11/07/2026
تخيل إن في يوم من الأيام، شخص قريب منك احتاج كيس دم بشكل عاجل... والسؤال كان: "هنلاقي متبرع منين؟"
السؤال ده كان بداية فكرة CoreXa.
أنا المدير التنفيذي، لتطبيق CoreXa، وحابب أعرفكم على فكرة التطبيق، وليه بنطلب بعض البيانات أثناء التسجيل، وإزاي بنحافظ على خصوصية وأمان كل مستخدم.
أولًا: إنشاء الحساب
أول ما تفتح التطبيق، هيكون عندك اختيارين:
- تسجيل الدخول لو عندك حساب بالفعل.
- أو إنشاء حساب جديد لو أول مرة تستخدم التطبيق.
أثناء إنشاء الحساب هيتم طلب:
- الاسم بالكامل.
- البريد الإلكتروني.
- الرقم القومي.
- رقم الهاتف.
- رقم الواتساب.
- تاريخ الميلاد.
- المحافظة.
- المدينة.
- فصيلة الدم.
- كلمة المرور.
ودي مش مجرد بيانات بنجمعها، لكن كل معلومة ليها هدف واضح يساعدنا نبني شبكة متبرعين موثوقة وآمنة.
- الاسم بالكامل: للتأكد من هوية المستخدم.
- البريد الإلكتروني: لاسترجاع كلمة المرور، واستقبال أي إشعارات أو طلبات تخص الحساب.
- الرقم القومي: للتأكد من صحة البيانات ومنع إنشاء حسابات وهمية أو مكررة.
- تاريخ الميلاد: للتأكد إن السن مناسب للتبرع طبقًا للشروط الطبية.
- المحافظة والمدينة وفصيلة الدم: علشان نقدر نوصل لأقرب متبرع مناسب في أسرع وقت عند وجود أي حالة.
ثانيًا: تأكيد الحساب
بعد إنشاء الحساب، هيبدأ إجراء تأكيد الحساب.
هيتم التواصل معاك من خلال رقم الهاتف أو الواتساب للتأكد إنك أنت فعلًا صاحب الحساب، وإن البيانات المسجلة تخصك، وده علشان نمنع أي شخص من تسجيل بيانات شخص آخر بدون علمه، ونحافظ على أمان التطبيق وخصوصية جميع المستخدمين.
بعد تأكيد الحساب، هيتم استكمال بعض البيانات، وهي:
- النوع.
- هل حابب تتبرع مجانًا ولا بمقابل.
- هل تقدر تتبرع داخل محافظتك فقط ولا في المحافظات القريبة.
- ولو اخترت محافظتك فقط، هل تقدر تتحرك لمحافظة مجاورة في الحالات الحرجة.
- أفضل الأوقات اللي نقدر نتواصل معاك فيها.
- كل قد إيه حابب تتبرع بالدم.
- أو تقدر تختار إن الحساب يكون مخصص للبحث عن متبرعين فقط بدون التسجيل كمتبرع.
ليه لازم يكون فيه حساب؟
كان من السهل جدًا إن أي شخص يستخدم التطبيق بدون تسجيل، لكن ده كان هيفتح الباب لإساءة الاستخدام أو الاستخدام التجاري، وده بيتعارض مع الهدف الأساسي من CoreXa.
علشان كده، كل مستخدم هيكون ليه عدد محدد من عمليات البحث خلال فترة زمنية معينة. ولو كان فيه احتياج حقيقي لعدد أكبر، يقدر يتواصل مع فريق CoreXa، وبعد مراجعة الحالة ممكن نعمل استثناء.
سياسة الاستخدام
سياسة CoreXa هتكون صارمة فيما يخص إساءة الاستخدام.
أي حساب يثبت مخالفته لسياسات التطبيق أو استخدامه بطريقة تضر المستخدمين أو تستغل المنصة بشكل غير مشروع، هيتم مراجعته يدويًا قبل اتخاذ أي إجراء، لضمان إن أي قرار يكون عادل ومبني على مراجعة حقيقية.
وفي حالة ثبوت المخالفة، هيتم تطبيق العقوبات تدريجيًا كالتالي:
- المخالفة الأولى: حظر الحساب لمدة شهر.
- المخالفة الثانية: حظر الحساب لمدة سنة كاملة.
- المخالفة الثالثة: حظر دائم ونهائي للحساب، بدون إمكانية استعادته.
هدف السياسة دي هو حماية جميع المستخدمين والحفاظ على المنصة، وليس التضييق على أي شخص ملتزم بقواعد الاستخدام.
مجاني بالكامل
حابب أوضح نقطة مهمة جدًا...
CoreXa هيكون مجاني بالكامل.
- بدون أي اشتراكات.
- بدون أي إعلانات.
- وبدون طلب أي تبرعات من المستخدمين.
وده رغم إن تكلفة تشغيل التطبيق خلال أول أربعة شهور متوقع توصل لحوالي 9,000 جنيه شهريًا، والرقم ده قابل للزيادة مع زيادة عدد المستخدمين، بالإضافة إلى تكاليف السيرفرات، والصيانة، والتطوير المستمر، واحتياج المشروع لفريق عمل كامل مع الوقت.
لكن في البداية، قررت أتحمل كل ده بنفسي.
هشتغل على التطبيق بإيدي، وهستثمر فيه وقتي، وجهدي، وسنوات من عمري، لأن هدفي الأول والأخير هو تقديم خدمة حقيقية تساعد الناس وتنقذ الأرواح، وليس تحقيق الربح.
كلمة أخيرة
بطلب من الجميع احترام المجهود المبذول في المشروع.
وأؤكد بشكل واضح إن أي محاولة لإساءة استخدام التطبيق، أو استغلاله بصورة غير قانونية، أو التعدي على حقوقه الفكرية، أو الإضرار بالمستخدمين أو بالمنصة بأي شكل، سيتم التعامل معها بكل جدية، واتخاذ الإجراءات القانونية اللازمة للحفاظ على حقوق التطبيق وحقوق جميع مستخدميه.
في النهاية...
هدفي من CoreXa إنه يكون أكبر شبكة متبرعين بالدم موثقة في مصر، ومنصة يقدر أي شخص يعتمد عليها وقت الحاجة، وتكون سببًا في إنقاذ أكبر عدد ممكن من الأرواح.
ولو وصلت لحد هنا، فأنا بشكرك على وقتك واهتمامك.
وأتمنى تشارك البوست، لأن مجرد مشاركة واحدة ممكن توصل التطبيق لشخص يكون سبب في إنقاذ حياة إنسان.
---
