مستشفي دكتور احمد ابو العز للطب النفسي والتأهيل وعلاج الادمان

05/09/2026

أنا مش هضعف… أنا بس هختبر نفسي!

أوقات بعد فترة من التعافي، ممكن الشخص يحس إنه بقى أقوى من زمان، وإنه خلاص يقدر يتحكم في نفسه مهما حصل.
وهنا ممكن يقول لنفسه:
➤ أنا مش هضعف.
➤ أنا بس عايز أشوف نفسي هتصرف إزاي.
➤ أنا عايز أتأكد إني فعلًا كرهت التعاطي.
➤ أنا هقابل أصحابي القدامى ومش هتأثر.
➤ أنا ممكن أشوف المخدر قدامي ومش هاخده.

شكلها ثقة… لكن أوقات بتكون فخ نفسي خطير. لأن الشخص هنا بيحاول يثبت لنفسه إنه بقى قوي، عن طريق إنه يقرب من الحاجة اللي كان أصلًا بيحاول يبعد عنها.

لكن السؤال، ليه أختبر نفسي بحاجة ممكن تضرني؟
التعافي مش امتحان لازم تنجح فيه قدام المخدر أو قدام أصحابك القدامى. ومش لازم تشوف المخدر قدامك علشان تعرف إنك مش عايزه. ومش لازم ترجع لنفس الأماكن علشان تثبت إنك اتغيرت. لأن مجرد الاقتراب من مواقف التعاطي القديمة ممكن يحرّك ذكريات ورغبات مرتبطة بالتعاطي، حتى لو كنت مقتنع إنك خلاص تجاوزتها.

ممكن تبدأ الحكاية بجملة:
أنا بس هروح… مش هاخد حاجة.
وبعدها:
أنا بس هقعد شوية.
وبعدين:
أنا مسيطر.
وهنا الخطر إن كل خطوة ممكن تخلي الخطوة اللي بعدها أسهل.

علشان كده…كن ذكيًا… مش قويًا.
مش مطلوب منك تثبت إنك تقدر تقف قدام الخطر من غير ما تقع. المطلوب إنك تعرف الخطر من بدري… وتختار تبعد عنه.

واسأل نفسك، هل أنا فعلًا محتاج أختبر نفسي؟
ولا أنا محتاج أحافظ على كل اللي تعبت وبنيته؟

افتكر إن القوة مش إنك تقرب من النار وتقول مش هتحرقني…
القوة إنك تعرف إنها ممكن تحرقك، فتختار تبعد.

أ. جهاد صبري
أخصائي نفسي إكلينيكي ومعالج إدمان

05/09/2026

في الثامنة مساء - يومي السبت والثلاثاء

04/09/2026

تعاطي المواد زي المخدرات، أو الكحول، أو الأدوية بيتسبب في مشاكل الصحة النفسية والإضرابات العقلية، وهي إضطرابات بتتطور عند الناس اللي مكنش عندهم مشاكل صحية نفسية قبل تعاطي المواد الإدمانية، ومن ضمن الأضطرابات دي:-
- اضطراب ذهاني وبيسبب الهلوسة أو الأوهام خلال شهر من التعاطي أو من الانسحاب.
- اضطرابات ثنائية القطب وبتسبب أعراض الهوس أو الاكتئاب خلال فترة التعاطي أو الانسحاب.
- اكتئاب بيحصل بعد تعاطي المواد، وغير مرتبط بالتسمم أو الانسحاب.
- اضطرابات القلق وبيسبب نوبات قلق أو هلع مرتبطة بتعاطي المواد.
- اضطرابات الوسواس القهري وبيسبب أعراض قهرية ممكن تأثر على حياة الشخص اليومية بسبب تعاطي المواد.
- اضطرابات النوم وبيسبب مشاكل في النوم زي الأرق .
- اضطرابات جنسية بتسبب صعوبات في الرغبة أو الأداء الجنسي.
- أعراض الهذيان نتيجة التسمم بمواد مخدرة أو كحول أو أدوية.
- الاضطرابات العصبية المعرفية ضعف في القدرات المعرفية بيستمر بعد انتهاء فترة التسمم، خاصة اللي بتنتج عن المنشطات زي الميثامفيتامين والكوكايين.

لو أنت أو حد بتحبه كان بيعاني من اضطراب تعاطي المواد، ففي علاجات فعّالة متاحة تقدر تساعد. ودايمًا الخطوة الأولى بتكون إنك تتكلم مع الطبيب النفسي عن خيارات العلاج المناسبة ليك. لأن احتياجاتك العلاجية والتعافي بيختلفوا وفقًا لطبيعة وشدة التعاطي.

حياتك أولوية💙

01/09/2026

لما العلاقات القديمة تبقى خطر على التعافي

العِشرة لا تهون إلا على ولاد...
مثل شعبي قديم اتربينا عليه، ومعناه إن الإنسان الأصيل ما ينساش اللي عاشوا معاه أيامه الصعبة، ولا يتخلى عن الناس بسهولة.
وده معنى جميل جدًا في العلاقات…
لكن في رحلة التعافي، أحيانًا نفس الفكرة دي ممكن تتحول إلى فخ نفسي.
الشخص يبدأ يقول لنفسه:
⬅️ده صاحبي من زمان.
⬅️ده وقف جنبي في وقت صعب.
⬅️مينفعش أسيبه دلوقتي.
⬅️أنا مش شخص جاحد.

والحقيقة إن المشكلة مش في تقدير العِشرة… ولا إن الشخص لازم يكره أصحابه أو ينسى الماضي.
لكن السؤال الأهم:
هل العلاقة دي بتساعدني أحافظ على التعافي ولا بتعرضني للخطر؟

وهنا ممكن يبدأ صوت الماضي يناديك .. إيه يا عم المقاطع؟ العِشرة تهون برضه؟ تعالى نقعد القعدة القديمة ونتكلم شوية!
في اللحظة دي، القلب ممكن يحن… والعقل يبدأ يلعب لعبة خفية جدًا ويقولك يا عم عادي… روح اقعد معاهم شوية. أنت خلاص بقيت جامد ومسيطر. هي مجرد قعدة وكوباية شاي… والعِشرة برضه ما تهونش!

لكن هنا لازم نقف ونسأل نفسنا، هل هي فعلًا مجرد قعدة؟ ولا ممكن تكون أول خطوة ترجعني لنفس الطريق اللي تعبت عشان أخرج منه؟
لأن أحيانًا الانتكاسة مش بتبدأ بمخدر… ممكن تبدأ بمكان قديم، أو شخص قديم، أو موقف يفتح باب ذكريات وسلوكيات إحنا بنحاول نبعد عنها.

وهنا بيظهر الصراع بين الوفاء للعلاقة… وبين الوفاء لنفسك وحياتك الجديدة.
الابتعاد عن شخص في مرحلة معينة مش معناه إنك خنته أو إنك نسيت فضله.
أحيانًا يكون وضع الحدود هو شكل من أشكال الحفاظ على نفسك.
وممكن يكون أكبر دعم تقدمه لشخص لسه في دائرة التعاطي إنك تثبت له إن التغيير ممكن…مش إنك ترجع معاه لنفس الطريق.

خليك فاكرإن العِشرة مهمة… لكن حياتك وتعافيك مسؤوليتك.
في التعافي مش مطلوب منك تكون قاسي على الناس، لكن مطلوب تكون واعي بالحدود اللي تحميك. و اسأل نفسك.. عِشرة العمر ولا حياتك؟

لما الماضي يرجع يخبط على بابك… هتعمل إيه؟ 🤔
لأن أحيانًا، التمسك بعلاقة قديمة ممكن يكون هو الباب اللي يرجعك لطريق قديم.

أ. جهاد صبري
أخصائي نفسي إكلينيكي ومعالج إدمان

30/08/2026

29/08/2026

"أنا أقدر أبطل وقت ما أحب"

بعد فترة من التعافي، وبعد ما الشخص ينجح في إنه يبعد عن التعاطي، ممكن يبدأ يحس بإحساس جميل:
"أنا بقيت فاهم الموضوع… أنا عرفت أتعامل"
وده إحساس طبيعي، لأن الشخص فعلًا تعب واتعلم وحقق تقدم.
لكن أحيانًا الإحساس ده يتحول لفخ… فيبدأ يقول لنفسه:
"أنا خلاص عرفت الطريق"
"لو حصل ورجعت هعرف أبطل تاني"
"أنا مش محتاج متابعة زي الأول"
"أنا بقيت أقوى من زمان"

المشكلة هنا مش في الثقة بالنفس… الثقة مهمة جدًا في رحلة التعافي. لكن المشكلة لما الثقة تتحول إلى استهانة بخطورة الإدمان. يعني بدل ما الشخص يقول: "أنا قدرت أتعافى لأني التزمت وخدت مساعدة" يبدأ يفكر "أنا قدرت، يبقى أقدر أرجع وأتحكم"

وهنا بيبدأ الفخ…
لأن الإدمان مش مجرد قرار نقدر نوقفه وقت ما نحب، لكنه مرتبط بطريقة تفكير، وعادات، ومشاعر، ومواقف محتاجة وعي مستمر.
أحيانًا الشخص ينسى إن الحاجات اللي ساعدته يتعافى كانت إنه طلب الدعم، إنه غير بيئته وعاداته، إنه اتعلم يتعامل مع الضغوط، إنه عرف يتجنب المواقف الخطرة.
ولما يبدأ يبعد عن الأدوات دي، ممكن يعرّض نفسه للخطر من غير ما يحس.

خليك فاكر: التعافي مش إنك تثبت إنك تقدر تقرب من الخطر…
التعافي إنك تعرف تحافظ على نفسك بعيد عنه.

اسأل نفسك: "هل أنا واثق لأني ماشي صح؟
ولا واثق لدرجة إني بدأت أستهين بالطريق؟"
لأن أحيانًا… النجاح نفسه ممكن يكون فخ، لو خلانا ننسى إزاي وصلنا له.

جهاد صبري
أخصائي نفسي إكلنيكي

22/08/2026

لما يتحول الإنجاز لباب للإنتكاسة
فخ "أنا أستحق مكافأة"…

في رحلة التعافي، من الطبيعي جدًا إن الشخص بعد فترة من التغيير يحس بالفخر بنفسه…
فهو فعلًا تعب، قاوم رغبات، واجه مواقف صعبة، واتعلم يتعامل مع نفسه بشكل مختلف.
ومن هنا تظهر فكرة تبدو منطقية جدًا:
"أنا تعبت كتير… أنا أستحق أكافئ نفسي"

والحقيقة إن الشخص فعلًا يستحق التقدير والمكافأة. لكن الخطورة مش في فكرة المكافأة نفسها، الخطورة في نوع المكافأة اللي يختارها. لأن أحيانًا العقل يعمل خدعة بسيطة، بإنه يربط بين الإحساس بالنجاح والسلوك القديم. فيبدأ الشخص يفكر :
"أنا بقالى شهور مبطل"
"أنا أثبت إني أقدر أتحكم"
"أنا مش زي زمان"
"هعملها مرة احتفالًا باللي وصلت له"

وهنا تتحول لحظة المفروض تكون إنتصار… إلى موقف ممكن يهدد كل اللي اتبنى.
مرة سمعت جملة من أحد المرضى، قد تبدو غريبة في البداية، لكنها كانت صادقة جدًا وتعكس فكرة الفخ ده.
كان بيقول: "أنا حاسس بالإنجاز…واستاهل مكافأة لأني بطلت طول المدة اللي فاتت دي وعملت مجهود كبير مع نفسي .
فسألته: "طيب إيه المكافأة اللي نفسك تقدمها لنفسك بعد كل المجهود ده؟"
قال: "ضربة مكافأة"

الجملة ممكن تبدو غير منطقية…
إزاي شخص يحتفل بنجاحه بحاجة كانت سبب في تعبه؟
لكن لما نفهم اللي وراء الجملة، هنلاقي إن الموضوع مش مجرد رغبة في التعاطي…
هو كان يبحث عن:
إحساس إنه كافأ نفسه.
إحساس بالراحة بعد فترة طويلة من المجهود.
إحساس إنه "يستاهل حاجة".

المشكلة إن المخ أحيانًا يقترح علينا أقصر طريق للإحساس بالراحة… حتى لو كان طريقًا قديمًا ومؤذيًا.
وهنا السؤال المهم: هل كل حاجة نفسي فيها تعتبر مكافأة؟
الإجابة: لا.

في التعافي، لازم نتعلم نفرّق بين:
✅ مكافأة تساعدني أبني حياتي الجديدة.
❌ ومكافأة ترجعني للحياة اللي كنت بحاول أخرج منها.
ممكن تكون المكافأة وقت ممتع، خروجة، شراء شيء يحبه الشخص، تعلم مهارة جديدة، قضاء وقت مع أشخاص داعمين، أو أي شيء يشعره بقيمة مجهوده.
لكن أخطر مكافأة هي اللي تجعل الشخص يدفع ثمن إنجازه بخسارة تعافيه.

افتكر دائمًا... أنت لا تحتاج أن تهدم ما بنيته لكي تحتفل بأنك بنيته.
في رحلة التعافي… المكافأة الحقيقية مش إنك ترجع للشيء اللي كنت بتحاول تتخلص منه…
المكافأة الحقيقية إنك تكتشف إنك قادر تعيش من غيره. 🌱

جهاد صبري
أخصائي نفسي إكلنيكي

15/08/2026

"مرة واحدة بس… وأنا مسيطر"

من أكتر الأفكار اللي ممكن تفتح باب الإنتكاسة جملة بسيطة جدًا:
"مرة واحدة بس… ومش هتتكرر.

بعد فترة من التوقف عن التعاطي، ممكن الشخص يبدأ يحس إنه بقى أقوى، وإنه يقدر يجرب مرة ويرجع يقف تاني.
يقول لنفسه: "أنا بقالي فترة كبيرة مبطل."
"أنا خلاص بقيت مسيطر."
"المرة دي مختلفة ومش هحصل زي زمان."

لكن المشكلة إن الشخص ممكن ينسى إن الإدمان مش مجرد قرار عادي نقدر نتحكم فيه بسهولة.
لأن الرجوع مرة واحدة ممكن يصحي الرغبة القديمة، ويرجع نفس الدائرة من جديد:
فكرة → تبرير → تعاطي → صعوبة في التوقف.
وده مش معناه إن الشخص ضعيف… لكن معناه إن الإدمان له طبيعة خاصة، وعلشان كده محتاج يحمي نفسه.

في التعافي، القوة مش إنك تقرب من الخطر وتقول "أنا أقدر"…
القوة الحقيقية إنك تعرف إيه اللي ممكن يضرك وتبعد عنه.
افتكر دايمًا: "مرة واحدة" ممكن تبان حاجة بسيطة…
لكن أحيانًا تكون أول خطوة للرجوع للطريق القديم.

جهاد صبري
أخصائي نفسي إكلنيكي

11/08/2026

لما التحسن يتحول لخطر
"أنا بقيت كويس خلاص"…

فخاخ العقل في رحلة التعافي

من أجمل اللحظات في رحلة التعافي إن الشخص يبدأ يحس إنه اتحسن…
يرجع يعيش حياته، وتقل الرغبة في التعاطي، ويحس إنه أقوى من الأول.
لكن أحيانًا هنا يظهر فخ خطير…
"أنا بقيت كويس خلاص… مش محتاج مساعدة تاني."
يبدأ الشخص يقول لنفسه:
"أنا بقالى فترة كبيرة مبطّل."
"أنا خلاص فهمت الموضوع."
"مش محتاج أروح جلسات أو اجتماعات."
"أقدر أتعامل لوحدي."

المشكلة إن التحسن مش معناه إن الشخص بقى بعيد عن الخطر تمامًا.
الإدمان مش بس سلوك كان موجود وانتهى… لكنه نمط قديم يحتاج الشخص يتعلم يحمي نفسه منه، ويكتسب مهارات جديدة للتعامل مع الضغوط والرغبات.
وأحيانًا ترك الدعم بدري يكون هو أول خطوة للرجوع.
التعافي مش معناه إنك تثبت إنك مش محتاج حد… التعافي الحقيقي إنك تعرف قيمة الدعم وتحافظ عليه.

وجود خطة، ومتابعة، وأشخاص داعمين مش دليل ضعف… ده دليل إنك بتاخد تعافيك بجدية.
🧠 اسأل نفسك: هل ابتعادي عن الدعم سببه إني أصبحت أقوى؟
ولا سببه إني بدأت أقلل من خطورة الإدمان؟
لأن أحيانًا… أكبر خطر بعد التحسن هو الإحساس إننا لم نعد نحتاج للحماية. 🌱

جهاد صبري
أخصائي نفسي إكلنيكي

09/08/2026

في مستشفى دكتور أحمد ابو العز لعلاج الإدمان، عارفين إن تعافي السيدات من أنواع الإدمان المختلفة، رحلة شخصية جداً ومختلفة، وفيها تحديات كتير .
ولتفهنا لرحلتهم، تم تصميم قسم السيدات بحيث إنه يكون مساحة آمنة ومرحبة، تقدري تكوني فيها على طبيعتك.

بنكون موجودين علشان نساعدك تتجاوزي تقلبات رحلة التعافي، مش بس بنقدم العلاج ، لكن كمان بنقدم التفهم والتعاطف والمجتمع اللي بيدعمك.
سواء كنت بتتعاملي مع صدمات الماضي، أو ضغوط الحياة، أو تحديات الإدمان، فريق مكون من أطباء وطبيبات ومعالجات على مستوي عالي من الكفاءة، هيكون موجود وهيساعدك في كل خطوة على الطريق ..

في قسم السيدات عندنا، هتلاقي دائرة دعم هتمكنك من المشاركة والشفاء والنمو. فتقدري تستعيدي السيطرة على حياتك وتعيدي إكتشاف نفسك وقدراتك.
أنتِ مش لوحدك . وإحنا هنا علشان نساعدك تلاقي الأمل والشفاء والمستقبل .

للحجز والتفاصيل
تليفون:
01551180016
0572175111
العنوان:
دمياط - السنانية - أول الكوبري العلوي - بجوار مدرسة شطا العزبي.