03/08/2026
ليه أوقات بنحس إن جوانا شخصين بيشدوا في اتجاهين مختلفين؟
ممكن تكون عايز تعمل حاجة وفي نفس الوقت عايز تهرب منها.
عايز تقرب من حد لكن أول ما يقرب منك تخاف وتبعد.
عايز ترتاح…لكن تفضل تضغط على نفسك.
وتبدأ تسأل نفسك “أنا مالي؟ هو أنا عايز إيه بالظبط؟”
الصراع النفسي مش معناه إن فيك حاجة غلط بالعكس…هو معناه إن جواك احتياجين، أو رغبتين، أو فكرتين، كل واحدة منهم بتشدك في اتجاه مختلف.
محتاج تقرب من حد… لكن خايف تتوجع
محتاج تقول “لا”…لكن خايف تخسر اللي قدامك.
محتاج تقول اللي جواك… لكن خايف تتفهم غلط او يتحط حكم عليك
محتاج ترتاح…لكن بتحس بالذنب أول ما تبطل شغل.
محتاج تعبر عن غضبك…لكن متعلم من زمان إن الغضب حاجة مينفعش تظهرها.
كل طرف من دول له سبب وله وظيفة علشان كده الحل مش إننا نسكت طرف منهم أو نحاول “نكسب” طرف على حساب التاني.
الحل إننا نفهم كل طرف بيحاول يحمينا من إيه.
لأن أوقات كتير الجزء اللي بيخوفك من التغيير، مش بيكره التغيير هو بس خايف من اللي ممكن تخسره بعده.
والجزء اللي بيخليك ترضي الناس، مش بيحب يرهقك هو اتعلم في وقت من الأوقات إن القبول مرتبط بإرضاء الآخرين.
لما تبص للصراع بالطريقة دي هتكتشف إنك مش بتحارب نفسك انت بتحاول تفهمها وده فرق كبير.
المشكلة مش إن عندك صراع نفسي المشكلة إنك تفضل طول الوقت تحاول تجبر نفسك على اختيار، من غير ما تسمع الطرفين.
إيه أكتر صراع بتحس إنه بيتكرر جواك؟
