عيادة د. ايهاب احمد زكي إستشاري أمراض الباطنة العامة والكلي والسكر

29/05/2026

🚨 قبل ما تسأل… اعرف امتى تروح فين!
في لحظات معينة، الوقت مش في صفك.

مغص شديد،ضيق في التنفس، ألم في الصدر، فقدان وعي، نزيف، أو أي حالة مفاجئة خطيرة…
❌ مش وقتها تسأل جار
❌ مش وقتها تبعت رسالة في جروب
❌ مش وقتها تتصل بالدكتور
❌ مش وقتها تروح عيادة خاصة
✅ وقتها الصح:
اتجه فوراً لأقرب طوارئ مستشفى

🏥 الفرق اللي لازم تعرفه:
طوارئ المستشفى ⬅️ للحالات الحرجة والمفاجئة اللي محتاجة تدخل سريع وأجهزة وفريق متكامل
العيادة الخاصة ⬅️ للمتابعة والتقييم بعد ما الحالة اتستقرت في الطوارئ، أو للحالات غير العاجلة
🟣ثانية واحدة ممكن تفرق كتير…
خد القرار الصح من أول لحظة 💙

26/05/2026

كل عام وانتم بخير تقبل الله منا ومنكم صالح الأعمال

17/05/2026

تقبل منا ومنكم صالح الأعمال

13/05/2026

"وَمَنۡ أَحۡیَاهَا فَكَأَنَّمَاۤ أَحۡیَا ٱلنَّاسَ جَمِیعࣰاۚ"
♻️متابعة و استكمالاً للبوست السابق الخاص بمتابعة مريض الكلي والسكر اللي أهمل العلاج والمتابعة واتبع نظام #الطيبات :

♻️الحمد لله بعد بحث عنه في المستشفيات ... قابلته واطمنت عليه ومبسوط جدا انه الحمد لله اقتنع بكلامي وتوجه فورا الي المستشفي و بدأ جلسات الغسيل الدموي وقام بعمل جلستين وكما واضح تحسن كبير في وظائف الكلي ( صورة التحاليل اللي اتعملت في المستشفي مرفقة بالبوست ) و جاري عمل الجلسة الثالثة أثناء كتابة هذا البوست ....




✅️ سنوافيكم بتطورات الحالة تباعاً

12/05/2026

💥تحديث عن اخبار الحالة في اللينك ده 👇
https://www.facebook.com/share/p/14kJu4PrNJu/
😔ضحية أخري من ما يسمي بنظام #الطيبات

مريض ٤٩ سنة عنده سكر ( معتمد علي الانسولين ) و قصور كلوي مزمن ( يعني وظائف الكلي اعلي من المعدل الطبيعي ولكن لم يصل لمرحلة الفشل الكلوي ) ؛
المريض كان منتظم في المتابعة معي في العيادة لتظبيط السكر ووظائف الكلي منذ اكثر من ٥ سنوات ولكن انقطع عن المتابعة منذ ما يقرب السنتين ، وكانت آخر تحاليل شفتها من سنتين كانت مقبولة بالنسبة للحالة فكانت وظائف الكلي في حدود ٢.٥ الي ٣ ( المعدل الطبيعي لوظائف الكلي حوالي ١ ) .....

♻️حضر أمس اللي العيادة ودار الحوار كالتالي :

🧑‍⚕️انا : ازيك يا استاذ ..... اخبارك ايه؟ عاش من شافك؛
🙋‍♂️هو: الحمد لله يا دكتور ... انا تمام الحمد لله
🧑‍⚕️انا: خيرا ؟ وصلنا لفين اديلنا فترة متقابلنلش
🙋‍♂️هو: والله يا دكتور انا كويس جدا من فترة وظبطت اكلي وبطني ارتاحت و خسيت وبقيت زي الفل
🧑‍⚕️انا : طيب الحمد لله .... طيب ايه اللي تعبك انهاردة وخلاك تيجي تكشف ؟
🙋‍♂️هو: والله اديلي فترة كدة حوالي شهر ترجيع مستمر وهرش جامد
🧑‍⚕️انا: طيب اخبار وظائف الكلي والسكر ايه ؟
🙋‍♂️هو: انا حاسس اني كويس .... مش بعمل التحاليل مادام مش حاسس بحاجة ؛ ده انا حتي وقفت العلاج كله ومظبط الاكل
🧑‍⚕️انا: اوعي تكون ماشي علي نظام #الطيبات
🙋‍♂️هو: ينظر بابتسامة ساخرة _ طبعا انتو الدكاترة مش عاجبكم كلام د. العوضي _ ايوة انا ماشي علي النظام ومرتاح جدا ... بدليل اني موقف الانسولين وسكري مظبوط علي طول بالجهاز العشوائي
🧑‍⚕️انا: في حالة صدمة وذهول ومش قادر اتكلم ..
كتبت التحاليل وقولت له يعمل التحاليل انهاردة ويجي في أسرع وقت

♻️جالي تاني يوم وجايب التحاليل وجايب معاه زوجته ( ام العُريف)
🧑‍⚕️انا: عملت التحاليل ؟
🙋‍♂️هو: اتفضل بيقولوا التحاليل عالية شوية
🧑‍⚕️انا : شوفت التحاليل كما كنت متوقع ( صورة التحليل مرفقة بالبوست ) وظائف الكلي ارتفعت الي معدلات كبيرة جدا وتسمم بالدم بدرجة عالية جدا ولازم نغسل انهاردة
🙋‍♂️هو: ليه يا دكتور بس كدة ... ما انا كويس اهو دول شوية ترجيع و هرش
🧑‍⚕️انا : ما هو الترجيع والهرش بسبب ارتفاع وظائف الكلي ولو أخرت هنبدأ تدخل في غيبوبة

💥وهنا تدخلت أم العُريف ( زوجته ) التي كانت تراقب الحوار في صمت؛

💁‍♀️الزوجة: يا دكتور انا اعرف اللي بيغسلوا دول لازم يكونوا تعبانين ورجليهم وارمة وهو ماشاء الله اهو قدامك زي الفل
انا رأيي تكتب علاج كويس و هيبقي كويس ... سيبك من موضوع الغسيل ده

🧑‍⚕️انا: في محاولة بائسة مني أني اتمالك نفسي علشان ما انفعلش عليها؛ بدأت امسك نفسي واتكلم بهدوء واشرح خطورة الموقف واد ايه هو لما أهمل في العلاج والمتابعة وصل لكدة .... واشرح خطورة تأجيل قرار الغسيل ....

💁‍♀️الزوجة : بصتلي بصة تحدي زي ما بتكون بتتحداني وراحت سألت السؤال اللولبي ده :
أنت بتقول ان النظام ( تقصد نظام # الطيبات ) وحش ومضر ؛ طب ازاي السكر التراكمي مظبوط وكل ما نحلل بيطلع السكر مظبوط ؟ مع ابتسامة سخرية وكدة علي اساس انها بتزنقني في الكورنر ؛

🧑‍⚕️انا: لان كل ما وظائف الكلي بتعلي بيقل احتياج الجسم للانسولين بسبب الكسل اللي في الكلي ... يعني مريض الكلي اللي عنده سكر وماشي علي علاجات والأمور مستقرة وبعد فترة يبدأ السكر يقل وهو ماشي علي العلاج يبقي كدة وظائف الكلي بتزيد والكسل بيزيد بسبب ان العلاج بيفضل ماشي في الدم مش بيخرج بسبب تدهور حالة الكلي وبالتالي يفضل تأثير العلاج مستمر ويعمل هبوط في السكر
اتمني اكون عرفتي ليه السكر مش عالي رغم انه وقف العلاج

💁‍♀️الزوجة: نظرة خوف و توتر؛؛ يعني ايه كدة ؟

🧑‍⚕️انا: نطلع من هنا علي المستشفي علشان نغسل ولما يخرج بالسلامة اشوفه ونحدد هنمشي ازاي الفترة اللي جاية

🤲أتمني انهم يكونوا راحوا المستشفي ومروحوش البيت

✳️وللحديث بقية إن كان في العمر بقية

🧑‍⚕️

10/05/2026

06/05/2026

لو عندك مشاكل في المعدة والقولون.. لازم تمنع الحاجات دي اثناء فترة العلاج 👇

28/04/2026

⁉️ازاي احافظ علي الكلي 👌

23/04/2026

⁉️ هو ايه الفرق بين النوع الأول و النوع الثاني للسكر ؟
#السكر