03/01/2026
🌷🌷القولون التقرحي🌷🌷
👈 جالي شاب عمره ٢٨ عام. له اكتر من سنه بيشتكي من مغص متقطع من وقت لاخر مع انتفاخات وتقلبات بالبطن ومع الوقت بدأ يجيله اسهال احيانا بعد الاكل مباشرة واحيانا من غير اكل.
👈 بدأ يكشف ويبحث عن حل لمشكلته وكل مرة يكون التشخيص انه قولون عصبي. واخد ادويه كتير بدون تحسن ملحوظ. بيتحسن اثناء العلاج تحسن بسيط وبعد كدا يرجع تاني نفس المشكله.
👈 وهو بيحكيلي قالي نقطه مهمه جدا وهي انه مع الوقت المغص بدأ يزيد والاسهال بدأ يكون معاه مخاط وفي بعض الاحيان ممكن يشوف دم بسيط. وكان التفسير وقتها ان دا ممكن من البواسير عادي.
👈 كان لازم التفكير بطريقه مختلفه وبعد اقناع العيان بعمل منظار علي القولون تبين ان العشاء المخاطي للقولون ملتهب جدا وفي تقرحات. وبعد اخذ عينات من القولون تبين وجود قولون تقرحي وانه مش قولون عصبي ولا حاجة. وبعدها بدأ العلاج المناسب وبدأ تحسن ملحوظ بفضل الله والمغص اتحسن والاسهال وقف والمخاط والدم اتمنع.
💥 نتعلم من هنا كام نقطه مهمه جدا:
◾ مش كل مشاكل القولون هتبقي قولون عصبي.
◾ في علامات مهمه جدا مينفعش تعدي كدا. زي مغص مبيتحسنش، او اسهال ووجود مخاط.
◾ مش كل دم بعد الحمام هيبقي بواسير. ممكن يكون قولون تقرحي زي حالتنا دي. وممكن حجات تانيه مهمه زي اورام القولون(ال بدأ فعلا ينتشر في الفترة الاخير بصورة كبيره) او الزوايد اللحميه.
◾ المنظار مش رفاهيه. بالعكس احيانا بيبقي مهم جدا لتشخيص وعلاج مرضي كتير.
🌴🌴دمتم بخير🌴🌴
.....................................
دكتور/ أمير الدماطي
استشاري أمراض الباطنة والكبد والجهاز الهضمي
مدرس بكلية الطب جامعة الأزهر بالقاهرة
ماجستير ودكتوراه أمراض الكبد والجهاز الهضمي والحميات والمناظير
استشاري بالتأمين الصحي
العنوان: ايتاي البارود، شارع الجمهوريه اعلي صيدلية عماد الدين. ت: ٠١٠٦٧٤٤٨٩٥٧ - ٠١٥٠٣٠٣٤٣٣٠
