22/06/2024
ابنى انهاردة كان بيتكلم بطريقة مش مناسبة.
قلتله طريقتك دى مش مقبولة وسبته ومشيت.
بعد شوية احتجت حاجة م السوبر ماركت نديته قلتله من فضلك يا دودى انزل اشتريلنا الحاجات دى وخد ده مصروفك انت وأختك عشان لو حبيت تشترى حاجة من تحت.
هو انا ينفع أخد مصروفى عادى وشترى عادى؟
آه، عادى.
بيرجع من تحت شاريلى بمصروف يومه الشيكولاتة اللى بحبها وبيحط دراعه على كتفى ويقول أنا آسف عشان اتكلمت بطريقة وحشة
ماشى يادودى شكرا على الشيكولاتة بس من فضلك اتكلم دائما معايا بطريقة لطيفة.
حاضر، انتى عارفة انا بحس انى مكسوف لما بزعلك وألاقيكى لسه بتحبينى.
انا بحبك وهفضل احبك طول الوقت بنفس الطريقة لكن مش هقبل ابدا تكلمنى وحش.
ماشى،..وانتى بقى شغلك كان عامل ايه انهاردة؟
لما كان طفل عودتهم اللى يستهلك طاقة ماما هيحتاج يعوضها بأى شكل عن طاقتها دى حتى لو بأنه يعملها كوباية نسكافيه ويشتريلها شيكولاتة.
انهاردة لما بقى مراهق بيطبق اللى اتعود عليه من غير ما أطلب، عشان بياخد قبول وحب حتى وهو غلطان.
القبول يعنى أنا طول الوقت بوصلك رسالة ان انا بحبك حتى وانت غلطان.
بناديك باسم الدلع بتاعك حتى وانا مش عاجبانى طريقتك.
بتاخد مصروفك حتى لو سلوكك ضايقنى.
آه مش هقبل السلوك ده وآه كل سلوك وليه توابع هتتحملها.
لكن هديك حب غير مشروط.
الحب غير مشروط يعنى مفيش حاجة انت محتاج تعملها عشان أحبك.
الحب غير مشروط يعنى بحبك وانت غلطان اد مابحبك وأنت كيوت.
الحب غير مشروط يعنى بحبك وانت بتختلف معايا زى مابحبك واحنا متفقين.
Unconditional love means:
I love you no matter what and even if.
عجبتنى قصتها جدا
عرفتى تربي ❤️🌹😍
