29/09/2026
" يلا بسرعة.. قوم البس، ولمّ لعبك، وحط الجزمة مكانها، وخد الشنطة…!" كل ده في نفس واحد وبعدين نستغرب ونقول:
"هو احنا بنكلمهم ومش بيسمعوا؟"
بس أحيانًا #المشكلة مش إن الطفل مش بيسمع…المشكلة إننا بنديهم تعليمات أكتر من اللي يقدر عقلهم يعالجها في اللحظة دي.
إيه اللي بيحصل جوه دماغ #الطفل لما يسمع التعليمات دى كلها؟
الطفل عنده حاجة اسمها الذاكرة العاملة، ودي بتساعده يحتفظ بالمعلومة لفترة قصيرة ويستخدمها وهو بينفذ اللى اتطلب منه.
لما نقول للطفل 4 أو 5 أوامر مرة واحدة، خصوصًا لو صغير أو مشتت، ممكن يحصل:
- انه يتوه… يبدأ بأنهي واحدة؟
- انه ينسى بعض التعليمات.
- انه ينفذ أول حاجة ويسيب الباقي.
- انه يتوتر ويحس إن المطلوب منه كتير.
- وأحيانًا يبدأ يرفض أو يعاند.
ويكون الرد مننا
"هو أنا قولت كام مرة؟! ومفيش سمع الكلام"
الطفل ممكن يكون فعلًا مش قادر يحتفظ بكل الكلام اللي اتقال له.
ايه الحل علشان اى تعليمات بنقولها ميحسش الطفل انه واقف على سير جرى باقصي سرعة ومش عارف يوقفة:
بدل:
البس ولمّ لعبك وحط الجزمة وخد الشنطة خلينا نقسم المطلوب منهم
نقول:
قوم البس هدومك
وبعد ما يخلص:
دلوقتي لمّ لعبك.
وبعدها:
حط الجزمة مكانها.
طلب واحد واضح هيدى الطفل فرصة اكبر انه يفهم وينفذ وينجح فيه
وده مش معناه إننا ندلع الطفل أو ننفذ كل حاجة مكانه…
إحنا بس بنساعد دماغه ترتب المطلوب خطوة بخطوة.
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية
