15/09/2026
في أطفال بيكرروا تصرفات معينة، والأهل يفتكروها مجرد عادة غريبة أو دلع أو عناد..
لكن أحيانًا التكرار ده بيكون وراه وسواس قهري.
الوسواس القهري عند الأطفال مش شرط يظهر بالشكل اللي الناس متخيلاه.
ممكن طفل يفضل يغسل إيده كتير جدًا، لأنه خايف إنها تكون اتلوثت.
وممكن يفضل يسأل نفس السؤال عشرات المرات: "إنت متأكد إن ماما مش هتتعب؟"
"متأكد إني ما عملتش حاجة غلط؟"
وممكن يعيد ترتيب حاجاته بطريقة معينة، أو يكرر كلمة أو حركة عدد معين من المرات، لأنه حاسس إن لو ما عملش كده حاجة وحشة ممكن تحصل.
وهنا فيه فرق مهم:العادة بتتعمل لأن الطفل متعود عليها.
لكن الوسواس غالبًا بيكون مرتبط بفكرة أو خوف أو إحساس مزعج بيضغط على الطفل، والطفل يعمل السلوك عشان يقلل القلق ده.
يعني الطفل مش بيغسل إيده لأنه "بيحب النظافة". ممكن يكون جواه خوف شديد من الجراثيم.
ومش بيرجع يتأكد من الباب عشر مرات لأنه "منظم".ممكن يكون خايف إن حاجة سيئة تحصل لو ما اتأكدش.
ومش بيكرر السؤال لأنه "رخم".ممكن يكون محتاج يطمن نفسه، لكن الاطمئنان بيختفي بسرعة، فيرجع يسأل تاني.
وده بيعمل دائرة:
فكرة أو خوف مزعج → قلق → سلوك متكرر → راحة مؤقتة → رجوع الفكرة والقلق من جديد.
السلوك كل ما يدي الطفل راحة مؤقتة، المخ ممكن يتعلم إنه:
"لما أعمل الحركة دي، القلق بيقل."
فيطلب تكرارها مرة تانية.
وعشان كده الوسواس القهري مش مجرد عادة محتاجة "تتمنع".
لأن إجبار الطفل على التوقف من غير فهم اللي بيحصل جواه ممكن يخليه أكثر قلقًا.
طيب إمتى الأهل يقلقوا؟
مش كل تكرار عند الطفل معناه وسواس قهري. لكن لازم ناخد الموضوع بجدية لو التصرفات:
بتتكرر بشكل ملحوظ ومش قادر الطفل يمنعها.
بتاخد وقت كبير من يومه.
بتسبب له ضيق أو قلق واضح.
بتعطل المدرسة أو اللعب أو النوم.
بتخليه يطلب الطمأنة بشكل متكرر جدًا.
أو بتأثر على حياة الأسرة كلها.
اوقات الطفل نفسه ممكن يكون عارف إن اللي بيعمله غريب أو مبالغ فيه، لكنه مش قادر يوقفه.
يعني ممكن يقول:
"أنا عارف إني سألتك قبل كده.. بس لازم أتأكد تاني." وده مش عناد بالضرورة.
ده ممكن يكون جزء من الاضطراب.
الوسواس القهري عند الأطفال له علاج؟ أيوه.
والتقييم المبكر مهم جدًا، لأن الطفل مش المفروض يفضل عايش طول الوقت تحت سيطرة الخوف والطقوس القهرية.
العلاج النفسي، وخصوصًا العلاج المعرفي السلوكي بأساليب مناسبة للأطفال، من أهم طرق العلاج
والأهم..ما نضحكش على الطفل، وما نعاقبوش، وما نقولوش "بطل تعمل كده وخلاص".
لأن الطفل مش بيختار إنه يعيش مع الأفكار دي.
إحنا محتاجين نفهم:هل ده مجرد عادة؟ ولا الطفل بيحاول يهرب من خوف أو فكرة مسيطرة عليه؟
لأن أحيانًا تصرف بسيط ومتكرر في عين الأهل..يكون بالنسبة للطفل معركة بتتكرر كل يوم.
لو لاحظت إن تصرفات طفلك المتكررة بتسبب له قلق أو بتعطل حياته، حجز استشارة هو الخطوة الصح لفهم السبب وتحديد العلاج المناسب.
ــــــــــــــــــــــــــــــــــــــــــــ
د/ محمد شعبان
للطب النفسي وعلاج الإدمان
مدير وحدة الأطفال والمراهقين (س) بمستشفى بورسعيد
📍 دمياط: دمياط القديمة، المطري، أمام مسجد الرحمن، أعلى حلواني أبو العلا الجديد، الدور الرابع
📞 01552413131
📍 المنصورة: عيادة أمان للطب النفسي، شارع بنك مصر، برج مكين للأطباء، الدور الثاني
📞 01062636248
📍 بورسعيد: عيادات الزهراء، شارع التلاتيني، مسجد التوفيقي، بجوار الوهيبي، أعلى محل سي عمر
📞 01090470687
💻 متاح جلسات أونلاين وزيارات منزلية.
الحجز و التواصل علي رسائل الصفحة أو الواتساب : https://wa.me/c/201106251275
و متنساش تتابعنا على الانستجرام : https://www.instagram.com/psych.mohamedshaban
ــــــــــــــــــــــــــــــــــــــــــــ
#الادمان
