08/08/2025
ازاي نعرف إن وجع البطن عند الطفل سببه إمساك خفي؟
الإمساك من أشهر أسباب وجع البطن عند الأطفال، لكن كتير من الأمهات مش بتاخد بالها لأن الطفل ما بيشتكيش غير من المغص، وبيكون ده العرض الظاهر الوحيد.
الحقيقة إننا في معظم الحالات نقدر نشخص الإمساك من التاريخ المرضي فقط من غير ما نلجأ لأشعة، لأن الأشعة مش ضرورية إلا في حالات قليلة جدًا.
📌 أهم 7 علامات تدل على إن وجع البطن سببه إمساك:
1. الإخراج بيحصل يوميًا… لكن ناقص
لما تسأل الأم هتقول إن ابنها بيعمل حمام يوميًا، لكن الحقيقة إنه مش بيفضي القولون بالكامل. بيخرج كمية بسيطة، والباقي بيتخزن… وده اسمه incomplete evacuation.
2. صعوبة الإخراج أو قضاء وقت طويل في الحمام
ده معناه إن البراز صلب ومسبب ألم للطفل، فبيفضل في الحمام وقت أطول وهو بيحاول يخرج البراز المؤلم.
3. التهرب من الحمام
الطفل بيربط الإخراج بالألم، فيبدأ يتهرب ويأجل، وده بيزود الإمساك أكتر.
4. وضعية الاحتفاظ بالبراز
هتلاقي الطفل بيضم رجله على بطنه ويميل لقدّام – الوضعية المشهورة اللي بيحاول فيها يمنع البراز من النزول… وده بيسبب احتباس أكتر.
5. تسريب برازي لا إرادي (retentive f***l incontinence)
كان زمان اسمه "encopresis"، وده بيحصل لما البراز يتخزن فترة طويلة ويتخمر، فيبدأ الجزء السائل يخرج لا إراديًا من غير ما الطفل يحس، فالأم تلاحظ إن ملابسه متسخة… وتفتكر إنه عنده إسهال!
6. الإحساس بكتلة البراز بالفحص
بالفحص السريري، الطبيب ممكن يحس فعلاً بوجود كتلة برازية تحت اليد، وده بيأكد التشخيص.
7. أعراض إضافية مش واضحة السبب زي:
ضعف الشهية
العصبية والتوتر
التبول اللاإرادي
التهابات مجرى البول المتكررة
