16/09/2026
لما راجل يشتكي إن مراته اتغيرت، بقت عصبية، ردود أفعالها مش زي الأول، وبقيت باردة ومش بتطبطب.. بيستسهل ويلومها هي لوحدها!
بس هل سأل نفسه إيه اللي وصلها لكده؟
ما يمكن فيه تراكمات جواها من سنين طويلة، وهو ساب التراكمات دي تكبر لحد ما قضت على الشغف والأمان جواها.
ما يمكن حست في وقت من الأوقات بخيبة أمل كبيرة، أو إهمال، أو حاجات كتيرة جرحتها وفضلت ساكتة عشان البيت يمشي والعجلة تمشي بدون مشاكل.
أسباب كتير قوي بتكون بسبب "الطرف التاني" وهو مش منتبه..
الحياة الزوجية مش بتبوظ في يوم وليلة، دي تفاصيل صغيرة بتتجمع وتعمل جدار من البرود والعصبية دفاعاً عن النفس.
وزي ما التراكمات دي اتكونت على مدار سنين، مستحيل تتصلح في يوم وليلة.. اللي اتكسر في سنين محتاج وقت وجهد وحب صادق عشان يتصلح. قبل ما تحاسبها على شكلها دلوقتي، حاسب نفسك على اللي وصلتها ليه!
