22/08/2026
كلام مهم جدا جدا 👌
- البيض هو كنز غذائي لبروتين رخيص وعالي القيمة..
البيضة الواحدة فيها ٦ جم بروتين وسعرات حرارية قليلة جدا.. حوالي ٧٠ سعر حراري بس.
فيها الكولين المهم لوظائف المخ والأعصاب عشان كده بيقلل حدوث الزهايمر.. واللوتين والزياكسانثين اللي بيدعموا شبكية العين.. ومجموعة فيتامينات مهمة زي فيتامين أ و ب ودال.
- اليابان من أكثر دول العالم استهلاكاً للبيض واليابان تحتل المركز الأول عالمياً في متوسط العمر (أكبر من ٨٤ سنة) وأدنى معدلات السرطان وأمراض القلب والسمنة بين كل الدول المتقدمة.
- التخوف من البيض قبل كده كان سببه التخوف إن الكوليسترول في صفار البيض يرفع الكوليسترول الضار في الجسم لكن أغلب الكوليسترول اللي في جسمنا الكبد هو اللي بيصنعه، واللي بيحفز الكبد لكده هو الدهون المشبعة والمتحولة والسكريات اللي في أكلنا، مش الكوليسترول الغذائي اللي بناكله بشكل مباشر.
- البيضة الكبيرة فيها كمية قليلة جداً من الدهون المشبعة (حوالي 1.5 جرام بس) عشان كده مكنش فيه أي زيادة في أمراض القلب للأشخاص اللي بياكلوا البيض ..
مريض القلب ممكن ياكل بيضة واحدة يوميا.. يعني متوسط ٧ بيضات في الأسبوع بدون ما يخاف من ارتفاع نسب الكوليسترول الضار.
- المشكلة الحقيقية مش في البيضة.. المشكلة في اللي بتاكله معاها زي الدهون المشبعة اللي في الزبدة، والجبن غير الطبيعية، واللحوم المصنعة زي السجق واللانشون، أو الكربوهيدرات السيئة زي العيش الأبيض والمعجنات والبطاطس المقلية أو العصاير المعلبة اللي ممكن تشربها مع الفطار.
- عندك حساسية من البيض أو جيوبك الأنفية اتحسنت لما وقفته خليك موقفه لكن متعممش حالتك على الناس.. فيه ملايين الناس بتاكل بيض وعمرها ما خدت علاج للجيوب الأنفية وفيه آلاف الناس عندها حساسية وجيوب أنفية ومبتاكلش بيض.
- قلقان من اللي بتسمعه عن بيض المزارع هات بيض بلدي أو من مزارع محترمة تكون تغذية الفراخ فيها كويسة.
- فيه بوستات منتشرة إن لقوا سالمونيلا في البيض في أحد المزارع في أمريكا.. الفراخ والبيض أحياناً تحمل خطر السالمونيلا زي ما اللحوم تحمل خطر الإي كولاي.. سواء السالمونيلا أو الاي كولاي الاتنين بيموتوا بالطهي عشان كده بننصح انك متاكلش فراخ أو لحمة نية ومتاكلش بيض ني 😅
