07/09/2026
اصحابي وصاحباتي هنا ومحلك سر 😍
تعالوا واسمعها حواديتي انما ايه فالسررررر 🤣🤣🤣
طبعا الكوبليه ده مش هايفهمه الا جيل الثمانينات اللي زي 😍
ندخل بقي عالحدوته الجديده ودي حدوته بعتز بيها قوي هاقولك ليه زماااااان اول سنه فتحت فيها عيادتي في كوم حماده والحمد لله رب العالمين اول ما فتحت العياده جالي حالات وفضل من ربنا عليا كل حاله كانت بتخرج بتبعت حاله تانيه وهكذا لان كنت رافض فكرة اني اعمل دعايه وشايف ان أقوي دعايه هي شغلك وراي الناس فيك وفي يوم رحت العياده زي كل يوم بس الدنيا كانت هاديه ومفيش حالات نزلت من العياده قولت اروح اقعد عند امي تدعيلي دعوه علشان ربنا يسهل الحال وفعلا رحت قعدت مع الحاجه شويه ندردش وفوسط الكلام ايه اخبار العياده الجديده يا حمدي يابني بما انك قاعد معايا كده😁😁
قولتها تخمينك في محله انا لقيت الدنيا هاديه قولت انزل لما حد يجي وكالعاده دعتلي الدعوه اللي بحبها وبحسها كلمة السر (روح ربنا يجعل في وشك جوهره وفي حنكك سكره 😍😍) يادوب خلصت ولقيت الموبايل بيرن😄 يا دكتور معايا حاله بس شكلهم قلقان خالص متتأخرش بس كده طياره واكون موجود وفعلا رحت العياده لقيت البيه بطل قصتنا ومامته وكام حد من قرايبه معاه كان عنده ساعتها يومين بالتمام والكمال ٤٨ ساعه ومن اول بصه فهمت اللي فيها ااااااااه البيه عنده صفرا عاليه جدا فحصته وبدات اتكلم مع الاهل ومش عارف هاقول ايه الطفل صفرته عاليه جدا ولازم تحليل وممكن حجز وطبعا بما ان الناس اول مره يجوا وانا كان شكلي صغنن اوي فكنت دايما بلاقي صعوبه في اقناع الناس بس المفاجأه بقي ان الاهل كانوا عارفين كل الموضوع وكانوا عاملين التحاليل اللازمه لأنهم كانوا راحوا لحد من الزملا بس لما رجعوا له تاني يوم مكنش موجود 😱😱
بس الحلو ميكملش الصفرا فالتحليل ٢٢ وده رقم عالي جدا لطفل مكملش يومين وهنا كانت المشكله الاكبر ان الطفل لو اتحجز ومفيش تحسن بعد كام ساعه لازم يتعمله عملية تغييير دم علشان نمنع الصفرا انها توصل المخ وتعمل اعاقه ذهنيه وعضليه اتوترت شويه بس الاهل ربنا يبارك لهم كان عندهم ثقه فيا ماعرفش كانوا جايبنها منين 🤣🤣🤣ومن الثقه دي اخدت ثقه جامده واخدت القرار وحجزت الطفل في مركز الصفوة وفضلت مستني ال كام ساعه اللي هتعمل بعدهم التحليل بفارغ الصبر والنتيجه طلعت وللاسف الصفرا زادت وكده مفيش مفر من تغير الدم 😭 والمشكله في موضوع تغير الدم ده ان له مشاكل ومضاعفات ممكن تحصل للطفل تصل ل توقف القلب وعلي الرغم من ان ده اجراء عملته اكتر من مره فالمستشفي اللي اتعلمت فيها بس اول مره يتعمل باسمي بعد ما فتحت عياده وده لو تعرفوا احساس مخيف☠️👻 زي واحد طالع يقول كلمتين او خطبه لاول مره قدام الاف الناس 😱😱 لدرجه انا فكرت اني اسيبه واطلع اجري 🤣🤣🤣 وهنا هارجع واشكر اهل يوسف تاني لأنهم كانوا كلمة السر والمفتاح اللي طمني وبدأنا في العمليه ساعه كامله من التركيز الكامل وخلصنا وبقيت في انتظار نتيجه التحليل علشان اشوف اللي عملناه له تأثير ايجابي ولا لا لو اقولكم كأني مستني نتيجه الثانويه من جديد وبعد اربع ساعات تبان النتيجه الحمد لله بفضل ربنا الصفرا الغلسه اللي كانت بتزيد ووصلت ٢٤ نزلت بعد تغير الدم ل ١٦ تقريبا افتكر
وفضل بعدها بطلنا الهمام يومين تلاته فالحضانه وخرج سالما الي بيته وأهله وكانت فتحت خير عليا الحاله دي جالي بعدها حالات كتير من الصواف ولازالت الصواف من اكتر البلاد اللي بحبهم وليا ناس فيها 😍😍😍
بطلنا جه العياده مع بنت اخته الاسبوع اللي فات بقي راجل كله هيبه اصريت أتصور معاه والفرق بين الصورتين ١١ سنه حصل فيهم احدااااث كتير بس منسيتش حدوته يوسف صاحبي ❤️
