28/12/2025
أزمة ربع العمر
أيوة… زي ما أنا كاتبة كده.
عايزة أتكلم معاكم النهارده عن أزمة ربع العمر،
وهي غير أزمة منتصف العمر.
عارفين الإحساس اللي بييجي فجأة وإنت قاعد لوحدك في نص الليل، وتسأل نفسك: "هو أنا بعمل إيه في حياتي؟"
تبص حواليك تلاقي: اللي اتجوز، واللي سافر، واللي اترقى في شغلانة أحلامه…
وأنت حاسس إنك واقف مكانك، أو ماشي في سكة مش شبهك. تحس إنك "عطلان".
أهلاً بيك… إنت مش لوحدك، دي أزمة ربع العمر.
الأزمة دي ممكن تبدأ من سن 18 لحد 30 سنة.
فجأة تلاقي نفسك مش فاهم إنت فين، ولا رايح على فين، وحاسس إنك متأخر عن اللي حواليك،
رغم إنك بتعمل اللي تقدر عليه.
تحس كإنك واقف في نص الطريق: مش عارف تكمّل فين ولا إزاي
وتبدأ الأسئلة التقيلة:
أنا بعمل إيه؟
وصلت لإيه؟
هو ده اللي كنت عايزه؟
أنا ماشي صح ولا غلط؟
هو أنا المفروض أكون وصلت لإيه في السن ده؟
الأسئلة دي بتوجع…
خصوصًا لما تحس إن الوقت بيجري وإنت لسه مكانك.
تحس إنك تايه، مش واضح قدامك أي اتجاه،
قلقان من بكرة: الشغل، الفلوس، الجواز، الاستقرار.
تفتح السوشيال ميديا تحس إن الناس كلها سبقتك،
فتبدأ تجلد نفسك: أنا متأخر… أنا فاشل
مزاجك مش ثابت، يوم فوق ويوم تحت.
مش شرط كل الناس تحس بنفس الحاجة، بس أغلب اللي بيعدّوا بأزمة ربع العمر بيحسوا بـ:
🔵توهان وعدم وضوح
🔵قلق من بكرة
🔵مقارنة دايمة بالناس، خصوصًا اللي على السوشيال ميديا
🔵إحباط وإحساس إنك مش كفاية
🔵تقلب مزاج
🔵فقدان شغف
طيب… ده بيحصل ليه؟
🟦بسبب ضغط المجتمع الرهيب:
لازم تنجح بدري
لازم تستقر
لازم تبقى حاجة كبيرة
🟦وبسبب إنك خرجت من مرحلة الدراسة ودخلت حياة مليانة مسؤوليات.
🟦وبسبب إن الأحلام اللي رسمتها زمان خبطت في واقع مش سهل:
شغل مش ثابت أو مش مُرضي
اختيارات كتير بس مفيش وضوح
🟦وكمان… المقارنة بقت سهلة أوي
ووجعها كبير وخصوصًا مع وجود السوشيال ميديا اللي مبيّنة إن الكل ناجح وسعيد طول الوقت.
طيب… هل ده اضطراب نفسي؟
لا خالص. دي مرحلة.
بس لو طولت، أو أثرت على حياتك وشغلك ونفسيتك، ساعتها هتكون محتاج اهتمام ودعم
عشان متتحولش لحاجة أصعب.
طيب أتعامل معاها إزاي؟
⬅️أول حاجة: إنت مش لوحدك
⬅️بطل تقارن نفسك بغيرك
⬅️اشتغل على خطوة صغيرة بدل ما تفكر في العمر كله
⬅️اسأل نفسك: أنا عايز إيه بجد؟ مش الناس عايزة مني إيه
⬅️وكمان ممكن تكلم حد تثق فيه، أو مختص نفسي لو حاسس إن الحمل تقيل
وفي الآخر…
أزمة ربع العمر مش نهاية، بالعكس… دي غالبًا بداية.
بداية إنك تفهم نفسك أكتر، وتعيد ترتيب حياتك على مزاجك مش على مزاج المجتمع.
مش لازم توصل بسرعة، المهم تبقى ماشي في الاتجاه اللي شبهك.
