمر الفيروس فوراً. اغسل الجرح بماء جاري مع اى نوع صابون لمدة 15 دقيقة متواصلة.. الخطوة دي أهم خطوة قبل خطوة المصل نفسه

2️⃣ سيب الجرح ينزف ويتهوى: النزيف البسيط في الأول مفيد لأنه بيطرد اللعاب لبره. والجرح لازم يفضل مكشوف وممنوع تغطيه ببلاستر أو شاش مكتوم نهائياً .. لازم يفضل مكشوف

3️⃣ سباق الـ 24 ساعة: لازم تتوجه بعدها فوراً لمستشفى (الحميات) لعمل اللازم المصل (Immune Globulin) بيتحقن حوالين الجرح لمحاصرة الفيروس واللقاح بيتاخد بجدول محدد لبناء المناعة

🔑 الخلاصة
حياتك مش مجال للتجارب ولا للوصفات البلدي. السعار ملوش فرصة تانية.. الماية والصابون والمصل هما طوق النجاة الوحيد.
♻️المنشور ده لازم يوصل لكل بيت في مصر.. شير (Share) فوراً معلومة واحدة صح ممكن تنقذ روح من مصير مأساوي
✍🏻 Dt Mohamed Riad ✍🏻
بضيف أن العض في الوجه والرقبة أخطر وأسرع للوصول للجهاز العصبي المركزي ولذلك التحرك لازم يكون أسرع أيضا

18/04/2026

بنبه تاني وتالت وعاشر إن بعض الأدوية اللي بتتاخد دون📢📢📢📢📢📢📢📢📢📢📢📢📢📢📢📢📢 استشارة الطبيب يعني دوا استريحنا عليه لعلاج مرض والطبيب حدد جرعته منرجعش ليه تاني غير باستشارة الطبيب ومنكررش الأدوية من نفسنا طالما بتريحنا
بعض الأدوية المستخدمة لعلاج الحساسية بتشتت انتباه الأطفال وبتؤدي الي الانتحار في الكبار الأدوية دي زي asmakast
Montelukast
Singulair
الأدوية دي بتتاخد بجرعات محددة بالوزن وفي حالات محددة ولفترة محددة

18/04/2026

📢📢🛑 الالتهاب السحائي
📌 إلتهاب الأغشية المحيطة بالمخ والحبل الشوكي
📌 بتحصل نتيجة عدوي فيروسية أو بكتيرية
🟠نتيجة الاختلاط بحد عنده المرض أو مضاعفات لمرض عند الشخص نفسه
🟠إلتهاب الأذن الوسطي المزمن أو إلتهاب الجيوب الأنفية أو مضاعفات للعمليات الجراحية في قاع الجمجمة
🛑🛑هل ده مرض جديد.. لأ موجود وبتحصل إصابات لكن مصر بتبذل مجهود خرافي وملايين التطعيمات الواجبة لطلبة المدارس والناس اللي بتسافر حج وعمرة ومن الدول اللي يرفع لها القبعة صراحة في هذا المرض وأمراض وبائية تانية كتير
📌📌الشخص المصاب بيصاب بحمي شديدة وترجيع شديد مفاجئ غير مصاحب بغثيان قبله وحساسية للضوء مع صداع شديد يبدأ يحصل كمان تيبس للرقبة
🔺🔺🔺يجب البدء في المضادات الحيوية الوريدية مع عزل الشخص المصاب وده طبعاً في مستشفي حميات
لو اهملنا العلاج المبكر الحالة بتتطور لأجزاء المخ نفسه وبيبدأ المصاب يفقد مراكز حسية واكثر شئ بيتم فقده هو عصب السمع
🛑🛑🛑🛑الأشخاص اللي اختلطو بالشخص المصاب لازم ياخدو مضاد حيوي وقائي ويطعمو مع طبعاً لبس كمامة وجوانتي عند الاختلاط بالشخص المصاب

13/04/2026

هقلكم سر... الأعياد وعيد شم النسيم بالتحديد لطبيب الأنف والاذن شئ معناه خرز واجسام غريبة في ودن طفل أو في مناخيره.. كسور أنف أطفال وكبار.. اذكر مرة أخدت أدوات استخراج الجسم الغريب وقعدت علي باب الطوارئ المح أهل جايين يجرو بطفل اسالهم جايين أنف واذن واستخرج ا
لجسم الغريب تقريباً شفت أكتر من ٨٠ حالة في الشفت مابين فل وسفنج وخرز وفرت ترياج واستدعاء وصعود للقسم وتكدس
فكل عام وانتم بخير جميعاً
حفظ الله الجميع

12/02/2026

سيدة في العقد الثامن من العمر.. بتاكل قطعة لحمة وقفت في البلعوم وقررت عدم النزول ..
التاريخ المرضي للسيدة علي لسانها وعلي لسان أبنائها وأحفادها مفيش ضغط مفيش سكر لم تدخل غرفة عمليات من قبل والمريضة صائمة تجهيزا لإجراء منظار لاستخراج الجسم الغريب ..
علي ترابيزة العمليات.. ضغط المريضة عالي جداً وسكرها ٥٠٠.. مراجعة التاريخ المرضي مرة أخرى للسيدة علي لسانها بعيداً عن الأبناء والأحفاد المريضة تعاني من ضغط الدم المرتفع ومرض السكر.. ويوجد انسداد في البلعوم نتيجة إجراء جراحات سابقة اللي هي
٨ عمليات جراحية
الأبناء اخفو التاريخ المرضي وادعو الصيام بحجة استخراج الجسم الغريب والمغادرة ..
في حالة مريض مسن ومريض ضغط احتمالات النزيف عالية جداً والإصابة بجلطات أثناء الجراحة وارد عدم الخروج من غرفة العمليات وارد جداً
لما بيتم إخفاء أشياء مهمة زي دي عن الطبيب لمصلحة من أكيد الطبيب أكتر حد هيبقي حريص على المريض وحريص علي خروجه علي خير وفيه إجراءات جراحية بديلة وكل حالة ليها التخدير المناسب لها ...
بصفة عامة في حالات وقوف جسم غريب في البلعوم لو فيه انسداد في مجري التنفس او عدم القدرة علي ابتلاع اللعاب دي حالة طوارئ قصوي
في حالة انتظام التنفس والقدرة علي ابتلاع اللعاب يتم شرب الماء بانتظام لترطيب البلعوم ومن ساعتين ل ٦ ساعات بتنزل الأجزاء دي في أغلب الأحيان وفي أحيان قليلة بندخل عمليات لاسخراجها بالمنظار الاهم عدم الانجراف ورا الأفكار الشعبية بابتلاع قطن أو أشياء أخري حتي لايزداد الأمر سوءا أو نوصل لانسداد مجري التنفس
دمتم بخير دائماً