29/07/2026
طبعا كل سنة بيكون نفس الرأي في الثانوية العامية وايوة هي عامية انا مبحبش الثانوية العامية دي ابدا من ساعة ما وعيت على الدنيا وتغييرات وقرارات كل حد يجي يغير فيها كنا بنسمع في الراديو مدرسة كذا لم ينجح أحد كانت كفيلة انها تقلب معدة الواحد رغم انه كان لسه في ابتدائي أحد اسباب اني جريت على المدرسة وانا فى إعدادى مستحملتش اسمع الراديو ولا استحملت وهما بيقولوا النتيجه في الميكرفون ربنا كان عالم بيا لاقيت اسمي متعلق في لوحة الشرف هديت وارتحت وروحت الثانوي غير مرحلة زفت بكل المقاييس التعب كان فيها واول عملية عملتها في حياتي كان فيها وشد الأعصاب والتوتر كان فيها فأنا مبحبهاش نهائي
عباس محمود العقاد فيلسوف مصر كان معاه الابتدائية
أحمد حلمي ممثل كوميدي معروف ولما طلع دراما وتراجيدي كان ممثل متمكن سقط ٣ مرات في الثانوية العامة
وأهم علماء مصر أهم شوف نتيجتهم
أقولك على حاجه
هتجيب ١٠٠% وهتدخل اللي نفسك فيه وبعدين النجاح في الحياة مش بالثانوي
لما كملت بعد البكاليورس دبلومة واتنين كنت عشان بحب التعليم بس كان استحاله اعيد الثانوية ابدا
لما كملت الماجستير مفيش حد الا ما قالي هتعملي بيه ايه وكان في ناس بتتعمد انها تقولي كلام يضايق ويجرح لمجرد انها شايفه نفسها قليله رغم ان سبحان من انطق الحق ناس كانت بتدافع عني وانا كنت بسكت وبس
لحظة نطق الدرجه في مناقشة الماجستير من أسعد لحظات حياتي
لان الرحلة كانت صعبة اوي اوي اوي
والله الثانوي مش مقياس
ادخل اي كليه وكمل ماجستير ودكتوراه التفوق حلو بس هي مش مقياس
هي حظ
ايوة هي حظ
تبقى مذاكر طول السنة وتيجي تتعب ليلة الامتحان
ليلة امتحان التفاضل والتكامل كنت بلف على الدكاترة
وعمري ما هنسى جملة دكتورة المدرسة انا باجي بدري مخصوص عشان خاطرك لاني كنت بروح اللجنة تعبانه
اعمل شيفت كارير وادخل اي مجال كان نفسك فيه
انا كان نفسي ابقى دكتورة بس بخاف من منظر الدم مش بتحمله فبقيت ثيرابي بروح اشوف المرض تبع انهي نسيج والشعور المسبب ليه ايه وبعد كدا نبدأ نحرر المشاعر المسببة للمرض
ساعدت الناس زي ما كان نفسي اعمل
اشتغلت مدرسة وساعدت الأطفال
وعملت كورسات للمراهقين ومسجله على صفحة المدرسة
ياجماعة اللي عايز يبقى حاجه هيبقى حتى لو الدنيا كلها ضده هيبقى
بلاش ضغط الثانوية دا
أطفال يموتوا نفسهم عشان الثانوي
ابو الثانوي في داهيه
ابنك ولا بنتك اللي راحوا استريحت حضرتك ياريت يلغوها خالص ٣ سنين رعب وبس
بعبع في كل بيت
انا بقيت اخاف أسأل على صحباتي علشان عندهم عيال في ثانوي حتى ابسط حاجه بقينا نخاف نعملها علشان الثانوية الزفت
هونوا على الأطفال
التعليم كله في ذمة الله
عارف يعني ايه تسأل ناس متخرجين من الكليات أسئلة بسيطة عن تاريخ مصر ميعرفوش
أسئلة في جغرافية مصر البلد اللي عايشين فيها ميعرفوش
النت بدل ما يبقى مرجعية ومكتبة ننهل منها بقى تيك توك ومهرجانات
فمتقولش تعليم لان مبقاش الا من رحم ربي
كل سنة بقول مش هكتب حاجه وبردوا الاقي اخبار تخلي الواحد يقول ملهاش لازمة لا الثانوي ليه لازمة ولا حتى البكاليورس ولا الليسانس
لو مثقفتش نفسك ملهاش لازمة لو معلمتش نفسك ملهاش لازمة لو موصلتش لحلمك ووقعت ومعملتش لنفسك حلم جديد ملهاش لازمة
بس خليني اقولك ايه ليه لازمة
انت
حياتك
انت ليك لازمة
الحياة لسه فيها كتير
ربنا يحفظكم
دمتم طيبين
