04/08/2026
من أكتر الحاجات اللي بتوجع القلب في مجال التحاليل الطبية إن في ناس بتفتكر إن المريض بالنسبة لنا مجرد زبون بيجي يعمل تحليل ويمشي لكن الحقيقة إن بعد فترة طويلة من التعامل المريض بيبقى له مكانة عندي وتحس إنه واحد من الناس اللي اعرفهم بقالي كتير وخصوصاً الناس الكبيره
كان عندي في المعمل أختين واحدة عمرها 56 سنة والتانية 58 سنة كانوا دايما ييجوا مع بعض ويروحوا مع بعض حرفيا كنت انزل اجيب اكل من تحت اقابلهم في الشارع اسلم عليهم نادرا لما الاقي واحده فيهم جايه لوحدها وكل مرة يدخلوا المعمل نقعد نهزر ونضحك ونتكلم وبمرور الوقت بقت العيلة كلها تيجي تعمل التحاليل عندنا ولادهم واحفادهم
من كام يوم لقيت الأخت الأصغر جاية لوحدها تعمل وظائف كلى وبعض التحاليل وأنا بكلمها سألتها أختك فين بقالها فترة مش باينة
ردت عليا وقالتلي توفيت طب انا في المواضيع دي باخد الموضوع في سكه تانيه وبغير الموضوع عشان متبقاش عياط 😂 فقعدت اهزر معاها شويه كالعاده يعني .
اختها دي كانت بتتعالج من السكر وكانت دماغها ناشفه لما فهمتها أن السكر محتاج متابعه دوريه بطريقه لطيفه كدا بقت تيجي كل ١٠ ايام تحلل صايم وفاطر وفي مره لقيتها خاسه جدا قولتلها مالك ياماما مش قادره تتكلمي كدا مش عوايدك وبنتها جايه مسنداها
مردتش شاورتلي أنها مش قادره عملت التحاليل المطلوبة منها ومن يومها بقي وبعدها اكتشفوا إصابتها بالسرطان مطولتش في التعب دا شهرين وربنا اختارها إلى جواره
في اللحظة دي افتكرت إن إحنا في شغلنا مش بنتعامل مع أرقام ولا عينات دم وبس إحنا بنتعامل مع بشر مع حكايات مع وجوه بنشوفها كل شهر وكل أسبوع لحد ما يبقى بينك وبينهم عشرة ومودة
وعشان كده أكتر حاجة بتزعلني مش إن حالة بطلت تيجي المعمل أو إن رزق راح أبدا
اللي بيوجع فعلًا إنك تفتقد حد كنت متعود تشوفه وتسأل عليه وتعرف إنه مش هيدخل عليك تاني
ربنا يرحم كل مريض فارق الدنيا ويشفي كل مريض بيتألم ويجعلنا دائمًا سببًا في تخفيف وجع الناس
كل مهنة في الكوكب فيها جزء إنساني لو اهتميت بيه ربنا هيباركلك
