30/12/2025
المسكنات… حل مؤقت ومشكلة طويلة
بعد ما فهمنا إن الألم رسالة من الجسم،
نيجي بقى لأكتر حاجة بنعملها غلط…
إننا نِسَكّت الرسالة بدل ما نفهمها.
أغلب الناس أول ما تحس بوجع،
تقول: مسكن وخلاص.
وجع راس؟ مسكن
وجع ضهر؟ مسكن
وجع بطن؟ مسكن
المشكلة إن المسكن:
بيهدي الألم
يريحك شوية
لكن ما بيعالجش السبب
يعني إيه؟ يعني المشكلة لسه موجودة،
بس إنت مش حاسس بيها.
مع الوقت، الإفراط في المسكنات ممكن يعمل:
تهيج وتآكل في جدار المعدة من غير أعراض واضحة
قرحة ممكن تظهر فجأة بنزيف
ضغط مستمر على الكُلى لحد ما تتعب
صداع مزمن سببه إن الجسم اتعود على المسكن
الأخطر من كده؟ إنك تتعود على الوجع،
وتتعود على الدوا،
وتفتكر إن ده الطبيعي.
خلّيك فاكر: المسكن مش علاج،
المسكن مجرد إسكات مؤقت.
لو الوجع:
بيتكرر
أو بيروح ويرجع
أو محتاج مسكن كل شوية
دي مش علامة قوة تحمّل،
دي علامة إن في مشكلة محتاجة كشف وفهم.
العلاج الصح يبدأ لما نفهم السبب،
مش لما نغطيه.
#مسكنات
#صحة
#طب #قنا
