20/02/2026
ازيك يا مامي 😍
هنكمل كلامنا عن الحليب البقري بعد ما الطفل يكمل سنة 👶🥛
اتفقنا قبل كده إننا ما بندخلوش قبل السنة حسب توصيات
American Academy of Pediatrics
وعرفنا ليه 👌
يلا نجاوب على أهم الأسئلة 👇
⸻
🥛 ابني مش متقبل الطعم… أعمل إيه؟
طبيعي جدًا 👇
الطعم مختلف عن لبن الأم أو الصناعي.
الحل؟
✔ اخلطي لبنك بنسبة أكبر مع اللبن البقري
✔ وقللي لبنك تدريجيًا لحد ما يبقى 100% لبن بقري
وممكن تدخليه في:
🥣 البليلة
🥛 رز بلبن
🍮 مهلبية / كاسترد
(مش نحطه في كورن فليكس مسكّر لطفل سنة 😉)
⸻
🥛 كامل الدسم ولا لا؟
أيوه ✅
لازم كامل الدسم لحد عمر سنتين
عشان الدهون مهمة لامتصاص فيتامينات زي A و D
ومهمة لنمو المخ والجهاز العصبي 🧠💪
⸻
🥛 سايب ولا مبستر؟
الإجابة الواضحة 👇
✔ لازم مبستر
اللبن غير المبستر ممكن يحتوي على بكتيريا خطيرة.
والتحذير ده صادر رسميًا من
American Academy of Pediatrics 🚫
صحة الطفل مش مجال للمغامرة.
⸻
🥛 يشرب قد إيه؟
👶 من سنة لسنتين: حوالي 400–500 مل يوميًا (كوب ونص تقريبًا)
👦 بعد سنتين: حوالي كوبين يوميًا
🚫 ما نزودش عن 3 أكواب يوميًا
عشان ما يشبعش على حساب الأكل → ونرجع تاني للأنيميا 😅
اللبن مكمل… مش وجبة أساسية 👌
⸻
🍼 طب أحطه في برونة؟
لأ يا مامي 😌
بعد السنة نبدأ نودّع الببرونة
عشان:
✔ نقلل تسوس الأسنان
✔ نحترم تطور مهارات الطفل
✔ نقلل التعلق بيها
في أكواب تدريب بغطا بتسهل المهمة جدًا 👏
⸻
😰 طب موضوع حساسية الألبان؟
نسبة حساسية بروتين اللبن حوالي 2–3% بس.
وغالبًا لو فيه حساسية كانت ظهرت بدري:
✔ لو بيرضع طبيعي → اتعرض لبروتين بقري من خلال أكلك
✔ لو صناعي → معظم الألبان الصناعية أصلها بقري
لكن نلاحظ الأعراض 👇
🔴 طفح جلدي (خصوصًا حول الفم أو الحفاض)
🔴 قيء / إسهال / مغص شديد
🔴 صفير أو صعوبة تنفس
وساعتها التوجه فورًا للطبيب 👨⚕️
⸻
الخلاصة 👇
🥛 بعد السنة → نبدأ تدريجي
🥛 كامل الدسم
🥛 مبستر
🥛 400–500 مل يوميًا
🚫 مش في برونة
🚫 مش نعتمد عليه كوجبة
⸻
لو وصلتِ لحد هنا 😍
قوليلي في الكومنتات 👇
ابنك كام سنة وبيشرب كام مرة في اليوم؟
د.مأمون عمرو منصور
اخصائي الأطفال وحديثي الولادة والمبتسرين
