07/07/2026
صورة بعنوان "الجهل".
زيادة هجمات الثعابين السامة.. خلت الجماعة دول جابوا بيض.. وحقنوه سم.. غالبا ستركنين.. وبيوزعوه عشوائيا وسط الزرع.. عشان يقتل الثعابين.
لأن الثعابين فعلا بتحب وتاكل البيض.
ومن النقطة دي بنوا الفكرة.
الفكرة اللي ما تطلعش الا من "مصطبة".
ومش عارف ايه الغباء الرهيب اللي تملك البعض دا.. وبقى فاكر نفسه الساحرة الشريرة في ديزني.. وماشي يوزع سموم في الحياة.
لا وبيلاقي أسراب من الحمير تصفق له.
- إيه أسباب انتشار الثعابين؟ هو الغباء اللي انت بتعمله دا بالضبط.
حضرتك بترمي كراكيب.. وكل اسطح البيوت في مصر كلها تقريبا كراكيب مالهاش معنى.. واكوام خشب وصفايح فاضية وعفش مسوس وكلام فارغ.. شايلها لحد ما ربنا يفتح عليك وتعمل مفاعل وتحولها لبلاديوم .. وقدام البيوت في الريف بالذات.. كاوتش عربيات.. واكوام قمامة.
حتى الترع بتغرق قمامة.
معلش عايز دا يحوي ويجذب ايه بالضبط غير الافاعي والأصلات والثعابين؟
بجع وبلابل؟
- عشان اللغط.. الكلاب بالمناسبة مش بتاكل الثعابين.. ولا هي على قايمة غذائها.
لكن الكلب جهاز انذار رباني مبكر ضد الثعابين.. ومابيسمحش لحيوانات غريبة تدخل منطقته.
فلما بيشوف ثعبان.. او يشمه.. حتى لو مختفي وسط كراكيب او زرع.. بيهاجمه من المنطلق دا.. حتى لو شبعان.
وفي المواجهة دي.. كلب ضد كوبرا.. في الغالب الاتنين بيموتوا. الكلب والثعبان.
الثعابين كمان بتكره أماكن تجمعات الكلاب. حركة وفرك ونباح وحفر.
والثعابين حساسة جدا للاهتزازات دي ومبتحبهاش وبتلخبط جهازها العصبي.
يعني وجود الكلب. حماية من الثعبان.
ومفيش حاجة اسمها "القطة بتقتل الكوبرا". دا كلام ممكن يطلع من المذيعة الفاضلة.. اللي مركبة في بقها نص نعل.. وضيفها الكريم الخبير المصاب بالهبل.. اللي ضبط مع رجال الاعمال بيزنس لتصدير الكلاب كلحوم وزعلان انه فشل.. وقرر يهدد انه يجيب عيلته تضرب الناس.
القطط على قايمة غذاء الكوبرا أصلا. ومن اطعمته المفضلة.
الكلب والنمس والورل والجوارح.. حماية من الثعابين.
اي فلاح عنده ارض فاهم دا وعارفه.
- لما بترمي سم كده في الطبيعة بيحصل ايه؟
مبياكلهاش الثعابين بس.
بياكلها كمان العدو الطبيعي للثعابين.
حيوانات المانجوس.. النمس.. وسحالي الورل والطيور الجارحة.
وبتموت.
وبووم!! ينفجر تعداد الثعابين.. لأن مبقاش في اعداء بتهاجمها.
- المانجوس المصري انقرض تقريبا بسبب دا.. لان هو وسحالي الورل كان ممكن يسرقوا فرخة مثلا.
فطلع فئة من الفلاحين بدأت تقتله.
وفعلا هو بقى نادر جدا خلاص.
الورل النيلي والصحراوي بالذات.. بياكل بيض الثعابين.. يعني بيحميك من المنبع.
بس انت قتلته.. وندر جدا.
عشان كان ممكن ياكل من عندك كتكوت مثلا.
ودلوقتي الباقين منهم حياكلوا من البيض المتسمم ده..!!
- الحيوانات المتسممة دي.. بياكلها برضه لما تموت الطيور الجارحة.. والمانجوس والورل.. وكل عدو طبيعي للثعابين.
فلما بياكلوها.. بيموتوا.
دورة جهنمية رهيبة.
غير كده.. البيض دا طبعا منه حيتكسر وسط الزرع.. وتمتصه التربة.. وتديه للنبات.
نفس النبات اللي حياكل منه المجموعة اللي في الصورة دول.
ويجولك بقرح وفشل كلوي وتلف كبدي.. وطوابير على الارصفة بالأيام قدام المستشفيات.. ويتلف حمضهم النووي وتتفاجيء بانهم خلفوا اطفال بعيوب خلقية تشوهات.
طبعا دي مش عيوب خلقية من عند الخالق.
دي عيوب خلقية البني آدم دا.. خلقها لعياله بنفسه!
ويجيلك هو وأسرته ببطون منتفخة من اكباد منهارة.. وآلام وسرطانات هو مش فاهم جت له ليه ومنين.
المهم انه حيقولك ساعتها في ذكاء: "الحكومة بتسمم الاكل...وتخليه مسرطن"...!!
مايعرفش ان هو بنفسه.. قدمها لنفسه...!
تحب اقولك نسب تسمم التربة في الجيزة والدلتا.. بالسموم والمبيدات.. في مساحات شاسعة.. مملوكة لأفراد.. مش للحكومة؟
- الثعابين أكبادها مصممة ربانيا بطريقة خاصة.. انها بتتعرف السموم وتكسرها اسرع كثير من كائنات غيرها.
وفي جوا جسمها بروتينات وانزيمات خاصة جدا.. بتتحد مع سموم طبيعية وتتلفها.
ودا سبب ان الثعبان نفسه.. مابيموتش لما بيبتلع سمه.
نسبة وفاة الثعابين من سم كيميائي زي الستركنين.. وصلت ٤٠%.
آه.. في ٦ ثعابين من عشرة نجوا.. خمسة أصيبوا باعراض.. زي الوهن والضعف وغيرها.. شفت بعد ايام.. وثعبان واحد محصلهوش اي حاجة على الاطلاق.. في تجربة "بروك Brock" سنة ١٩٦٥.
آه.. آه.. آه. أيوه. انت متخلف للدرجة دي.. ١٩٦٥. تلات ارباع قرن.. عن بني البشر.
اوعى تكون اتفاجئت لا سمح الله؟
- جرعة السم اللي تقتلك مش هي اللي حتقتلني.
وجرعة السم اللي حتقتل كوبرا طولها نص متر.. مش هي اللي حتقتل ثعبان طوله مترين.
بس حتديله مناعة.
وحيورث المناعة دي للأجيال القادمة من الثعابين.
وحتجيلك بعد ٣ - ٤ سنين.. ثعابين لا يجدي معاها السم اصلا.
فالموضوع مش بطيخ.. ويللا هات سم نحطه هنا..!!
تعرف ان لو كلب عادي.. خد جرعة سم قاومها ونجا.. حتتغير كيمياء مخه.. ويهاجمك؟
يعني بعدما كان في حاله.. انت حولته لوحش.. ورجعت تولول.
ليه؟
ببساطة.. عشان أنت غبي.
آه والله العظيم.
أنت مخلوق "غبي"..!
- حقيقي انا مش فاهم لحد امتى حتفضل بيننا فئة بالضحالة والغباوة دي.
رافضة العلم.. ومش عايزة شوف الصورة كاملة.. وابن ابا الحج سويلم جتله فكرة نسمم بيض يللا نعملها.. ومش مهم عيل صغير ياكل ثمرة ملوثة شاربة سم زعاف ويموت.. والحج شندويلي سمم الكلاب الله يباركله.. فسمم لنا المانجوس والجوارح والورل اللي اكلوا من جثثهم والتربة اللي اندفنوا فيها.. وزود تعداد الحيات والثعابين.
ومش مهم كوبرا تلدغ طفل.. عادي!
ومعلش عملنا لكم واحنا قاعدين ع المصطبة جيل ثعابين genetically midified.. بيقاوم السم ومالوش اعداء واعداده برا السيطرة..
الحقونا يا ناس!!
- ايه الجنون والهبل دا؟؟ وليه بتتصرفوا كأن مفيش دولة.. هي المعنية تتصرف.
وفرحان وبتتصور على خيبة ايه؟؟
انت متصور ربنا خالق الكون دا كزريبة يعني.. وفوض حضرتك في نجع ابو خيشة.. تعدل النظام الايكولوجي.. وتحذف كائنات حيوية منه على مزاجك؟
دا فلاحين البنغال ما بيعملوش كده! وبنشوف فيديوهات بينقذوا نمور وفهود.. ومحدش بيوأوأ من جرو.. وللا سحلية ورل.. وللا بيقتل نمس سرق كتكوت و"يرضي مين يا ناس"...!!
فين فلاحين زمان اللي كانت فاهمة وبتشوف في ارضه نمس وكلب وصقر وورل؟ ولما الحج دا من الجيل دا المفروض.
ايه اللي حصل؟
#منقول
