DR/Aya Mohamed

18/01/2026

مستنياكم ي ولاد 🥹❤

خبر سار... ✨🌸
نحب نعلمكم ان د. آيه هتبقا موجوده ان شاء الله يوم السبت الموافق 24 يناير الساعة 2 في معرض القاهرة الدولي للكتاب
فتقدروا تكونوا كلكم متواجدين هيكون في:
✍️ توقيع على الكتاب
📖 شرح عملي إزاي تستخدموا الكتاب
– سواء مع نفسكم
– أو لو بتشتغلوا بيه مع غيركم
وهتشرح خطوة بخطوة إزاي تطبقوا التمارين اللي جواه بشكل صح وفعّال.
📸 وطبعًا مش هنفوّت: – تصوير
– كلام
– ضحك
– ويوم لطيف نقضيه سوا 💙

14/01/2026

لسه فيه ناس بتدور على علاج من التعلق العاطفي لو انت كمان بتعاني من نفس المشكله اقرأ المقالة دي وهتساعدك
وشاركنا برأيك في الكومنتات واعمل متابعة عشان يوصلك كل جديد ♥️

في الفترة الأخيرة بقى يجيني حالات كتير، أغلب شكواهم عن التعلّق العاطفي…
لكن المشكلة مش في التعلّق نفسه
المشكلة في القرار اللي بيتاخد قبل طلب التعافي.
تيجي واحدة أو واحد مخطوب أو متجوز ويقول:
أنا لسه متعلق/ة بالأولى
وأصلاً سبب خطوبتي أو جوازي إني أنسى الأولى
وأضمن إن التاني/ة ما تعلقنيش وبعدين يسيبني.
ولكن خليني افهمك إمتى بيحصل عندنا تعلق؟
التعلّق بيحصل نتيجة احتياج
ومش شرط يكون الاحتياج نقص أو عقدة
أحيانًا بيكون ( وحدة، فراغ، فقدان أمل)
العقل وقتها بيدور على أي حاجة تسد الاحتياج ده
وأي طرف ييجي يؤنس الوحدة او يشبع الفراغ او يجدد الأمل
هو ده اللي بنتمسك بيه
ومش دي المشكلة
لأننا كبشر موجودين في حياة بعض فعلًا علشان نشبع احتياجات.
المشكلة الحقيقية بتبدأ
لما التعلّق يتحول لـ تعلّق مرضي.
إمتى؟ لما الشخص يتعود على اهتمام معين
وفجأة:
الاهتمام يقل أو يبقى غير منتظم
مرة قرب
مرة بعد
مرة اختفاء
ده اسمه نفسيًا
Intermittent Reinforcement
وده أقوى محفّز للتعلق.
وبيكون أشد وأقسى عند الناس اللي اتربت على:
حب مشروط
نقد أغلب الوقت
عدم وجود مصدر ثابت للأمان
هنا بيحصل عندهم خلط بين الإعجاب والاحتياج
ويفتكروا انه حب…
بينما في الحقيقة دول من أكبر دروب في حياتهم البشرية.
علشان كده قبل ما تدور على شريك حياة علشان يشبع احتياجك.
لازم تختار بناءا على :
معايير اختيار شريك الحياة المدروسه دراسه علميه ونفسية ودينية
وتكون إنت/ي المصدر الأساسي لإشباع احتياجاتك
والطرف التاني ييجي يضيف أمان مختلف وحياة مختلفة بتجربة غير مبنية على ماضي مؤلم ولا على احتياج غير مُشبَع.
و الخطوبة والجواز مش علاج للتعلّق 🤷🏻‍♀️




#علاقات

13/01/2026

❤❤❤

12/01/2026

كتاب عقول غير مرئية (من التشخيص الى التغيير) في معرض الكتاب مع مؤسسة يسطرون للطباعة والنشر (صالة 1)(C17)
الكتاب مكون من 186 صفحة (11 فصل)
الفصل الأول: بوابة بتشرحلك الحقيقة...
الحقيقة اللي اتدفنت وسط سطور في كتب مكونة من آلاف الصفحات
الحقيقة اللي سعى علماء النفس انهم يشفروها داخل كلمات حتى تدركها العقول المستنيرة
وفي نهاية هذا الفصل فيه تمرين بسيط بيفتح بوابة للعقل اللاواعي بحيث اسهل عليك التواصل بينك وبينه وتصبح أشد عقلانية في اتخاذ قرارك وتكون أسرع في فهمك لجوانب ذاتك وأذكى في أدائك اليومي
ثم تبدأ رحلتنا داخل باقي الفصول حيث يحكي كل فصل عن قصة فريدة من نوعها قُصَّت على لسان أصحابها ولكن تم دفن آلامهم داخل كلمات عاجزه عن وصف شعورهم المؤلم والذي لن يشعر به سوا المتألم مثلهم!
ولكن الكتاب مش بس بيحكي مجرد قصص معاناة وأوجاع فقط قد تكون انت ايضا في نفس محنتهم وانما بيحكي أساليب علاج ومسيرة كفاح وفي نهاية كل فصل تمرين بيساعدك انت كمان تتخطى محنتك النفسية بل وكمان تساعد اللي حواليك هما كمان يتخطوا...
كتبت هذه الكلمات بكل حب وصدق وأمان من محبوبتكم د/آية محمد كمال
استشاري نفسي اكلينيكي



#كتب

11/01/2026

سقراط كان اول فيلسوف يبحث في ما ورائيات السلوك في حين ما كان الناس في عصره بتفسر كل حاجه بالآلهة ولكن هوا قلب المعادلة وقال
"اعرف نفسك بنفسك"
ليه بنتألم؟
ليه بنخاف؟
ليه بنتصرف عكس ماحنا عاوزين؟
فكان سقراط عاوز الانسان يعيش حياة متزنه من خلال فهمه لمشاعره، دوافعه، مخاوفه وتناقضاته
انت مش محتاج تكون مريض عشان تفهم ولا محتاج توصل للإنهيار عشان تبدأ....
#فلسفة

11/01/2026

بتدرس نظري كتير بس مش عارف تطبق عملي؟
احنا هنساعدك تفهم النظري وتطبق عملي وتطلع ضامن انك تشتغل سواء بشكل خاص او داخل المراكز والمستشفيات الحكومية
تابع الفيديو للآخر
للإستفسار تواصل على الرقم /01096624767

10/01/2026

الانفصال او الإنشقاق: حالة نفسية بيحصل فيها انفصال مؤقت أو جزئي بين مكونات الخبرة النفسية للشخص
زي الوعي – المشاعر – الذاكرة – الإحساس بالجسم – الهوية.
وببستخدمها العقل لما الإنسان يتعرض لتهديد او صدمه
كمل الفيديو واعرف اكتر عن ال Dissociation

09/01/2026

ناس كتير بتيجي تشتكي من إحساس غريب جدًا:
«أنا ما بقيتش أحس بحاجة… لا فرح ولا حزن، لا حب ولا كره كأن مشاعري بطلت تشتغل »
الحالة دي في علم النفس بنسميها الخدر العاطفي.
الخدر العاطفي آلية نجاة العقل بيستخدمها لما الضغط النفسي يزيد .
الحالة دي بتظهر أكتر عند الناس اللي:
اتعرضوا لصدمات متكررة ورا بعض
عايشين إرهاق نفسي شديد لفترة طويلة
بيعانوا من اكتئاب أو قلق مزمن
المخ هنا بيعمل حاجة ذكية: لما القتال، والهروب، والخوف ما يبقوش نافعِين…
بيختار حل تالت وهو : التجميد العاطفي.
عشان:
يقلل الإحساس بالألم
يخفف الاستنزاف النفسي
ويحافظ على الحد الأدنى من الأداء اليومي
علشان كده الشخص يبان هادي أو طبيعي،
بس من جوه حاسس بفراغ.
لو إنت حاسس بكده، مهم تعرف حاجة: ده معناه إنك نجوت من حاجة كانت أكبر من طاقتك.
إنت مش مستنزف ولا بطلت تحس …
إنت في مرحلة استراحة اضطرارية.
ومع الوقت
ولما توفّر حوالين نفسك بيئة أمان صحية،
المشاعر بترجع…
وبترجع أقوى وأنضج من قبل كدا .
أهم خطوة دلوقتي:
تعرف فين أمانك الصحي، وتروحله.

08/01/2026

لعنة علم النفس!
أيوه… زي ما سمعت
علم النفس أحيانًا بيصيب الإنسان بلعنة.
لعنة الإحساس بأبسط الأوجاع
لعنة اليقظة والتحليل لأبسط الأمور
لعنة التركيز في التفاصيل
لعنة الذكريات الملموسة بكل حاسة من حواسك
لعنة الوجوه المكشوفة قدّام عينيك
لعنة إنك تكون إنسان بتسمع أكتر ما بتتكلم
لعنة إنك ترمّم أكتر ما بتتألم
لعنة إنك تتقبل، أو تتصالح، أو تتعلّم…
وعشان كده
ما تدخلش المجال ده
إلا وإنت عندك القوة الكافية
إنك تستحمل فهمك لكل لحظة وجع عيشتها:
إحساسها كان إيه؟
وعملت فيك إيه؟
وتشوف أوجاعك
في جروح الضحايا اللي هييجوا لك
وتكون — رغم كل ده —
طوق نجاتهم الوحيد…

07/01/2026

حاول تشوف اي اللي ورا احتياجك وعالجه 🥀
انت محتاج تكون أفضل نسخه من نفسك... 🤍