دكتور أحمد عصفور Asfour Kids Clinic

دكتور أحمد عصفور Asfour Kids Clinic د أحمد عصفور مدرس م طب الأطفال وحديثي الولادة وأمراض مخ وأعصاب الأطفال بكلية طب الأزهر بالقاهرة

عيادة الحامول شارع المركز برج النخبة امام فودافون ت � 01092068588
عيادة غرب تيرة شارع نقطة الشرطة أمام صيدلية د محمود ت � 01017405341

23/08/2026

الريلز 📵في ايد اولادكم تد.مير محقق للتطور العقلي واضطرابات سلوكية شديدة وتأثير شديد على تطور اللغه❌

21/08/2026

📢 خدوا بالكم جدًا من أولادكم

أسبوعيًا بشوف على الأقل حالة تعدي أو اعتداء على طفل…

من ناس كان جانبهم أمان:

▪️ من قريب لطفل
▪️ من محفظ أو شيخ
▪️ من مدرس
▪️ من حد شغال مع الأب
▪️ من طفل أكبر في الشارع
▪️ من جار
▪️ وغيره…

💔

رجاءً متخليش أولادك، خصوصًا البنات، يغيبوا عن نظرك.

⚠️ حرص جدًا.

وعلّم طفلك إن فيه أماكن خاصة في جسمه، محدش يلمسها.

👀 افحص ابنك بعد أي مشوار بعيد عنك، وبص في هدومه الداخلية.

🤝 صاحب ابنك، وخليه يحكي معاك.

وخليه دايمًا حاسس إنه يقدر يقولك أي حاجة من غير خوف.

الموضوع زاد بعد انتشار الموبايلات الغير مقنن وفي كل الأعمار ولازم يكون فيه علاج مجتمعي

وردع قوي لكل مرتكب لهذا الفعل
لا أرى اقل من السجن المشدد والاعد.ام لمنتهك اي طفل

🤲 حفظ الله أولادنا جميعًا.

14/08/2026

❤️ يوسف…

يوسف طفل جالي من سنتين، عمره 9 سنوات، بيشتكي من همدان، وبقاله أكتر من يومين كده، خلاص الهمدان زاد جدًا، والأهل مش عارفين في إيه.

كشف في أكتر من مكان، خد علاجات، وخد محاليل، لكن ما وصلوش لحاجة.

التحاليل اللي معاهم كويسه صورة دم وتيفود وميكروب ووظائف كبد وغيرهم

لكن وأنا ببص عليه بالسونار حسيت إن الـ echogenicity بتاعت الكلية عالية شوية.

طلبت له سونار في مركز أشعة للتأكيد، لكن طلع طبيعي.

لكن أنا كان إحساسي ما زال إن الطفل في حاجة.

⸻

عملت تحليل بول عند صديقي الشاطر المجتهد دكتور عبد العزيز سعيد ، أخصائي التحليل.

وتحليل البول كان فيه Hyaline cast.

ودي بالنسبة لي كانت مفتاح مهم جدًا، مع تحليل وظائف كلى كان فيها ارتفاع طفيف للغاية.

بلغت الأهل.

قالوا نعيد التحليل تاني للاطمئنان في معمل أكبر.

وجات النتيجة مطابقة لمعمل صديقي الدكتور عبد العزيز.

⸻

الانطباع الأولي إن إحنا عندنا مشكلة في الكلية.

وطبيعي إن أنا أخدت قياس ضغط الدم للطفل.

الضغط بتاعه كان كويس.

بالنسبة لزملائنا المتخصصين في الكلى، دي ممكن يكون التهاب في الكلية بعد عدوى فيروسية، والأمور مستقرة.

بيجيب بول ضغط كويس مفيش دم حاليا في البول مش مورم وظائف نسبياً كويسه ارتفاع طفيف

وطبيعي إن إحنا نعمل شوية فحوصات للتأكيد:

C3. C4
Albumin/creatinine ratio
وغيرهم ونتابع

وشوية تحاليل دقيقة.

⸻

لكن أنا ما كنتش مطمن للطفل.

والسن بتاعه كان أكتر حاجة أقلقتني.

قلت للأهل:

إحنا هنعمل كل الحاجات دي، لكن لازم نحجزه.

وهحجزه في مكان جامعي.

كتبت تقرير وحولته جامعة المنصورة للطوارئ

⸻

وسبحان الله…

بمجرد الطفل ما وصل، وكأنه كان بركان وانفجر.

الطفل تاني يوم كان في الجامعة، لقى طوارئ الجامعة مش شغالة، حولوه مستشفى الدولي.

وصل…

وظائف الكلى حصل فيها تدهور سريع.

ارتفاع شديد في ضغط الدم.

الطفل قطع بول تمامًا.

الوعي بتاعه بيتدهور.

تجمع مية حوالين الرئة والقلب.

جسمه كله ورم.

اتحط على جهاز تنفس صناعي.

وحصل سوء في الرئة وتجمع مية في الرئة.

يعني للأسف…

ده كان سيناريو لتدهور شديد في التهاب الكلى النفروزي.

⸻

تواصلت مع الطبيب اللي هناك، الأهل أدوني رقمه، وبلغني إن الحالة سيئة خالص.

واتفقنا إن إحنا هنحاول نساعد بعض فيما يخص حالته.

حتى الطبيب اللي هناك، في اليوم اللي ما كانش فيه نبطشي، كان بيتواصل معايا.

وأشركت أحد الزملاء اللي تخصصه متخصص في كلى الأطفال الذي لم يقصر في تقديم أي نصيحة كنا بنتواصل على مدار اليوم وحاولنا نبذل قصارى جهدنا إن الأمور تستقر وما تتدهورش أكتر من كده في المستشفى الدولي اللي الاطباء هناك عملوا معجزة معاه لكن مش كل الإمكانيات هناك

⸻

و كان القرار إن الطفل محتاج جلسات غسيل كلوي

كتبنا تقرير وخدناه المستشفى المنصورة الجامعي.

وربنا أكرمنا والولد اتنقل.

⸻

حالة صعبة جدًا…

كل المؤشرات تقول إن إحنا أمام حالة للأسف منتهية.

لكن…

اتنقل يوسف مستشفى جامعة المنصورة.

عمل جلسات.

بدأ يتفصل من على جهاز التنفس الصناعي.

اتشالت الأنبوبة الصدرية.

بدأ يجيب بول.

وظائف الكلى بدأت تستقر.

وبدأنا ناخد جلسات غسيل متكررة.

يوسف فضل متابع معاهم فترة…

إلى أن تحسن تمامًا. ❤️

وتم سحب أدوية الضغط بعد فترة طويلة.

⸻

الحمد لله…

يوسف كان عندي من يومين.

يوسف يمكن الأهل ممتنين ومبسوطين وفرحانين إني كنت معاهم وشخصته بدري.

لكن أنا عايز أقول لهم:

أنا فرحان بيوسف أكتر منهم. ❤️

وده يمكن من أكتر الحاجات اللي بتخلينا نحب الطب.

برغم كل المساوئ والـ lifestyle السيء والضغوطات اللي بنعيش فيها…

لكن حالة يوسف فرحتني.

⸻

يوسف كان عندي من يومين…

كان جاي يكشف على دور تعب عادي خالص.

طبيعي…

وزي الفل.

نورتنا يا يوسف ❤️❤️

📢 الصفراء لو تجاوزت شهر…لازم نعمل تحليل دم لتأكيد هل هي صفراء وليدية أم كبدية(مشكلة تتعلق بالكبد).ولا يمكن الاعتماد على ...
12/08/2026

📢 الصفراء لو تجاوزت شهر…

لازم نعمل تحليل دم لتأكيد هل هي صفراء وليدية أم كبدية(مشكلة تتعلق بالكبد).

ولا يمكن الاعتماد على القياس بجهاز الصفراء عن طريق الجلد

لو وليدية مفيش مشكلة إطلاقًا، وبنتابع فقط.

لكن لو كبدية…

بنفتح باب عظيم من الفحوصات للوصول للتشخيص.

⸻

👶 دي حالة طفلة كانت بتاخد علاج، ومنتظرين الصفراء تنزل.

لكن للأسف…

كانت صفراء كبدية.

لما جاتلي وفهمت الأهل، لم يترددوا وتحركوا فورًا.

لأن بعض الحالات لما بتسمع تشخيص مش حلو، بتحاول تاخد أكتر من رأي من الصدمة، وأحيانًا بيضلوا.

⸻

🙏 ومن كرم ربنا إن الحالة اتحولت في الوقت المناسب.

لأن من ضمن الأسباب انسداد القنوات المرارية، وده بالفعل اللي كان موجود في نتيجة عينة الكبد.

والمشكلة دي لازم تدخل جراحي مبكر.

ولو تأخرنا للأسف العملية تفشل.

⸻

الحمد لله عملت العملية في الوقت المناسب قبل عمر شهرين. 🤲

🏥 معهد كبد شبين ده صرح طبي عظيم على أرض مصر.

شاكرين لكل طبيب هناك على مجهودهم.

🤍 ودعواتكم للطفلة بتمام الشفاء.

08/08/2026

📢 نعتذر عن التواجد اليوم السبت بعيادة الحامول

متواجد بالعيادة مكاني اليوم
👨‍⚕️ د. حسن يوسف — أخصائي طب الأطفال

📍 سوف أكون متواجد غدًا وطوال الاسبوع إن شاء الله
📍 ومتواجد الثلاثاء (الاجازة الاسبوعية)
🔄 بدلًا من اليوم أن شاء الله

💙 حالات الكشف مع د. حسن
هيكون المتابعة معايا إن شاء الله.

دمتم وأولادكم جميعًا بخير 🤍

30/07/2026

📢 بدأت أشوف منع تطعيم في الأطفال… ودي مصيبة وجريمة.

وبدأت أشوف أطفال ممنوعين من البيض واللبن في العيادة.

ينهار أبيض!

طفل عظامه، وأسنانه، وخلايا مخه بتكبر، وجسمه بيتبني…

يتمنع من أساسيات التغذية!!

يعني كوارث في المستقبل…

جيل معدوم الصحة، وجسد هلامي.

⸻

لو أعداؤنا فكروا في فخ يوقعونا فيه، ويدمروا شباب اللي هما هيكونوا مستقبل الأمة…

مش هيقدروا يعملوا اللي حصل ده.

⸻

مبدئيًا…

حضرتك عايز تاكل من كوكب المريخ… أنت حر.

لكن ابنك اللي لسه ملوش اختيار…

لا، هنا هنقف، وهنقولك:

أنت كده غير مؤتمن، وهتضيع ضناك…

عشان شوية هلاوس وضلالات.

⸻

لو حد هنا بيعمل كده…

رجاءً فوق.

والله ده قتل ببطء لابنك.

⸻

ولو حد يعرف حد حواليه بيعمل كده…

أنصحه.

واعرف إنها فتنة، وللأسف كلنا غرزنا فيها، وكلنا لينا دور ومسؤولية.

⸻

مكنتش ناوي أذكر أي حاجة تخص هذا النظام اللعين هنا…

لكن طالما وصل الأمر لكده…

لازم نقدم ما نعذر به أمام ربنا.

⸻

هقول كلمة قاعدة مهمة:

لا يمكن أن يأتي بشري بمبدأ يخالف جموع أهل تخصصه، على اختلاف أزمانهم، وأديانهم، ولغاتهم، وتوجهاتهم، وأجناسهم، في أي تخصص كان…

إلا إذا كان:

🔹 نبيًا مرسلًا، آتاه الله علمًا، وحرم منه كل البشرية، ليكون نذيرًا لهم…

وده يستحيل بعد وفاة الرسول ﷺ.

أو…

🔹 دجالًا…

معه حجج، ويخلط الحق بالباطل، ويكون له أتباع، ويعرفه كل ذو بصيرة، ويضل بمنطقه العوام للأسف.

⸻

💔 ولا حول ولا قوة إلا بالله

#دأحمدعصفور

28/07/2026

📢 التشخيص هو أهم وظيفة للطبيب، وهي الأصعب.

ثم يأتي وصف العلاج، وهو أسهل جدًا.

⸻

التشخيص قد يكون سهلًا وواضحًا، وقد يكون محتاج فحص، وفحوصات، وأشعات، وأحيانًا أخذ رأي زميل من تخصص دقيق أو تخصص آخر.

وقد يتطلب زيارات متعددة لمتابعة تطور أعراض المرض.

وأحيانًا حجزًا بالمستشفى لعمل كونسلتو طبي.

وكل ده لمصلحة المريض.

⸻

فالأمر ليس سهلًا.

وليس مطلوبًا من الطبيب الرد على كل ما يخص الحالة في أول زيارة.

وكتير من الحالات الصعبة تحتاج زيارات متعددة.

⸻

والأعراض قد يكون لها أسباب متعددة، وأمراض متنوعة.

وهنا يحاول الطبيب الوصول للسبب الأوقع بناءً على الفحص.

وأحيانًا يحتاج أشعات وتحاليل تساعده في التشخيص.

⸻

وهذا هو الفرق الجوهري بين الطبيب والـ AI وشات جي بي تي.

فهذا النظام غير البشري لا يستطيع عمل فحص.

لذلك قد يلقي لك بكل الأمراض التي تسبب عرضًا ما.

ونلاقي حضرتك جاي بخضة عظيمة نتيجة ذكره لكل مسببات هذا العرض.

⸻

وبعد كل ذلك…

قد لا يوفق الطبيب في التشخيص.

ونحن على يقين بذلك.

فلا يوجد طبيب يلازمه الصواب دائماً.

وهذا تذكير له وللناس أنه سبب.

وأن التشخيص هو فضل الله على الطبيب قبل المريض.

⸻

الإنسان هو صنعة الله، ومعجزته الكبرى.

والطبيب سبب، ومجتهد.

⸻

أي حالة صعبة يرزقني الله التشخيص لها…

أحمد الله مرات عديدة أن جعلني سببًا، وأجرى مفاتيح العلاج على يدي.

وأشعر طول الوقت بحمل شديد مع كل شكوى جديدة من مريض جديد.

⸻

لذلك لا تستغرب من كثرة ضغطي عليك لأخذ التاريخ المرضي.

فهو الجزء الأهم في التشخيص، وهو دائمًا المفتاح.

وأخذه يحتاج وصفًا واضحًا ودقيقًا، وتجنب الإجابات الهلامية، والإجابات الرمادية التي لا تفيد الطبيب، وقد تضلله.

⸻

🤍 حفظ الله أولادنا جميعًا.
:::
#دأحمدعصفور

26/07/2026

📢 رسالة إلى أسر الحالات اللي بتتابع معانا مخ وأعصاب 🤍

⸻

🧠 أولًا…

معظم حالات مخ وأعصاب الأطفال حالات مزمنة.

وبناخد وقت في المتابعة، وتقييم درجة التحسن.

والتحسن نفسه علم غيبي… صعب أي حد يتنبأ بيه بدقة.

⸻

🩵 حالات التوحد

حتى الآن لا يوجد علاج شافٍ تمامًا للتوحد.

في بعض الأدوية ممكن تساعد بعض الأطفال، لكن الجلسات والتأهيل هما العامل الأهم.

فمحدش يوهمك إنه عنده علاج سحري أو علم مختلف عن باقي الأطباء.

⸻

⚡ حالات فرط الحركة وتشتت الانتباه (ADHD)

دي حالات منتشرة جدًا.

وللأسف كتير من الأهالي بيرفضوا العلاج أو بيخافوا منه.

لكن لازم نعرف إن كل طفل استجابته مختلفة.

طفل ممكن يتحسن جدًا على دواء.

وطفل تاني نفس الدواء ميستفدش منه أو تظهر له آثار جانبية.

وعشان كده بنحتاج صبر ومتابعة لحد ما نوصل لأفضل علاج يناسب كل طفل.

⸻

💊 أدوية المخ والأعصاب

مش كلها مهدئات.

في أدوية كتير جدًا بتنشط المخ، وبتساعد على تطوره حسب الحالة.

أما الأدوية اللي الناس بتسميها “مهدئات”…

فأحيانًا بتكون هي أهم علاج للتحكم في الأعراض اللي مأخرة تطور ابنك.

والخوف منها بدون سبب قد يكون سببًا في تأخير تحسن الطفل.

⸻

⚖️ أي دواء ليه آثار جانبية؟

أكيد…

لكن إحنا بنشتغل بمبدأ مهم جدًا اسمه:

Risk vs Benefit

يعني بنقارن بين خطورة الدواء وفائدته.

ولو كانت فائدة العلاج أكبر بكتير من مخاطره…

ساعتها بيكون استخدامه هو القرار الصحيح.

⸻

⚡ حالات الكهرباء والتشنجات

ممكن طفل يتحسن على نوع واحد من أدوية الكهرباء.

وممكن طفل تاني يحتاج نوعين أو ثلاثة أو حتى أربعة أنواع، وبرضه يفضل التحكم في التشنجات صعب.

وده بيرجع لطبيعة المرض نفسه… وليس لخطأ في العلاج.

⸻

🙂 شلل العصب الوجهي عند الأطفال

موجود في الأطفال، والحمد لله حوالي ٩٠٪ من الحالات بتتحسن تحسنًا كاملًا بالعلاج الدوائي فقط.

لكن…

في نسبة قليلة بيكون الأمر فيها أصعب.

وقد يحتاج الطفل إلى تدخل جراحي إذا فشل العلاج الطبيعي مع العلاج الدوائي في تحقيق التحسن المطلوب.

وده مهم جدًا الأهل يعرفوه…

لأن النسبة دي بترجع لطبيعة المرض نفسه، وليس لتأخر العلاج.

حتى لو بدأنا العلاج مبكرًا، واتعمل علاج طبيعي بصورة صحيحة ومن أول وقت.

فمش كل الحالات بتكون نتيجتها واحدة.

وعشان كده بنحتاج صبر، والتزام بالخطة العلاجية، ثم نترك النتيجة على الله.

⸻

🧬 التشخيص مهم جدًا.

لأن سبب التشنجات ممكن يكون:

▪️ عدوى أثرت على المخ.
▪️ نزيف.
▪️ نقص أكسجين.
▪️ مرض وراثي، وقد يكون له فرصة للظهور في الأطفال القادمين.
▪️ مرض من أمراض التمثيل الغذائي، وقد يكون له علاج محدد يقلل الأعراض بصورة كبيرة.

وعشان كده فيه بروتوكول معين للتشخيص بنمشي عليه في معظم الحالات.

فلما نطلب تحاليل أو أشعات…

تأكد إننا بنحاول نوصل للسبب الحقيقي ونساعد ابنك بأفضل طريقة.

⸻

🤝 بالنسبة للرأي الثاني…

أنا مش بزعل أبدًا لما أشخص طفل، وأبدأ علاج، وبعد فترة تروح تعرضه على زملائنا أو أساتذتنا في نفس التخصص.

ده ابنك…

ومن حقك تطمن عليه، وتسمع أكتر من رأي.

لكن اللي أتمناه…

إن الرأي الثاني يكون عند طبيب مخ وأعصاب أطفال أو في نفس التخصص.

لأن بعض الأهالي بيختلط عليهم الأمر، فيروحوا لطبيب نفسية أو طبيب مخ وأعصاب للكبار أو جراحة المخ والأعصاب، ودي تخصصات مختلفة، وبنلجأ لها في حالات معينة تخص مجالهم.

⸻
✅التدخل المبكر مهم جدا فرجاء لو لاحظت في ابنك عنده حاجه غير طبيعية أو متأخر في اللغه او التطور الحركي او عنده حركات غريبه ارجع لطبيب متخصص فورا ومتسألش حواليك لان للأسف هتسمع طمأنه من اللي حواليك بدون اي علم وابنك هو الخاسر الوحيد

🤲 وأخيرًا…

المرض ابتلاء من ربنا.

وأجر الصبر عليه عظيم.

فاحتسبوا الأجر، واسألوا الله الشفاء.

وفي النهاية…

هناك بعض الأمراض الغامضة التي قد لا يصل فيها أحد إلى تشخيص واضح.

ويقف الطب بكل ما وصل إليه عاجزًا أمام عظمة الخالق سبحانه وتعالى.

🤍 ربنا يشفي أولادكم جميعًا، ويقر أعينكم بهم.



مدرس طب الأطفال وحديثي الولادة ومخ وأعصاب الأطفال
:::

حالة نادرة جداً 👌✅بنوته تشتكي من نزلات شعبيه والتهاب رئوي متكرر مع نزلات معوية متكرره الام كانت متعاونه وصبورة لأقصى درج...
21/07/2026

حالة نادرة جداً 👌

✅بنوته تشتكي من نزلات شعبيه والتهاب رئوي متكرر مع نزلات معوية متكرره

الام كانت متعاونه وصبورة لأقصى درجة😌

التحليل مكلف جدا 😕

🔴وكنت محتاج استبعد ضعف جهاز المناعه الوراثي وبعض أمراض التمثيل الغذائي ومرض التكيس الليفي cystic fibrosis

وحولتها اكتر من مره لمختص لكن دائما كانت بترجع بنفي التشخيص

لكني متابع للبنت من فترة وعندي يقين أن البنت ليست نزلات فقط ❌

الام لم تقصر لحظه في اي إجراء طلبته منها

وربنا كرمنا وعملنا تحاليلنا تبع التأمين الصحي (اللي أصبح انجاز حقيقي واقعي في الأطفال وبيشيل عننا جزء كبير أن لم يكن كل التكلفة)

ودي النتيجة مع أعراض نمطية

والعلاج هنا برده مكلف جدا لكن أن شاء الله يصرف تبع التأمين

طفل جميل أهله جايين يشتكوا من تأخر في المشي والمتوقع أنها حالة مخ وأعصاب🤔لكن بالفحص الطفل كان عنده علامات لين عظام شديدة...
19/07/2026

طفل جميل أهله جايين يشتكوا من تأخر في المشي والمتوقع أنها حالة مخ وأعصاب🤔
لكن بالفحص الطفل كان عنده علامات لين عظام شديدة أو الكساح وده نادر جدا تشوفه الأيام دي

السبب مبياخدش فيتامين دال

عظام متآكله وجسم مرخي وتشوهات في الجهاز الهيكلي

وهنا هننبه على كام نقطه مهمه

✅فيتامين دال ميتنسيش اي نوع سيبك من شغل الترندات بتاعة شركات الأدوية اي نوع قدامك

✅مبيقفش حتى مع التعب

✅الافضل نستمر عليه طول العمر متوقفهوش

✅التشخيص بالفحص هو ده اهم نقطه ثم الاشعه ثم التحاليل

✅تحليل الكالسيوم ملوش قيمة كبيره وفي مع معظم الحالات دي بيطلع طبيعي رغم أنه ناقص جدا في العظم

لكن كويس في الدم عشان بسمع كلمة نعمله تحليل كالسيوم عشان نشوف الطفل محتاج كالسيوم ولا لأ

الفحص هو المهم

✅الكالسيوم مش مهم كمكمل غذائي لأنه موجود بكميات مناسبة في الأكل المهم هو فيتامين دال اللي بيساعد على امتصاصه

وممكن نديه طبعا في الحالات دي عشان نسرع عملية التحسن ونمنع التشنج بسبب نزوح كالسيوم الدم للعظام

🛑ده الفرق بين الصورتين بعد شهر واحد من العلاج

رايكم مين قبل ومين بعد العلاج عايزين روح الطبيب أو chat gpt 😅🤷‍♂️

#دأحمدعصفور

Address

El-Hamul

Telephone

+201092068588

Website

Alerts

Be the first to know and let us send you an email when دكتور أحمد عصفور Asfour Kids Clinic posts news and promotions. Your email address will not be used for any other purpose, and you can unsubscribe at any time.

Shortcuts

Share

Category