08/03/2026
هو السايكوباتي لازم يبقا مجرم وماشي يهدد الناس بسلاح ؟؟
السايكوباتية (psychopathy) من أشكال اضطراب الشخصية المضادة للمجتمع (anti social personality disorder)
ومن أبرز ما يميز صاحبها أنه 'شر متغلف بخير' خبيث لكن شكله طيب وجذاب وسهل تنخدع فيه
متعته الأذى وبيتغذى عليه وبيتلذذ بيه، ممكن يئذي أي حد حتى لو معملوش حاجة أو حتى لو مايعرفهوش .. ممكن يئذي نفسه شخصياً
بيجري ف دمه حقد وغل وكره وكذب وتأليف قصص وحوارات وتدبير مؤامرات وذكي جداً لدرجة انه ممكن جرايمه تستخبى لسنين ويقدر يخدع حتى الأطباء النفسيين والمحققين من شدة خداعه وبراعته في التمثيل
بيموت في التلاعب والخداع وبيعتبره ذكاء ودايماً يرفع من مستوى التلاعب والعدائية
من أشكال الخداع و التلاعب عنده لعب دور الضحية ولوم الآخرين، يئذي ويقنعك أنه مظلوم
سيء الظن وبيحس بالإهانة والسخرية بدون سبب حقيقي، ولو اتضايق منك يبتسملك عادي وتتفاجيء بعد كدا أنه بيخططلك وينتقم منك أشد انتقام وهو مقتنع انك تستحق دا
عنفه مستخبي وبيقتل بدم بارد، لو حد مش عاجبه ممكن عادي يقتله ويقوم يغسل إيده ويشرب نسكافيه
مابيتراجعش ولا بيندم على حاجة ولا بيحس بالذنب ولا الخوف ولا الحزن، بيحس بالغضب والقرف بس.. والسعادة مرتبطة بالتلاعب والإيذاء
عنده كذب مَرَضي .. بيدخل الكذب في الصدق بطريقة تخليك صعب تكشفه .. ولما ينكشف يداري بكذبة تانية وهكذا
مابيفرقش معاه الإستقرار .. أهم حاجة تحقيقه أهدافه ومصلحته
'الغاية تبرر الوسيلة' مبدأه في الحياة .. كذب/سرقة/نصب واحتيال /سح,ر /تزوير/ خيانة / قتل ...إلخ
عنده مشكلة في قشرة الفص الجبهي المسئولة عن التعاطف والضمير والأخلاق، ودا بيخليه صعب جداً يتعالج أو حتى يتعلم من أخطائه
