09/10/2025
عن قصد!
العلاقات بتقوى أكتر لما الاتنين ياخدوا وقت يقعدوا مع بعض ويفكروا سوا عن قصد.
وعن قصد دي مهمة جدًا؛
لأن زي ما بنقول كده “الدنيا تلاهى”، كل شوية حاجة جديدة بتحصل وبتشغلنا عن بعض.
فلو ماخصصناش وقت لينا بإرادتنا، واستنينا “الوقت المناسب”، خلوا بالكوا إن الوقت المناسب عمره ما هييجي لوحده.
احنا اللى بنخلي الوقت مناسب… علشان كده لازم يكون عن قصد. 💛
الموضوع مش إننا لازم نكلم فى المشاكل اللى بينا ولا نلوم بعض أو نفتّح جروح قديمة علشان يكون فى حوار بينا أو زى ما بنقول بنعرف نتكلم!؛ بالعكس،
إننا نهدى شوية، ونشوف إيه الحلو فى كل واحد فينا،
وإيه الحلو فى العلاقة نفسها ونكبره أكتر دا مهم جداً.
وبيقوى العلاقة اللى بينا وبيقولنا من بعض.
وده ممكن يحصل ببساطة لما نسأل بعض شوية أسئلة عن علاقتنا، ومستقبلنا، وطقوسنا اليومية.
الأسئلة دي بتقربنا من بعض، وبتخلى كل واحد فينا فاهم التانى أكتر،
وبتأكد إننا ماشيين سوا فى نفس الاتجاه.
حتى لو قعدتوا نص ساعة كل شهر بس، والله هتفرق جدًا.
جربوا الشهر ده تخصصوا وقت بسيط، وقولوا لبعض الأسئلة دى 👇
عن علاقتكم:
• إيه الحاجات اللى ماشية كويس بينا اليومين دول؟
• فين محتاجين نحط مجهود أو اهتمام أكتر؟
• بنساعد بعض إزاى علشان كل واحد فينا يتطور وينجح فى حياته؟
عن المستقبل:
• إيه أكتر حاجة متحمسين ليها فى الشهور الجاية؟
• إزاى نقدر نستعد ليها سوا؟
• إزاى نخلى أهدافنا وقيمنا ماشية مع بعض أكتر؟
عن طقوس العلاقة:
• إيه الطقوس أو التصرفات اللى بتقوينا وبتخلينا أقرب؟
• فى حاجات جديدة ممكن نضيفها علشان نقوى علاقتنا أكتر؟
• نقدر نعمل إيه علشان نخصص وقت للحاجات اللى فعلاً تهمنا؟
وفي الآخر، العلاقة محتاجة نية واهتمام أكتر من أى حاجة تانية.
مش الحظ اللى بيخلي العلاقة تنجح،
لكن إننا نختار كل يوم إننا نسمع بعض، ونفهم بعض،
ونفضل فاكرين ليه اخترنا بعض من البداية. ❤️
خدوا وقتكم، حتى لو بسيط…
كلمة حلوة، نظرة تفاهم، أو قعدة فيها صدق واهتمام.
كل ده بيبنى علاقة حقيقية،
تعيش وتكبر مع الأيام. 🌿
سلام
