12/09/2026
عارف ايه اصعب حاجة في البعد؟
مش ان الشخص مشي..لكن الاصعب هو (العشم) اللي لسه موجود في عقلك.
انك لسه بتصحى تفكر هتبعتله ايه..وبعدين تفتكر ان مافيش حد تبعتله حاجة.
والنهاردة مش هقولك انسى لأن العقل مش بيمسح الذكريات والاحداث..لكن هقولك ازاي تهدي الوجع ده وتعيش حياتك تاني.
بص..اللي بيحصلك نفسيا لما بتبعد عن حد كنت بتحبه ان مخك بيتعامل مع الموقف ده كأنه (أعراض انسحاب) زي اعراض الانسحاب من مادة مخدرة بالظبط
يعني هرمونات السعادة (الدوبامين) بتقل فجأة فجسمك بيبتدي يطلب جرعة تانية والجرعة دي هي انك تدخل تشوف اخر ظهور ليه او تسمع ريكورد قديم ليه او تقرا رسايله وعلشان كده
أول خطوة للتعافي هي انك تفهم ان رغبتك في مراقبته دي مش (حب) دي زي مايكون صراع كيميائي جوه دماغك..ولازم تواجه الصراع بالمنطق ده.
ومن أكبر الغلطات اللي بتعملها هي انك بتعمل (مونتاج) للذكريات يعني بتقعد تفتكر الحلو اللي كان في العلاقة من الضحك والخروجات وبتمسح الخناقات والإهمال واللحظات اللي انت كنت حاسس فيها انك وحيد وهو بيهملك وبيتجاهلك.
والحل الواقعي: انك لما تلاقي عقلك بيفكرك بالحلو بس..افتح الملاحظات عندك واكتب (قايمة العيوب) يعني الحاجات اللي كانت بتخليك مش مرتاح والحاجات اللي كانت بتضايقك واقراها كل ماتضعف وخليك عارف ان الوجع بيقل لما الصورة بتكمل وبتبطل تكون مثالية.
والتأقلم ده محتاج ترتيب وخطوات مش بس وقت وعلشان كده ركز في الكام نقطة الجايين دول:
١. بلاش تعيش دور الضحية وماتمنعش نفسك من الخروج ومتقفلش على نفسك النور وتسمع أغاني حزينة لكن انزل واتحرك اخرج حتى لو حاسس ان حركتك تقيلة لان الحركة دي بتغير كيميا المخ.
٢. اكتشف نفسك من تاني لانك كنت تايه في العلاقة دي وتايه عن نفسك فارجع للحاجات اللي كنت بتعملها قبل مالشخص ده يدخل حياتك.
٣. اقطع خيوط التواصل ولو لسه فيه صور او هدايا او رسايل وحاططهم قدامك..فأنت كده بتعذب نفسك..شيلهم وامسحهم..المهم مايبقوش متاحين (بضغطة زرار).
وعايزة اقولك حاجة..ان البعد مش معناه انك فشلت ولا معناه انك مش هتتحب تاني..البعد ده معناه ان (المساحة) دي فضيت علشان حاجة أنسب ليك تدخل حياتك. حاجة كده شبهك بنسميها العوض 💓
والوجع هيفضل يقل تدريجيا لحد مايجي يوم تفتكره فيه وتبتسم مش علشان عايزه يرجع بس علشان انت اتعلمت وكبرت وفهمت وبطلت تحس بوجع.....حمدالله على سلامتك 👌
#نوستالجيا
#ازيك
