عايزة ورد يا ابراهيم

عايزة ورد يا ابراهيم ازاي تحب صح و تقدم احتياج مش عطاء هتتعلم ازاي تتعامل مع سيكولوجيات البشر المختلفة

هو ليه كل النوعية اللي بقت موجودة في سوق (الرجالة) بقت مضروبة كده و بقي الصنف كله يسد النفس (ذكور متخلفين و أشباه رجال )...
03/03/2026

هو ليه كل النوعية اللي بقت موجودة في سوق (الرجالة) بقت مضروبة كده و بقي الصنف كله يسد النفس (ذكور متخلفين و أشباه رجال )
ما بين اللي عاوز يتسلي و ابن امه و قليل الادب و الحرامي و اللي عايش علي قفا الست اللي معاه و عديم الشخصية و الواطي و اللي بيوعد وعود اكبر منه و اللي يبيع نفسه عشان الجنيه و اللي مش عاوز يتحمل المسؤولية و اللي عاوز خدامة مش زوجة و اللي بيمارس ذكورته المريضة بالضرب و الإهانة و الصوت العالي ... الخاين و بتاع مصلحته و اللي ميعرفش البنت إلا في الازمة و يحتاج سندتها في الوقت اللي المفروض هي تتسند عليه و مع ذلك عمره ما بيشكرها بالعكس دائما مطلعها في اوحش صورة و بينهش سيرتها في اي فرصة و اللي بيستنفذ و يستغل قوة الست اللي معاه بكل الطرق و بعد ده كله يستبيح حقها و يستبدها و يستعبدها و يستخدمها كوسيلة رخيصة في الوصول لمشتهياته
و بعد كل ده يرميها زي الدبيحة خائرة القوي بعد ما اخد منها كل اللي هو عاوزه
مش مجرد مشاهد او شخصيات في مسلسلات دي مراية للواقع و موجودة فعلا في المجتمع و بقت زي الوباء
ليه مبقاش في راجل بجد عاوز يحب و يتحب و يقوم بدوره الحقيقي و يكون امان البنت اللي معاه و امين عليها و ليه مبقاش اي تقدير للمشاعر و لا لحظة تفكير واحدة في البنت اللي حبتك و اتعلقت بيك و اخدت وقتها و مشاعرها و قلبها ليك لوحدك
ما تسترجلو شوية بقي يخربيتكو و لا الرجالة ماتو في الحرب بجد ولا ايه منكو لله
محتاجين نعمل اختبارات قبول زي الكليات العسكرية و يبقي الجواز برخصة للمؤهلين زي السواقة كده بالضبط بدل ما نبقي عبارة عن مجتمع مريض عقيم الفكر بينجب مرضي
الذكور و أشباه الرجال يمتنعون

26/08/2025

عارف ليه الست بتتعب و تتوجع اوي لما تسمع كلمة انتي طالق رغم أنها ممكن تكون هي اللي طلبتها و الحت عليها
كل مرة بتحس فيها انك غريب عنها و هي مش عارفة انت مين بيبقي جواها شعور بالانخداع فيك و رفض الشكل اللي انت عليه دلوقتي
لما بتقولك ابعد عني هي مش عاوزاك تبعد عنها هي عاوزة الشخص الغريب اللي طلع منك فجأة يختفي و يرجع الحبيب و الاب و الزوج و الاخ و الصديق اللي هي شافتهم فيك من البداية
مش بتحطك في اختبار عشان تيجي انت بعدها تقول ماهي اللي اضطرتني لا هي في كل مرة بسألك هو انا بالنسبالك ايه روحك و حياتك و نسمة الأكسجين اللي بتتنفسها زي ما كنت بتقولي ولا انا حاجة عادية هتكسرها و تخسرها و توجعها لما تبيعها بالرخيص بيبقي بين قلبها و عقلها رهان عليك قلبها بيقول انك مستحيل تعمل كده مستحيل تسيبها تمشي و عقلها بيقولها حسب رؤيتي أن المستحيل ممكن
لما بتقولك هو انت لسة بتحبني فترد عليها تقولها هو انتي مجنونة يعني انتي مش عارفة
لا هي مش مجنونة و عارفة بس محتاجة تتأكد لان في حاجة شافتها منك بتقولها أنك لو بتحبها مكنتش عملت كده
فهي محتاجة تسمع منك تجديد للعهد اللي بينكم ولو بكلمة
لما بتقولها انتي طالق انت بترميها من سابع سما ل سابع ارض بتحسسها قد ايه هي ولا حاجة بالنسبالك و بترخصها في عين نفسها و لا يمكن هتنسي الشعور ده لأنها حسته منك انت الست تقبل كل أنواع الرفض تقبل أنها تترفد من شغلها تتخان من صاحبتها تتخذل من أهلها لان كل دي حاجات يمكن الظروف هي اللي فرضتها عليها لكن اختيارها ليك مكنش فرض ده كان حلم بتوصله لما تبقو مع بعض فاصعب انواع الهجر هو أنها تحس بالرفض من الإنسان اللي حبته بكل طاقتها و كأنها كانت مفروضة عليه و ما صدق أنها تحطه ما بين خيارين اما تسيبني او تبينلي انك بتحبني و كطبيعة معظم الرجالة بيختار الخيار الاسهل و هو انه يسيب و يجري
شعور ال ( مع السلامة ) يعني مكنتيش فارقة وجودك زي عدمه
و للأسف زي ما قالت الفنانة وردة في اغنيتها بودعك و بودع الدنيا و كأنك موت و موتني بالحيا بودع معاك أمان كان نفسي أفضل عايشاه باقي عمري بودع معاك احساسي بأني مطمنة و انا جنبك
بودع كل لحظة حلوة انا عشتها معاك و حتي لو انا اللي كنت بخلقها بودع مشاعري اللي اكتشفت انها بالنسبالك ولا حاجة و بودع الحب اللي كنت بحبهولك
و بودع معاك محاولاتي عشانك و قد ايه كنت مبسوطة و انا بعمل ده مع إنه المفروض أنت اللي تاخد الخطوات اللي كنت باخدها و ياريتك قدرت كل ده
حسستني اني رخيصة في عين نفسي قبل ما اكون رخيصة في عينك مع اني والله غالية و انت متقدرش علي سعري تواضع الملكات لا ينقص من كونهن ملكات بل يزيدهن وقارا و حبا لمن يفهم
شكرا انك مشيت و سبتني و سبت مكانك لحد يستاهله و سبت قلبي للي يستحق انه يتشال فيه
كل ما افتكر انك بتوحشني هفتكر قسوتك و جفاك و هفتكر قد ايه انت مكنتش تستاهلني كل ما افتكر اني خسرت وقت و مشاعر و طاقة معاك هفتكر ان ده تمن اني اتعلمت درس و إني في النهاية كسبت نفسي
كل ما افتكر انك دوقتني طعم المر هفتكر أن ربنا جبار و مش ظالم و هيدوقني طعم السكر هو بس كان بيعرفني الفرق عشان لما يجي السكر اعرف انه العوض عن طعم الملح
كنت مراهنة نفسي عليك و إنك مش زي غيرك بس للأسف طلعت زيهم و يمكن اكتر امنتك عليا و كنت بقولك في كل مرة ارجوك متبقاش زيهم و كنت بقولك اللي عملوه فيا عشان انت متعملهوش بس للأسف عملت اكتر من توقعاتي و اكتر من كل اللي قبلك عملوه لأنك كنت أقربهم لقلبي طعنتك نفذت و أصابت
طلعت زيهم كلكم مصطفي ابو حجر

13/08/2025

بهاء سلطان عنده اغنية بيقول فيها
و كان مفروض محبكش و لو حبيت مبينش
كمية المشاعر المختلطة في الجملة دي كبيرة جدا
احساس الندم انك وصلتني اني اقول ياريتني ما حبيتك عشان حبك ده كان سبب في جراح كتيرة و كبيرة
احساس القوة ماهو مكنتش هفوق لنفسي و اقدر اقولك كده في وشك إلا لو انا قوي
احساس التخطي انك كنت مرحلة في حياتي و خلاص عدت بس و هي بتعدي خبطتني جامد جدا
احساس انك مكنتش تستاهل و كأني بقولك كنت انت رخيص و انا غليتك هو فعلا كده كنت انت رخيص و انا غليتك لما بينت اني بحبك و مهتم بيك
و يجي بعد كده بهاء يكمل و يقول و ليه طيب
ليه اتجرح ليه ابقي مع حد ميقدرنيش ليه اتعب كده و تخليني في حيرة و اسأل نفسي هو انا ليه حصل فيا كل ده و ليه وصلت لكده و هو انا عملت ايه غلط عشان يحصل معايا كده
فتيجي الإجابة و هي محزنة و مخزية و مخجلة جدا الحقيقة فيقول عشان طيب عشان يعني اللي في قلبي علي لساني
و هنا الصدمة انا كنت طيب مع حد ميعرفش يعني ايه طيبة مكنش يستاهل يشوفها مني من الأول عشان ترن في دماغي هنا جملة بتقول و ما جزاء الإحسان إلا الإحسان بس ده لما يكون الشخص اللي بتقدمله الإحسان ده سوي نفسيا و يقدر يحس بيك و باللي بتعمله عشانه
و يجي بهاء يكمل في نفس الجملة و كأنه بينزف هزيع الدم الأخير و كأنه لاخر مرة هيعاتبه فبيقوله بتكسرني و تخسرني بتخسر حب مش سهل تلاقيه تاني
كسرت كل حاجة حلوة كانت جوايا ليك بإيدك خسرت قلب حبك و كان شاريك
و ادينا قاعدين و مش هتعرف تلاقي حد يحبك زي مانا حبيتك و الأيام بينا
هانت عليك العشرة و كان الفراق للدرجادي سهل دانت حسستني اني رخيص اوي بس لا انت اللي مكنتش تستاهل انا اللي عملتلك سعر و اشتريتك بالغالي و انت رخيص معرفش كان عقلي فين ساعتها
اغنية تخليك تلعن الحب و تحسسك انك كنت صغير اوي في عين اللي قدامك بس اوعي تشوف نفسك بعينه لأنها عين عميا مش بتشوف
انت قدمت الخير لحد ميعرفش غير المكر و السكك العوجة حد ارادته مش ملكه
حد ميستاهلش يتحب مشاعره باردة و قلبه متجمد و مع ذلك حسسك انك انت الغلطان و الناقص و اللي معرفتش تفهمة و تحتويه
حد يشكك في نفسك و عاوز يهدم ثقتك في كل تصرفاتك و اختياراتك و كل عيبك انك حبيته و عاملته بطيبة و حنية
و يجي يكمل و يقول و دلوقتي خلاص همشي انا و قلبي اللي دايب فيك
يعني خلاص يا معلم خسرتني للأبد بس و انا بقولك انك خسرتني كان نفسي تمسك فيا شوية تحسسني اني عملت اي حاجة واحدة صح في العلاقة دي اني مكنتش كل الوقت ده مخدوع و تحسسني اني للدرجادي كنت غبي
عشان كده كان كوبليه البداية اني خلاص فهمتك انت بقيت مفضوح قدامي من كل اتجاه فبقولك بقي نظرتي عن الموضوع كله فبيقول
و انا غلطان عشان حبيت و بينت اهتمامي بيك عشان كده يعني بقيت منفعش و من نظرك نزلت مبقتش لايق ليك
مش هو ده اللي انت عاوز تسمعه انا بقي هرضي غرورك مش كنت عاوز تسمع اني غلطان طيب يا سيدي انا غلطان فعلا بس اسمحلي اقولك بقي انا غلطت في ايه دانا غلطت لما شوفتك بني ادم و تستحق كل اللي عملته عشانك معلش سامحني كان نظري ضعيف ساعتها و عشان كده فعلا انت عملت فيا جميل كبير لما حسستني اني منفعش ليك لاني استحق اني اللي اعمل عشانه كل ده يحسه و يقدره و يفهمه و يببن قد ايه هو ممتن لكل خطوة انا باخدها ناحيته
انا مكنتش غلط انت مكنتش تستاهل

خليكو فاكرين ان قطر التضحيات آخره محطة اسمها محدش طلب منك تعمل كل ده

11/08/2025

تفتكروا ايه اللي وصل يسرية انها بعد سنين الكتمان تصرخ بأعلي صوت و تفضح مشاعرها و تقرر أخيرا انها تطلب الاهتمام
فتقول عايزة ورد يا ابراهيم
هل السبب هو اللي قاله ابراهيم فعلا و هو ظهور أصحابها البنات سلمي و ضحي في حياتها من تاني ولا سبب تاني
الإجابة انه اكيد سبب تاني
و هو انها خلاص دبلت من قلة الاحساس و من قلة التقدير كل مرة كانت بتلمح من بعيد كانت النهاية بتكون انها ام لطفل جديد
و كأنها بتقوله انا تعبت منك من كتر ما كل مرة انا اللي بحب و بقدم لحد ما نسيت اني ست و ليا احتياجات غير اللي انت فاهم اني عاوزاها خالص
فكرت في مرة انك تحتويني و تحسسني انك سند و ضهر بجد فكرت مرة انك تقولي كلمة حلوة
فكرة مرة تهتم بيا بشكلي بلبسي بلون شعري
فكرت مرة تغير الروتين اللي انت ماشي عليه في حياتنا
فكرت مرة تسألني هو انا عاوزة منك ايه او عاوزة احس بأيه و انا معاك
فكرت مرة تعدي عليا في المدرسة و تاخدني من هناك زي اي بنت مراهقة الولد اللي بيحبها بيعمل معاها
فكرت مرة تعملي مفاجأة و تجبلي حاجة لمحتلك انها نقصاني
انا تعب يا ابراهيم و نسيت انت مين نسيت انك راجل و اني ست بقيت حاسة اني شبهك من كتر مانا بعمل اللي المفروض انت تعمله و كاتمة جوايا حاجات مش هتعرف تعملها و مينفعش حد يعملها غيرك حاجات مش زي اي حاجات مش هعرف اعملها لنفسي
كل ده كان كلام و أحاسيس مكبوته و مكتومة جوا يسرية
لما قالت عايزة ورد يا ابراهيم كانت بتقوله ما تيجي نرجع زي زمان لما كنا مخطوبين نرجع راجل و ست طبيعين
رجع الزمن و ذكرياته و لو قدرت ترجعني معاه و ترجعلي انوثتي و احساسي اعمل ده
خليني احس اني لسة حلوة في عينك و مرغوبة ارجع زي زمان لما كنت تيجي تتقدم و تترفض و ترجع تتقدم تاني حسسني اني لسة الهدف اللي انت عاوز توصله
متحسسنيش في يوم اني تقيلة عليك و ترخصني في عين نفسي
كل ده كان بركان موجود جوا يسرية و عايزة ورد يا ابراهيم كان آخر إنذار قبل الانفجار اللي بتقوله بعده انت كده خسرتني للأبد و بعدها مبقاش ابراهيم فارق معاها و خرجت من غير ما تقوله لان رجولته سقطت من نظرها و سافرت من غير ما تحس باي ذنب و حتي لما هددها بالطلاق مفرقش معاها تهديده
بل بالعكس لما حست إن صك العبودية هو التهديد ده قالتله طلقني و طلق معايا الحرية
سبني ادور علي نفسي القديمة يمكن اعرف الاقيها

10/08/2025

تحاليل ما قبل الجواز بتبين الجينات و فصيلة الدم و الأمراض الوراثية
و ده يقولكم اذا كنتو تقدرو تتجوزو و يبقي في توافق جيني بينكم ينتج عنه اطفال اسوياء ولا لا
لكن مع الأسف الشديد التحاليل دي مش بتبين الراجل ضعيف الشخصية او بالبلدي كده ابن امه مش بتبين المتسلط و القاسي و البخيل في مشاعره و كلامه قبل فلوسه و اللي عنده خلل في شخصيته مش بتبين المهمل و اللي مش عارف حتي يشيل مسؤولية نفسه مش بتبين الفاشل و اللي بيغير من نجاحك مش بتبين العصبي اللي بيتشال و يتهبد علي الصغيرة قبل الكبيرة
مش بتبين المتدلع اللي عاوز يتخدم و بيشوف البنت مجرد جارية اشتراها بفلوسه
في نفس الوقت مش بتبين البنت الضعيفة اللي هتاخد علي دماغها و تسكت مش هتبين تشوهات شافتها في حياتها و هي صغيرة تخليها شافت فيك الأمان و انت اللي هتبقي مصدر تعاستها اصلا مش هتبين قد ايه هي تعبانة من قلة الحب و الاحتواء و شافت فيك حلم معين مش هتبين قد ايه البنت دي بتتعرض لتعنيف من أهلها خلاها تشوفهم سجن و تشوفك انت الحرية مش هتبين قد ايه البنت دي عاوزة تجري لحياة جديدة لمجرد انها حاسة انها افضل
كمان التحاليل دي بتتنبأ بجينات و فصيلة دم أطفالكم
بس مش ممكن تتنبأ بمستقبلكم سوا بحياتكم مع بعض بالازمات و المشاكل اللي هتمر عليكم بهل هتبقو اب و ام كويسين ولا لا هل ولادكم هيحبوكم ولا لا لا هتعرفو تربوهم كويس ولا لا هل هيحبوكم و يشوفو انكم احسن اب و ام في العالم ولا لا هل هيكونو بارين بيكم ولا قاسين عليكم
كل دي حاجات متقدرش التحاليل ولا غيرها انها تبينها عشان كده بنقول احسنو الاختيار مش كل واحد شكله راجل ينفع زوج و اب و مش كل واحدة شكلها ست تنفع تكون زوجة و ام
محتاجين نعمل اختبار لياقة لكل واحد و واحدة عشان نعرف اذا كان فعلا قادر يكون زوج حنين و اب سوي ولا لا و نعرف اذا كانت هتبقي زوجة مدبرة و حكيمة و ام مربية و فاضلة و لا لا
محتاجين الجواز و الخلفة يكونوا برخصة لان مش كل واحد شكله راجل هو راجل مش كلهم يستحقو يكونو أزواج و إباء و أرباب أسر
مش كل ست شكلها ست هي زوجة و ام ناجحة و تستاهل تكون زوجة و ام
اختارو صح لان الضريبة هي العمر كله و هنتحاسب علي نفسنا و علي ولادنا اللي ظلمناهم معانا لما اختارنا اختيار غلط من الأول و هنفضل طول الوقت الباقي من عمرنا ندفع التمن و مش بعيد ولادنا كمان يكملو المسيرة من بعدنا و يدفعو هما كمان التمن نتيجة غلطة و اختيار مكنش مناسب
فتحو عينكو و اوعو تغمضوها عن أي عيب تشوفوه في شريك حياتكم و طول مانتو علي البر حتي لو قبل الفرح بساعة و حسيتو ان الاختيار غلط ارجعو و إياكم تكملو و طز في الناس الناس مش هتنفعكم بعدين الوحش منهم هيتكلم عنكم و الكويس فيهم هتصعبو عليه لكن حياتكم و اختياركم انتو اللي هتدفعو تمنه كان صح او كان غلط
دمتم في سلام و أمان

09/08/2025

الجواز هو عربية محتاجة بنزين و عجلات عشان تمشي عمرنا ما شوفنا عربية ماشية من غير بنزين او عربية ماشية من غير عجل
من اول ما تدور العربية لحد ما الموتور يسخن و البنزين يتحرق فالعجلات تمشي في ميكانزم و سيمفونية بتحرك العملية دي كلها من البداية للنهاية لو فتحت كبوت العربية هتلاقي حاجات كتير و كلها متوصلة ببعض
زي الاهتمام انك تهتم بنضافة العربية وتغير الزيت و تزود البنزين و تعمل الصيانات في معادها عشان تفضل العربية كويسة طول الوقت
و الاحتواء انك تحتويها و لما تسخن منك علي الطريق تقف علي جنب كده و تفصلها و تستني عليها شوية و متجيش جنبها بمياة باردة عشان متبوظهاش
و الاحترام انك تحترم انها خلاص مبقتش قادرة تمشي دلوقتي فتستني عليها و تاخدها عند التوكيل بتاعها عشان يصلحهالك مع انه ممكن يقولولك ده سوء استخدام مش سوء صناعة فتدفع حبة فلوس زيادة عشان يغيرولك حاجة انت اللي بوظتها
و الحوار انك تعرفها و تعرف ايه اللي بيخليها تزرجن معاك و تعمل اصوات عالية و مزعجة و تصاحبها فتبقي فاهمها كويس و تفهم كل إشارة هي بتديهالك معناها ايه و ليه
و الحب انك تحبها لأنك طول مانت بتحبها عمرك ما هتجرحها او تزهق منها و لا عمرك هتبص علي عربية غيرها و تقول ياه لو اسيب دي و اشتري غيرها مع انها هي اللي شالتك في اوقات صعبة كتير مرت عليك
و الحنية انك متقساش عليها و تحملها فوق طاقتها و تخرج بيها في طرق صعبة و مسافات طويلة و من وقت للتاني تغيرلها كاوتش او تجيبلها غطا جديد
بالنسبالي انا الجواز زي العربية لان العربية منظومة كاملة متحركة و اللي جوا الكبوت دي المشاعر اللي اتخلقت من خلال الحب و عشان كده كلها متوصلة ببعض
الراجل هو الكاوتشات او العجل لانه هو اللي مسؤل ان العربية او الحياة تمشي و تستقيم
اما الست فهي البنزين اللي طول ما هي موجودة في البيت البيت منور و طول ما في بنزين في العربية العربية تمشي بأحسن كفاءة اطمنو كل شوية علي صحة الموتور اللي هو الحب يعني
و لو لقيتو الزيت اللي هو حواركم مع بعض قليل او بدأ يتحرق غيروه بسرعة بنوع جديد و نضيف
و لو ماية الريداتير اللي هي مشاعركم تجاه بعض قلت زودوها و حافظو علي درجة حرارة معتدلة في العربية عشان متسخنش و تعطل و توقف بيكم في وسط الطريق
إياكم و ركنة العربية فترة طويلة لان الهجر و الصمت بيأثر علي البطارية و يخليها تبوظ و شحنها بيبقي صعب و غالي دائما خلو في حياتكم اهتمام بكل التفاصيل و إياكم تهملو بعض او يعدي يوم عليكم من غير كلام اي كلام حتي لو خناقة صغيرة بس المهم تخلص و انتو متصالحين
الجواز هو شركة بين اتنين و لازم الاتنين يمولو الشركة دي عشان تفضل شغالة راس مال الشركة هو الحب و الباقي مكملات بس مهمة عشان الشكل يطلع مريح للعين و جميل و معني انها شركة يعني في شراكة من الاتنين في كل حاجة و في المكسب و الخسارة
زي ما مراتك بتساعدك في مصروف البيت بشغلها انت كمان تساعدها في شغل البيت بمجهودك ولازم تربو ولادكم سوا مينفعش الأطفال يبقو أيتام و ابوهم و امهم عايشين مينفعش حد واحد بس يقوم بالدورين مع بعض مينفعش حد يرمي المسؤلية علي التاني مينفعش تنسو ان العربية فيها فرامل و لازم تبقو حافظين مكانها كويس عشان لما تبقي الأمور مش تحت السيطرة تدوسو عليها و توقفو العربية قبل ما تحصل كارثة دائما كونوا بُطاء في الغضب و لما تحس انك خلاص قربت علي النهاية دوس علطول علي الفرامل
اللي عمل العربية عمل فيها دواسة واحدة للبنزين و دواسة و دراع للفرامل و ده يعملك انك تصبر و متتسرعش في حكمك علي الطرف الآخر الا لما تتأكد انك عامل اللي عليك و تديله فرصة يدافع عن نفسه و يبقي في اهتمام و احتواء و احترام و حوار و حب و حنية بينكم و بين بعض
دمتم في سلام و أمان

29/05/2025

عايزة ورد يا ابراهيم
الحقيقة ان الجملة دي مش بالسذاجة اللي اتقالت بيها و كلنا استقبلناها علي انها جملة تافهة و ملهاش لازمة
يسرية لما طلبت الورد مكنش مجرد طلب لرفاهية إنما كان طلب بتطلب فيه أنوثتها و تقدير مشاعرها اللي دبلت من قلة الاهتمام كان طلب ان الاحساس اللي مات جواها يصحي بقبلة حياة من ابراهيم كان أول صرخة بعد سكوت طويل اوي نيمت فيه كل احساس حلو جواها و كل أمل انها تعيش حياة زوجية سعيدة زي اي واحدة ست من حقها تعيش و تحب و تتحب بجد و كان آخر صرخة قبل ما تعلن التمرد لان كل احساس جواها مات لدرجة انها فقدت احساسها بأنها ست
بتقوله لآخر مرة قدرني افهمني اسمعني رجعلي الحياة من تاني
و هنا اسمحولي اقول ان المشهد معبر جدا و ردها علي كلامها بصوته كان عبقري
متقوليش نص كيلو كباب احسن منه و ده ينقلنا لحاجتين و هما صلب المشهد و اتعبر عنهم بمنتهي الحرفية
عايزة ورد يا ابراهيم بص لمشاعري و قدرها حبني بطريقة مختلفة متقوليش ان نص كيلو كباب احسن منه بلاش كل مرة تتجاهلني و تبص بس لطلبك و غريزتك و اني مجرد مُفَرِغ لشهواتك
حاول تحطني معاك في فريم واحد حسسني اني لسة زي مانا لسة هدف بتحلم انك توصله مترخصنيش في عين نفسي اكتر من كده
سيبك من اللي انت بتعرف تعمله و متقدرش تعمل غيره و حبني بطريقة مختلفة دي طريقة من طرق التعبير بس مش كل التعبير المفروض دي تكون نهاية لطريق طويل كله متعة و حب للاسف بتكون بداية و نهاية في نفس الوقت و ما بينهم طز في يسرية و مشاعر يسرية و احساس يسرية و كينونة يسرية كبني أدمة و ليها حقوق زي اللي عليها و اتحولت يسرية لمجرد أداة في ايد ابراهيم و شهواته و بقت زيها زي نص كيلو الكباب اللي بياكله بتلذذ عشان يشبع من غير ما يدي الكباب حقه و يغمسه في الطحينة
في الناحية التانية رد فعل قد يكون طبيعي جدا من ابراهيم قابل ده ببرود لانه في عين نفسه مش مقصر ورد ايه و بتاع ايه و كمان قالها عاوزة ايه تاني انا مش بعرف اعمله يا يسرية لانه في عين نفسه بيعمل كل ما هو يخليه يفضل راجل في عينه و طز في نظر يسرية و هو ايه بالنسبة ليها و لخص رجولته كلها في كام حاجة المفروض ان كل راجل بيعملها المشكلة بقي هنا ها و بعيدين فين التمييز يعني هتحبك ليه يسرية يا ابراهيم لو انت زيك زي كل الرجالة ماهو لازم يبقي عندك حتة زيادة عشان تبقي بطلها و احسن راجل في نظرها
يبان طلب تافه عايزة ورد يا ابراهيم لكن ببساطة هي دي الست مش كائن تافه زي ما انتو عاوزين تفهموا لا كائن رقيق يمكن إرضاءه بكلمة او نظرة تقدير او احساس بدورها او وردة هتدبل اه بس تأثيرها في نفسية و مشاعر يسرية عمره ما هيزول ابدا و نفس لذة ابراهيم بالكباب هي لذة يسرية بالورد و يمكن اكتر و الاتنين مصيرهم واحد و هو الهلاك الورد هيدبل و الكباب هيروح لمكانه الطبيعي بعد الاكل الاتنين مصادر للذة بس مش عارف ليه دائما ابراهيم مصر انه يقدم لذته علي لذة يسرية و عمره ما فكر و لو مرة ان من حق يسرية تحس بلذة الورد زي ما هو بيحس بلذة الكباب
الكباب لسة مخلصش قصدي الكلام و لسة لينا قعدة تانية عشان نشوف يسرية عاوزة ايه غير الورد اللي مكنش مقصود بيه الورد أصلا

Address

Cairo

Website

Alerts

Be the first to know and let us send you an email when عايزة ورد يا ابراهيم posts news and promotions. Your email address will not be used for any other purpose, and you can unsubscribe at any time.

Shortcuts

Share

Category