17/08/2026
قالولى يا دكتور صديد البول بيأخر الحمل وبيحرق الحيوانات المنوية!
المعلومه دى طبعا غلط تعالى اقولك الحقيقه اية
كتير من السيدات لما تحليل البول يطلع فيه صديد، بيتقال لها:
"ده سبب تأخر الحمل"
"الصديد بيحرق الحيوانات المنوية"
لكن علميًا الموضوع مش كده
صديد البول غالبًا معناه وجود كرات دم بيضاء في البول، وممكن يكون بسبب التهاب في المسالك البولية، وأحيانًا العينة نفسها تكون ملوثة بإفرازات مهبلية.
التهاب المسالك البولية مش موجود جوه المهبل أو الرحم، وبالتالي الحيوانات المنوية مش بتدخل المثانة علشان الصديد "يحرقها"
والـ UTI العادي مش من الأسباب المعروفة لتأخر الحمل عند السيدات.
لكن هنا لازم نفرّق بين حاجتين مهمين:
التهاب المسالك البولية UTI
وده غالبًا مالوش علاقة مباشرة بالخصوبة.
والتهابات الجهاز التناسلي، خصوصًا بعض العدوى المنقولة جنسيًا زي Chlamydia وGonorrhea، واللي لو سببت التهاب بالحوض والأنابيب، ممكن فعلًا تؤثر على الخصوبة.
يعني لو في تأخر حمل، مش كل ما نلاقي pus cells في تحليل البول نقول:
"أهو لقينا السبب!" ده غلط
فى اسباب علميه و حقيقية لتأخر الحمل زي
التبويض، الأنابيب، الرحم، مخزون المبيض، وتحليل الزوج… حسب كل حالة.
أما وجود أعراض بولية أو صديد واضح؟
ده مرض عادى و بيتم تشخيصه و علاجه ، وأحيانًا مزرعة بول لو الحالة تستدعي بعيدا تماما تماما عن تأخر الحمل
الخلاصة:
صديد البول محتاج تقييم وعلاج لو فيه التهاب…
لكن مش معنى وجوده إنه بيحرق الحيوانات المنوية أو إنه سبب تأخر الحمل.
المعلومة الصح جزء مهم من العلاج
د. محمد الشيخ
استشاري أمراض النساء والتوليد والحقن المجهري وجراحة المناظير
