Psy Souhair Tarek

10/03/2026

هي مش مجرد رحلة جديدة ، هي فرصة للعلم والخبرة ♥️👌

19/01/2026

أطفالنا مش أرقام… ولا حالات عابرة.
لو عايز تعرف مين المسؤول عن صحتهم النفسية بجد،
بادر بالحجز والحضور في مؤتمر من لهؤلاء؟

❓ يعني إيه مؤتمر «من لهؤلاء؟» وليه مهم؟
ببساطة…
مؤتمر من لهؤلاء؟ مش مؤتمر تقليدي، ولا مجرد محاضرات علمية بنسمعها ونمشي.
ده مؤتمر معمول عشان يجاوب على سؤال بقى بيطارد كل بيت وكل معالج نفسي:
مين مسؤول عن أطفالنا نفسيًا؟ 🧠
الواقع اللي بنشوفه النهارده
بقينا بنواجه حالات بتزيد يومًا بعد يوم:
أطفال عندها قلق واكتئاب 😔
أطفال بتعاني من وسواس قهري
أطفال بتأذي نفسها أو بتفكر في الانتحار 💔
وأهالي تايهة… ومعالجين مش دايمًا مؤهلين للتعامل مع النوع ده من الحالات
📌 المؤتمر ده معمول:
للمعالج اللي حاسس إن الواقع سبق العلم
ولولي الأمر اللي خايف وعايز يفهم… مش يشخص لوحده
⭐ إيه اللي بيميز المؤتمر ده عن أي مؤتمر علمي؟
مش نظريات بس… علم مطبق وواقعي
عرض مسرحي مؤثر يوصل المعاناة للقلب قبل العقل
ورش تطبيقية على حالات حقيقية من العيادات
نقاشات مفتوحة مش محاضرات جافة
🔗 ربط حقيقي بين العلم والواقع اليومي
👥 مين الجهات اللي هتحضر؟
هيكون معانا:
متخصصين في الصحة النفسية
معالجين وأخصائيين نفسيين
مؤسسات مهتمة بالطفل والأسرة
وأولياء أمور جايين يفهموا ويتطمنوا
➡️ اللقاء ده مش للنخبة العلمية بس…
ده لكل حد حاسس بالمسؤولية
🔥 المفاجأة الكبيرة
في المؤتمر ده 👇
هنعلن عن أول برنامج متخصص في الوطن العربي
لتخريج معالجين نفسيين متخصصين في علاج الأطفال 👶
▪️ مناهج علمية حديثة
▪️ تطبيق عملي حقيقي
▪️ إشراف مهني معتمد
▪️بعيد عن الاجتهادات الشخصية
👈 الخلاصة
لو أنت:
معالج نفسي
ولي أمر
أو إنسان حاسس إن اللي بيحصل مع أطفالنا خطر ومحتاج وقفة
المؤتمر ده معمول عشانك
وسؤالنا واحد: من لهؤلاء؟
تفاصيل المؤتمر
🗓️ الموعد: 29 يناير
📍 المكان: مسرح الواي – جمعية الشبان المسيحيين
🔗 الموقع على الخريطة:
https://maps.google.com/maps/place//data=!4m2!3m1!1s0x14f5c38caec1aee9:0x8cef92f062793bc0
📲 لينك الواتساب في أول كومينت 👇

18/01/2026

📌 هو إحنا بنخف بـ "الكلام" فعلاً؟ 🗣️🛠️
وضحنا قبل كدا إن الكلام جوا الجلسة النفسية مش مجرد حكاوي أو فضفضة، هو أداة علاجية دقيقة ومنهجية، الأخصائي بيستخدمها لإعادة بناء طريقة تفكيرك واستجاباتك العاطفية والسلوكية.
الأخصائي النفسي المسؤول بيبني تدخله على "مدارس علاجية" عالمية، كل واحدة ليها خطة وتقنيات مُحددة ومبنية على أبحاث علمية. ودا بيحصل بعد تقييم شامل للحالة. من أشهر هذه المدارس:
1️⃣ العلاج المعرفي السلوكي (CBT):
· مؤثر وقوي جدًا في علاج القلق والاكتئاب وغيرهما من الاضطرابات.
· فكرته الأساسية: المشكلة مش في الأحداث اللي بتحصل، لكن في تفسيرك ليها. العلاج بيعلّمك ازاي تصطاد "الأفكار التلقائية" المشوهة وتستبدلها بأفكار أكثر واقعية وتوازنًا.
2️⃣ العلاج الجدلي السلوكي (DBT):
· اتصمم أصلاً للتعامل مع المشاعر الشديدة وصعوبة تنظيمها.
· بيُركز على تعليمك مهارات عملية زي: اليقظة الذهنية (Mindfulness)، تنظيم العاطفة، تحمل الضيق، وفعالية العلاقات.
3️⃣ العلاج بالقبول والالتزام (ACT):
· بدل محاربة الأفكار والمشاعر الصعبة (اللي بتبقى مرهقة)، المدرسة دي بتعلمك تقبل وجودها كجزء من التجربة الإنسانية، مع الالتزام بالتحرك ناحية القيم والأهداف المهمة لك في حياتك.
✨ ملحوظة مهمة جدًا:
المدارس دي مجرد أمثلة لمناهج شائعة وفعالة. علم النفس غني بمدارس وتوجهات تانية كتير (زي التحليلية، والإنسانية، والعلاج باللعب، والعلاج النسوي، والجشطالت، وغيرها).
الأخصائي الكفء هو اللي بيعرف – بعد التقييم – يختار أو يُدمج بين المناهج دي بما يناسب كل حالة بشكل فردي ومُخصص.
✨️ والأهم:
الكلام في الجلسة بيكون موجهًا وهادفًا، مش عشوائي. ودا بيحتاج ثقة وشفافية بينك وبين الأخصائي عشان ينجح.

14/01/2026

مناغاة أبنك مش مجرد لعب ، ده تدريب علي الكلام والإشارات هي لغته 👌

من 6 شهور لـ سنة: المناغاة مش لعب🧩

في المرحلة دي غالبًا الطفل:
✔️ يكرر مقاطع (با – ما – دا)
✔️ يستجيب لاسمه
✔️ يشاور بإيده
✔️ يضحك ويتفاعل مع اللي حواليه

دي كلها مؤشرات نمو لغوي سليم.

ننتبه لو:⚠️
• مفيش مناغاة
• مفيش إشارات
• مفيش تفاعل

افتكري:
المناغاة = تدريب للكلام
والإشارات = لغة

اللعب، الغُنا، والكلام اليومي
أقوى جلسات تخاطب طبيعية لطفلك.

لينك التسجيل في أول كومنت 👇

13/01/2026

📌 هي الجلسة النفسية عبارة عن "فضفضة" وبس؟
​لو فاكر إنك رايح تحكي والأخصائي يسمعك ويطبطب عليك ويمشيك، يبقى لازم تعرف إن الموضوع أعمق بكتير.
العلاج النفسي "علم" مش مجرد دردشة، ودي الخطوات اللي بتحصل فعلاً وفقاً للبروتوكولات العالمية:
​📌 إزاي بيتم العلاج النفسي جوه الجلسة؟
١-​التقييم والصياغة (Assessment): في الأول الأخصائي مش بيسمع بس، ده بيجمع خيوط حياتك (تاريخك، أفكارك، ردود فعلك) عشان يبني "خريطة" واضحة للي بتمر بيه.
٢- ​وضع الأهداف (Goal Setting): مفيش علاج عشوائي، بتحددوا مع بعض إيه اللي عايزين نوصل له؟ (توقف نوبات الهلع، تحسين الثقة بالنفس، أو التعامل مع صدمة قديمة).
٣- ​استخدام فنيات علاجية (Therapeutic Techniques): هنا بييجي دور العلم؛ سواء كان علاج معرفي سلوكي (CBT) لتغيير أنماط التفكير، أو علاج جدلي سلوكي (DBT) لتنظيم المشاعر.
٤- ​التدريب والمهارات (Skill Building): الأخصائي بيدربك على "أدوات" تستخدمها بره الجلسة، زي تقنيات التنفس، مواجهة الأفكار الكارثية، أو وضع حدود مع الآخرين.
٥- ​المتابعة والقياس: كل فترة بنشوف: هل الأعراض قلت؟ هل جودة حياتك اتحسنت؟ العلاج له بداية، وله "خطة إنهاء" واضحة.
​✨️خلي بالك✨️
● العلاج النفسي "مجهود مشترك": ​الأخصائي عليه 50% (العلم والتوجيه والأمان)، وأنت عليك 50% (الصراحة، الالتزام،والتطبيق)
● العلاج النفسي هو استثمار في أغلى ما تملك.. "عقلك وسلامك النفسي".
​ تفتكروا إيه هي "أشهر المدارس العلاجية" اللي بنستخدمها في الجلسات وكل واحدة بتعالج إيه؟ ده اللي هنعرفه البوست الجاي!🫡

12/01/2026

متابعتك بدري أمان 👌

فقرة اسأل طبيب ❓
ابني سنتين ومش بيتكلم… أستنى ولا أقلق؟

الإجابة:👨‍⚕️
في سن سنتين الطفل الطبيعي بيكون عنده كلمات واضحة،
لكن في أطفال بيتأخروا شوية وده مش دايمًا معناه مشكلة كبيرة.

المهم نتابع:
🔵 هل بيفهم الكلام؟
🔵 هل بيتفاعل ويطلب؟

لو الإجابة لأ، يبقى التقييم بدري أفضل من الانتظار.

المتابعة بدري طمأنينة مش قلق.
فورم التسجيل في أول كومنت 👇💙

11/01/2026

📌 إيه الحاجات اللي الأخصائي النفسي مينفعش يعملها ؟
❎️ مينفعش يكتب أدوية عشان ده دور الطبيب .
❎️ مينفعش يشخص أمراض عضوية زي الغدة والقلب اللي ليها أعراض مشابهة للقلق والإكتئاب .
❎️ مينفعش يحللك مشاكلك الحياتية ويأخذ قراراتك بالنيابة عنك .
❎️ مينفعش يقدم وعود بالشفاء السريع أو السحري لأن رحلة العلاج محتاحة وقت وإستمرار ومجهود .
❎️ مينفعش يكسر حدود العلاقة العلاجية معاك بأي شكل أو يستغلك بأي طريقة .
📌 أومال طب كدا إيه الحاجات اللي الأخصائي يقدر يعملها ؟
✔️ تقييم نفسي عملي ودقيق .
✔️ تعليمك مهارات للتعامل مع نفسك والآخرين .
✔️ يقدملك أدوات عملية لتقليل الضغط والقلق وتعديل السلوك .
✔️ يدعمك ويساعدك في فهم مشاعرك والتعامل معاها بشكل صحيح .
✨️الأخصائي النفسي مرشد علمي وموجه مش ساحر ولا بيدي حلول سريعة و العلاج النفسي مش كلام وخلاص هنعرف بيتم إزاي البوست الجي ✨️

08/01/2026

علي درب الحلم نكمل المشوار 🫡
الحلم بيكبر وينتشر يوم بعد يوم ❤️

في إطار دعم الرؤى المشتركة وبناء الشراكات المؤثرة،
تم توقيع عقد اتفاق بين شركة كافٍ للإنتاج الإعلامي والتعليمي وجمعية العاملين بمجال الصحة النفسية،
لتصبح كافٍ أحد المشروعات التي تمتلكها الجمعية رسميًا.

تعاونٌ يجمع قوة الرسالة مع احترافية التواصل،
ويؤسس لمرحلة جديدة من العمل المؤسسي الهادف
إلى نشر الوعي بالصحة النفسية وتقديمه بلغة معاصرة
تصل إلى المجتمع بفاعلية وتأثير.

انتظروا مفاجآت نوعية خلال الفترة القادمة…
فالقادم يحمل قيمة، ورؤية، وأثرًا ممتدًا

08/01/2026

📌 يعني إيه طبيب نفسي والفرق بينه وبين الأخصائي النفسي ؟
⬅️ الطبيب النفسي شخص درس في كلية الطب وتخصص في الجانب النفسي .
⬅️ يحق له التشخيص وكتابة الأدوية ومتابعتها .
⬅️ بيحدد ويفرق بين الأعراض النفسية والأعراض العضوية وعنده قدرة علي إستبعادها من التشخيص .
⬅️ تحديد الحالة اللي محتاجة أدوية ، وتحديد متي يمكن للأخصائي التدخل مع الحالة .
📌 الفرق بينه وبين الأخصائي النفسي ؟
⬅️ الطبيب مسئول عن التشخيص والتدخل الدوائي وغيره من أنواع التدخلات الطبية
⬅️ الأخصائي مسئول عن الشغل علي الأفكار والمشاعر والسلوكيات .
📌 طب أمتي أروح للطبيب وأمتي أروح للأخصائي ؟
⬅️ تروح للطبيب
١- لما يكون عندك أعراض شديدة (إكتئاب عميق / أفكار إنتحارية / هلالاوس / فقدان إتصال بالواقع).
٢- لما تكون محتاج تشخيص طبي دقيق وممكن أدوية كمان .
٣- لما المشاكل النفسية والأعراض تكون مستمرة ومؤثرة جدا علي حياتك اليومية .
⬅️ تروح للأخصائي
١- لما تحس بضغط / توتر / قلق يومي .
٢- عايز تتعلم مهارات للتعامل مع مشاعرك و أفكارك وسلوكياتك .
٣- في تحديات في جوانب حياتك (شغل - دراسة - علاقات ومحتاج دعم .
٤- عايز تبدأ في تغيير بسيط ومستمر في حياتك .
✨️في حاجات تانية غير الأدوية الأخصائي مينفعش يعملها هنتكلم عنها في البوست الجي✨️