02/09/2026
أنا عارف إن العلاقة دي بتأذيني… وبرجع لها
أنا عارف إني لازم أحط حدود… بس بخاف أزعل الناس
أنا عارف إن التفكير ده بيتعبني… وبرغم كده مش قادر أوقفه
أحيانًا بنبص للسلوك من برّه ونستغرب ليه الشخص بيعمل الحاجة اللي هو عارف انها مش مناسبه
لكن في العلاج النفسي، المعرفة وحدها مش كفاية لتغيير السلوك لأن السلوك اللي بنكرره غالبًا بيكون له وظيفة
ممكن يكون بيحمينا من رفض بنخاف منه أو بيقلل قلق مؤقتًا أو بيخلينا نحس بالأمان أو بيدينا إحساس بالسيطرة أو ببساطة… يكون نمط اتعلمناه واتعودنا عليه.
وعشان كده، تغيير السلوك مش بيبدأ بسؤال:
«إيه الصح اللي المفروض أعمله؟»
لكن بيبدأ بأسئلة أعمق:
«أنا بعمل كده ليه؟»
«إيه اللي بحاول أتجنبه أو أحمي نفسي منه؟»
«إيه الفكرة أو الخوف اللي بيحركني؟»
«إيه اللي بيحصل لي بعد ما أعمل السلوك ده؟»
لأن لما نفهم الدايرة اللي بتحرك السلوك نقدر نبدأ نكسرها
وده واحد من أهم أدوار العلاج النفسي:
مش إن المعالج يقول لك تعمل إيه…
لكن يساعدك تفهم السبب، وإزاي تقدر تختار استجابة مختلفة
فلو لقيت نفسك بتكرر نمط عارف إنه بيؤذيك حاول متبدأش بلوم نفسك
ابدأ بالفضول
«إيه اللي بيحصل جوايا قبل ما أعمل كده؟»
أحيانًا السؤال الصح بيكون أول خطوة في التغيير 🤍
