Dr.Mahmoud Gamal, Mansoura (2026)

06/05/2026

حكاوي اصل التخدير
سنة 1842...في قرية صغيرة في ولاية جورجيا الأمريكية...

طبيب شاب اسمه ( كرفورد ) عمل حاجة غيرت التاريخ. لكن محدش كان مهتم وقتها او عرف

الدكتور كروفورد دة كان طبيب عادي في قرية صغيرة
يوم من الأيام... شاب اسمه جيمس جاله يشتكي من ورم صغير في رقبته لكن كان خايف جدا انه يشيله بسبب الألم اللي ممكن يتعرض له

الدكتور كروفورد ده كان بيحضر حفلات شباب القرية وفي الحفلات دي... لاحظ انهم كانوا بيستنشقوا غاز الإيثير للمتعة والضحك لكنه برده لاحظ حاجة غريبة تانية
الشباب اللي بيستنشقوا الغاز دة بيقعوا علي الارض و بيتخبطوا ...ومش بيحسوا بالألم!

قال لنفسه:
"طيب... لو استخدمت الغاز ده على المريض؟"

30 مارس 1842
الدكتور كروفورد خلّى جيمس يستنشق الإيثير .. جيمس نام...شال الورم من رقبته ..جيمس صحي وقال مكنتش حاسس باي حاجة او بأي الم.

أول عملية بتخدير في التاريخ!
لكن... الدكتور كروفورد كان طبيب بسيط في قرية صغيرة و محدش عرف عن اللي عمله وقتها...مكتبش ورقة علمية...محكاش لحد..قعد ساكت.

مرت 4 سنين..
سنة 1846... دكتور تاني اسمه ويليام مورتون عمل نفس التجربة لكن قدام الناس في مستشفى كبير بحضور أطباء وصحفيين والعالم كله عرف!

وليام مورتون بقى مشهور و اصبح أبو التخدير

والدكتور كروفورد؟ لما سمع الخبر...حاول يثبت إنه هو الأول .. جاب شهود... أثبت التواريخ... الناس صدقوه...لكن كان متأخر، الشهرة راحت لغيره

التاريخ كتب اسم مورتون... مش كروفورد

كروفورد لونج مات سنة 1878 بدون شهرة بدون تكريم بدون اعتراف

لكن العدالة جت... متأخر بعد موته بسنين...الناس بدأت تعرف الحقيقة

سنة 1926... اتعمله تمثال
سنة 1940...حطوا صورته على طابع بريد
المستشفيات سموا أقسام تخدير باسمه
الاعتراف جه... لكن بعد ما مات....

في ناس كتير غيّروا العالم...ومحدش عرف
في أبطال عملوا المعجزات...ومحدش افتكرهم

والحقيقة...أطباء التخدير طول عمرهم كده...أبطال منسيون

الإجراء الجراحي الناجح... شغل فريق كامل
الجراح... التمريض... وطبيب التخدير
كل واحد ليه دور حاسم
لكن طبيب التخدير...
دوره غير مرئي للأهل اللي مستنيين برا اوضه العمليات
شغله صامت... لكن حاسم

💡 الدرس من القصة:
كروفورد لونج عمل اللي عليه .. ساعد مريضه .. غير حياته ومنتظرش مقابل، الناس معترفتش بيه في حياته
لكن في النهاية التاريخ افتكره

انت كمان
اشتغل صح اعمل اللي عليك ساعد الناس بإخلاص حتى لو محدش شاف حتى لو محدش شكر
حتى لو محدش قدر.. الحق مش بيضيع
وفي يوم...العالم كله ممكن يعرف

🙏 شكرا لكل إنسان بيشتغل في الظل...
🙏 شكرا لكل طبيب تخدير...بيشتغل في الظل... عشان المريض يرجع لأهله بالسلامة

📌 البوست اللي جاي : جون سنو - أول طبيب متخصص تخدير في التاريخ 🎩
القصة المذهلة للراجل اللي خدر الملكة فيكتوريا نفسها!
تابعوا...

#التخدير

02/05/2026

الثورة - كيف تغيرت الدنيا

بعد يوم 16 أكتوبر 1846...
العالم اتقلب رأساً على عقب

التخدير مكنش مجرد اختراع طبي، كان ثورة غيرت البشرية

عمليات كانت مستحيلة... بقت ممكنة:

قبل التخدير:
الجراح كان عنده دقايق معدودة.
المريض بيصرخ من الألم.
العملية لازم تخلص بسرعة... قبل ما المريض يموت من الصدمة.

بعد التخدير:
الجراح بقى يقدر ياخد وقته.
يشتغل بدقة.
يفتح الصدر... يوصل للقلب... يصلح الخلل.

💓 عمليات القلب المفتوح:
قبل التخدير ← مستحيلة
بعد التخدير ← بتنقذ ملايين
الجراح بقى يقدر يفتح الصدر لساعات...
يصلح صمامات... يغير شرايين... يزرع قلب جديد.

كل ده... عشان المريض نايم بأمان.

🧠 جراحات المخ والأعصاب:

تخيل...
تفتح جمجمة إنسان وهو صاحي؟
مستحيل

لكن التخدير خلى الجراحين يدخلوا للمخ البشري...
يشيلوا أورام... يعالجوا صرع... ينقذوا أرواح.

👶 القيصرية الآمنة بدون الم:

قبل التخدير الحديث...
الولادة القيصرية كانت حكم بالإعدام على الأم في معظم الأحيان.

دلوقتي؟
ملايين الأمهات والأطفال بيتم انقاذهم كل سنة.

🫁 زراعة الأعضاء:

قلب... كبد... كلى... رئة...
كل عمليات الزرع دي مستحيلة من غير تخدير.
المريض بينام... بيصحى بعضو جديد... وحياة جديدة.

📊 الأرقام المذهلة:

منذ اكتشاف التخدير...
مئات الملايين من العمليات تمت بفضل الله بنجاح.
أمراض كانت حكم بالإعدام... بقت قابلة للعلاج.

🌍 التخدير مش مجرد دوا:

التخدير هو اللي فتح الباب ل
- ✅ الجراحة الحديثة
- ✅ علاج السرطان
- ✅ إصلاح التشوهات الخلقية
- ✅ عمليات الطوارئ المنقذة للحياة
- ✅ جراحات التجميل
- ✅ طب الأطفال المتقدم

من غير تخدير... كل ده كان مستحيل.

كل مرة تسمع عن عملية جراحية نجحت...
كل مرة تشوف حد اتعالج من مرض خطير...
لازم فى كل مرة نشكر ربنا على نعمة الطب الحديث...

📌 الجزء القادم: التخدير الحديث - من الإيثير للتكنولوجيا🔬
كيف تطور التخدير من غاز بسيط... لعلم معقد ودقيق؟

تابعونا...

#التخدير

11/04/2026

دكتور... أنا عندي مشكلة في الغدة الدرقية... ممكن ده يعملى مشكلة مع التخدير او الجراحة؟

قبل ما نجاوب على السؤال ده فيه حاجات مهمة لازم تعرفها 👇

🔬الغدة الدرقية ليها تأثير مباشر على:
- سرعة ضربات القلب
- ضغط الدم
- درجة حرارة الجسم
- استجابة الجسم للأدوية

يعني...بتتحكم في سرعة شغل الجسم كله

⚙️ ومشاكل الغدة الدرقية ممكن تكون

فرط نشاط: الغدة بتشتغل أكتر من اللازم ← القلب سريع، عرق كتير، توتر، نزول وزن
قصور: الغدة بتشتغل أقل من اللازم ← خمول، زيادة وزن، برودة، بطء في القلب

🩺إيه علاقة ده بالتخدير؟

الغدة غير المنضبطة ممكن تسبب:
- تسارع أو بطء خطير في القلب أثناء التخدير
- مشاكل في درجة الحرارة
- استجابة غير متوقعة للأدوية

لكن..لو حالتك مستقرة على العلاج ← الإجراء الإجراحى بيكون اكثر امان باذن الله

✅ إمتى بنكون مطمنين للتخدير و الجراحة ؟
- منتظم على أدويتك
- تحاليل الغدة قريبة من الطبيعي
- مفيش أعراض شديدة
- القلب مستقر

🚨إمتى نأجل؟

لو الغدة مش منضبطة خالص:
- القلب بينبض بسرعة شديدة (فوق 120)
- التحاليل بعيدة عن الطبيعي
- أعراض واضحة وشديدة

و دة علشان نتجنب مضاعفات خطيرة أثناء التخدير.
لكن بعد ضبط الحالة... العملية عادية تماما

💊نصايح مهمة:
1️⃣ متوقفش أدويتك قبل العملية .. كملها عادي حتى يوم العملية
2️⃣ قول لطبيب التخدير ومتخبيش الموضوع
3️⃣ جيب آخر تحاليل غدة - حتى لو من شهرين
4️⃣ لو حالتك مش مستقرة لازم نظبطها الأول مع طبيب الباطنة/الغدد

✅ الغدة الدرقية مش عائق ادام العمليات
✅ الشرط الوحيد:الانضباط على العلاج
✅ ملايين الناس عندهم مشاكل في الغدة وبيعملوا عمليات بأمان كل يوم
✅ المهم... الصراحة مع الطبيب

---

📌 لو عندك سؤال... اكتبه وأنا هرد عليك 👇

#التخدير #طمأنينة

07/04/2026

دكتور... أنا خايف يكون عندي حساسية من البنج! 🩺🚫

السؤال ده بسمعه كل يوم تقريبا، وعشان كدة لازم نتكلم بعلم وبصراحة تامة

الحقيقة العلمية:
مفيش حاجة اسمها حساسية من البنج بالمعنى المرعب اللي الناس فاهماه. أدوية التخدير حاليا الحمد لله الحساسية منها نادرة جدا يمكن حالة واحدة بس من كل 20,000 عملية جراحية

🤔 طيب ليه الناس بتقول عندي حساسية؟
غالبا بيكون فيه لخبطة بين 3 حاجات:

1️⃣ أعراض جانبية عادية: (غثيان، صداع، رعشة خفيفة) دي آثار طبيعية للأدوية وبتروح في ساعات، مش حساسية خالص
2️⃣ حساسية من دواء تاني: إحنا بنستخدم مضادات حيوية ومسكنات وقت العملية، وغالبا الحساسية بتكون منها هي، مش من مادة البنج
3️⃣ رد فعل طبيعي: هبوط الضغط أو التوتر الشديد بسبب حالة القلب أو القلق وده تفاعل جسمك مع الظروف، مش حساسية

💀 بس أنا سمعت إن حد مات من حساسية البنج!
بكل صراحة لو حصلت وفاة لا قدر الله في عملية، السبب غالبا بيكون مضاعفات من الجراحة نفسها، أو نزيف، أو حالة القلب. لكن عشان التفاصيل دي معقدة، الجملة الأسهل دايما هي: مات من البنج، وده ظلم للحقيقة

🛡️ لو حصلت حساسية حقيقية.. إيه اللي بيحصل؟

✅ أجهزة المراقبة بتبلغني بأي تغير في جسمك بالثانية، حتى قبل ما تظهر عليك أي أعراض واضحة.. إحنا بنسبق المشكلة بخطوة
✅ أدوية الطوارئ بتكون جنبي دايماً، وفيها كل الأدوية اللي بتعادل الحساسية دي وبترجع جسمك لوضعه الطبيعي في لحظتها
✅ إحنا مش بنجتهد إحنا بننفذ خطوات علمية عالمية متدربين عليها آلاف المرات، وبنتعامل بمنتهى الهدوء والدقة علشان تخرج بالسلامة باذن الله

الخلاصة: حساسية البنج نادرة جدا والتعامل معاها علميا بقى في قمة الاحترافية والأمان

قولولنا.. هل سألك دكتور التخدير قبل كدة عن حساسية الأكل أو الأدوية؟ ولو عندك تجربة مع الحساسية احكيها لنا عشان الكل يستفيد. 👇

24/03/2026

دكتور... أنتم مستعجلين عليا ليه؟ 🩺⏱️ | بين "روتين" الطبيب.. و"رهبة" المريض

جملة بسمعها كتير من المرضى قبل العمليات.
وعايز أقولكم الحقيقة...

أنا فاهم الإحساس ده
لما تدخل غرفة التحضير او غرفة العمليات
وتلاقي الفريق بيتحرك بسرعة
بيجهزوا الأجهزة، بيحضروا الأدوية، بيكلموا بعض بمصطلحات مش فاهمها

ممكن تحس إنهم مش واخدين بالهم منك

بس الحقيقة مختلفة تماما
الفريق ده عمل آلاف العمليات
بالنسبالهم... ده يوم عمل عادي

بالنسبالك؟
ده أهم يوم في حياتك
وده الفرق

الفريق مش مستعجل عليك...
هم متعودين على الإجراءات دي

زي ما أنت لو شغال في شغلك كل يوم...
بتعمل نفس الحاجات بسرعة وبدون تفكير
لكن بالنسبة لحد جديد؟ ممكن يحس إنك مش مهتم

الحقيقة ان كل حركة سريعة دي...عشانك أنت
السرعة دي... خبرة مش استعجال و لا قلة اهتمام

لكن لو حسيت إن الفريق مستعجل...
اعرف إن:
✅ هم مش مستعجلين عليك... هم متمرسين
✅ كل واحد فيهم عارف دوره بالظبط
✅ السرعة دي جزء من الاحترافية مش إهمال
✅ وفي النهاية...سلامتك هي الأولوية الوحيدة

💬 رسالتي ليك:
لو حاسس بقلق أو عندك سؤال قبل العملية...
قوله مهما كان الفريق مشغول...
حقك تسأل وتطمن
ومهما كانت الحركة سريعة...
كل واحد فيهم شغال عشان سلامتك

أنت مش "حالة رقم 5 النهاردة"...أنت إنسان... وده اللي المفروض نفتكره كلنا

📌 لو حسيت بده قبل عملية... شاركنا تجربتك في الكومنتات.
ولو عندك سؤال... اسأل وأنا هرد عليك ❤️

#التخدير #طمأنينة #احترافية

14/03/2026

التخدير... النعمة اللي مابنحسش بيها إلا لما نفكر فيها 🙏💙

كل يوم وأنا بشتغل في أوضة العمليات...
بفكر في حاجة واحدة:
لو مكنش فيه تخدير... كان إيه اللي هيحصل للمريض ده؟

تخيل إنك لا قدر الله محتاج عملية جراحية... أي عملية
زايدة، مرارة، قيصرية، كسر في العظم، ورم لازم يتشال

تخيل نفسك صاحي... وأنت بتحس ب
⚡ المشرط وهو بيشق الجلد
⚡ الأنسجة وهي بتتقطع
⚡ العظم وهو بيتنشر

💔 الألم... ميتوصفش

ده مش ألم عادي... ده ألم يخلي الإنسان:
يفقد وعيه من الصدمة
قلبه يقف من شدة الألم
يتمنى الموت على الحياة

وده اللي كان بيحصل فعلا... قبل اكتشاف التخدير

سنة 1811، كان فيه جراح اسمه ( دومينيك لارى )
كان بيعمل عملية بتر رجل لجندي مصاب

العملية استغرقت... دقيقتين ونص فقط!

ليه بسرعة كده؟ 🤔

لأن الجندي كان صاحي...
والألم كان لا يطاق لدرجة إن الجراح كان لازم يخلص بأسرع ما يمكن قبل ما المريض يموت من الصدمة!

كانوا بيربطوا المريض بالحبال في السرير...
وهو بيصرخ ويتوسل ويستغيث

والجراحين كانوا بيتعلموا يبقوا "أسرع"... مش "أدق" 💔

✨ جات سنة 1846... ونزلت النعمة

أول عملية بالتخدير في التاريخ
مريض نام... والجراح شال ورم من رقبته

المريض صحي وقال: مكنتش حاسس بأى حاجة

الناس اللي كانت شايفة العملية... انبهرت و صقفت ووقفت على رجليها

ليه؟
لأنهم شافوا معجزة...
شافوا رحمة ربنا بالبشرية

🩺التخدير... مش مجرد دوا
التخدير ده درع حماية بيشيل عنك:

🛡️ ألم المشرط (اللي كان يخلي الناس تموت من الصدمة)
🛡️ ألم الجراحة (اللي كان يمنع عمليات كتير تتعمل أصلاً)
🛡️ ألم ما بعد الجراحة (لأننا بنديك مسكنات قوية وأنت نايم ومرتاح)

التخدير بيشيل عنك أذى كبير جدا...
أذى جسدي ونفسي وعقلي

بدون التخدير:
❌ مفيش عمليات قلب مفتوح
❌ مفيش زراعة أعضاء
❌ مفيش قيصريات آمنة تنقذ الأم والجنين
❌ مفيش استئصال أورام سرطانية
❌ مفيش إصلاح كسور معقدة

ملايين الأرواح كانت هتضيع... لولا نعمة التخدير 🙏

أنا كطبيب تخدير...
كل يوم بشكر ربنا على النعمة دي

لما بشوف مريض نايم بسلام...
وأنا عارف إن جواه عملية كبيرة بتحصل...
وهو مش حاسس بأي حاجة...
مش حاسس بالألم، مش خايف، مش قلقان...

بحمد ربنا

لأن من 200 سنة بس...
نفس المريض ده كان هيعاني من عذاب لا يوصف

ربنا سبحانه وتعالى قال:
"وَإِن تَعُدُّوا نِعْمَةَ اللَّهِ لَا تُحْصُوهَا"

والتخدير من أعظم النعم في الطب الحديث

نعمة إننا نقدر نعالج المرضى...بدون ما نعذبهم
نعمة إننا ننقذ أرواح... بدون ألم
نعمة إن الإنسان ينام...ويصحى سليم معافى

الحمد لله على نعمة العلم
الحمد لله على نعمة التخدير
الحمد لله على كل نعمة... ظاهرة ومستترة 🙏

📌 لو أنت أو حد من أهلك عنده عملية قريب وعندك:
❓ سؤال عن التخدير
😰 تخوف أو قلق
🤔 شك في معلومة سمعتها

اكتبلي في الكومنتات وأنا هرد عليك

مافيش سؤال غبي في الطب...
كل سؤال مهم، وكل تخوف له رد علمي يطمنك ❤️

#التخدير #نعمة #طب #شكر #رحمة #صحة

08/03/2026

كيف يعود وعيك بعد التخدير؟ | رحلة الدقائق الخمس في "الإفاقة" 🩺

تخيل معايا...
أنت نايم في عمق مطلق. مفيش أحلام، مفيش إحساس بالوقت، مفيش حتى وجود.

فجأة... صوت بعيد بيناديك باسمك.
"أحمد... أحمد... حمد الله على السلامة العملية خلصت... قول الحمد لله"

🌅 الدقيقة الأولى:
دماغك بدأت تستقبل إشارات تاني.
الأدوية بدأت تتكسر في الكبد والكُلى.
خلايا المخ بترجع للحياة واحدة ورا التانية.
(لكن أنت لسه مش واعي تماماً)

👁️ الدقيقة الثانية:
جفونك بتترعش... بتحاول تفتح.
بتسمع أصوات الأجهزة حواليك.
"بيب... بيب... بيب" (جهاز القلب)

🧠 الدقيقة الثالثة:
دماغك بدأت تفتكر: "أنا فين؟"
الذاكرة بترجع تدريجي...
"آه... أنا كنت داخل عملية!"
بتحس بإيد ماسكة إيدك: "أنت كويس، حمد الله على السلامة ❤️"

💪 الدقيقة الرابعة:
بتقدر تتكلم (صوتك متعب و مش قادر)
"أنا... كويس؟"
"أيوة، كل حاجة تمام والحمد لله"
الجسم بيبدأ يحرك الأطراف.
القلب والضغط والتنفس... كلهم مستقرين ✅

🕊️ الدقيقة الخامسة:
صحيت تماماً.
بتبص حواليك... بتشوف الناس.
أول سؤال: "خلصنا؟"
"خلصنا والحمد لله، أهلك برة مستنيينك"

التخدير الحديث مش "نوم عميق" عادي...
ده حالة من غيبوبة مؤقتة نقدر نتحكم فيه ونرجعك منها

لما نوقف أدوية التخدير:
✅ الجسم بيتخلص منها في دقايق
✅ الدماغ بترجع لنشاطها الطبيعي تدريجيا
✅ المراكز الحيوية (تنفس، قلب) بترجع شغالة لوحدها
✅ الوعي بيرجع من الأعماق للسطح... زي ما الغواص بيطلع من قاع البحر 🌊

💭 ليه بنحس بحاجات غريبة وقت الصحيان؟

🔹 "إحساس بالبرد" → طبيعي! درجة حرارتك بتنزل شوية أثناء التخدير
🔹 "دوخة خفيفة" → الدماغ لسه بتضبط نفسها
🔹 "نسيان لحظات الصحيان" → الأدوية بتأثر على الذاكرة قصيرة المدى
🔹 "احتقان في الزور" → من أنبوبة التنفس (هيروح في ساعات)

كل ده طبيعي 100% ✅

كل يوم بشوف عشرات المرضى بيصحوا من التخدير.
ودايماً اللحظة دي مؤثرة...

لحظة ما الإنسان بيرجع للحياة تاني.
لحظة ما الخوف بيتحول لطمأنينة.
لحظة ما المريض بيفتح عينيه ويقول: "الحمد لله"
دي من أجمل لحظات شغلي 🙏

📌 لو أنت عملت عملية قبل كده...
إيه أول حاجة افتكرتها لما صحيت؟
شاركنا في الكومنتات 👇

#التخدير #الإفاقة #طمأنينة #صحة

06/03/2026

بتروح الجيم؟ البوست ده ممكن ينقذ حياتك في يوم من الأيام

بتقضي ساعات في الجيم، بتحسب أكلك بالجرام، وبتاخد مكملاتك ومنشطاتك بانتظام عشان توصل لهدفك.. مجهود جبار وبرافو عليك. بس خلى بالك جسمك (الرياضي) ده بالنسبة لينا في أوضة العمليات هو "ماكينة قوية جداً" ومختلفة عن أي حد تاني.

و بنحتاج نعرف منك كل تفصيلة في مكملاتك،علشان نفصل جرعة تخدير على مقاسك بالظبط:

1️⃣ال (Pre-workout) ونبض القلب:
لما بنعرف إنك بتاخد محفزات طاقة، بنبقى مستعدين بخطة توازن لضربات قلبك وضغطك؛ عشان نضمن إن جسمك يفضل في حالة (هدوء تام) طول فترة العملية مهما كان تأثير المنبهات دي عالي.

2️⃣ المنشطات (Anabolic Steroids) وكفاءة الإفاقة:
المنشطات بتغير سرعة حرق الجسم للأدوية (عن طريق إنزيمات الكبد). لما بنعرف نوعها، بنختار لك توليفة بنج ذكية، جسمك ميتعبش في التخلص منها، فتفوق بسرعة وبأقل مجهود.

3️⃣ المكملات العشبية "المنسية":
حتى الحاجات البسيطة زي (الجينسينج أو الثوم) ممكن تزود سيولة الدم. معرفتنا بيها بتخلينا نأمنك ضد أي نزيف، ونحافظ على استقرار أجهزتك الحيوية.

طيب والبروتين والكرياتين؟ دول بشكل عام يعتبروا الأكثر أمانًا، لكن لازم برضه تبلغنا بيهم.

لما تقابل طبيب التخدير، لازم تكون صريح معاه 100%. إحنا مش هنا عشان نحكم عليك، إحنا هنا عشان نحميك.

قول على كل حاجة بتاخدها، مهما كانت بسيطة. اسم المكمل، نوع المنشط، حتى لو فيتامينات عادية. كل معلومة بتديها لينا بتساعدنا نحط خطة التخدير المثالية والآمنة ليك.

اعمل منشن لصاحبك اللي بيروح الجيم، المعلومة دي ممكن تكون أهم حاجة يقرأها النهاردة.

# #تخدير

03/03/2026

ليه دكتور التخدير بيسألك عن 'اسنانك' قبل ما يخدرك؟" 🦷💉

إنت عندك سنة بتلخلخ؟.. مركب طقم؟.. عامل تقويم أو تركيبات؟
سؤال غريب بنسأله للمريض في 'فحص ما قبل العملية' وبنلاقي استغراب كبير: 'يا دكتور أنا داخل أعمل مرارة، إيه دخل سناني في الموضوع؟'

الحقيقة إن سنانك هي 'بوابة الأمان' لرئتك، والسبب علمي بحت:

1️⃣ طريق الهواء: وإنت نايم تحت البنج الكلي، دوري كدكتور تخدير إني أضمن إن النفس شغال بانتظام. عشان كدة بنركب (أنبوبة التنفس) باستخدام جهاز صغير بنحرك بيه اللسان شوية عشان نشوف مجرى الهواء.
2️⃣ الخطر المستتر: لو فيه سنة بتلخلخ أو تركيبات مش ثابتة، ممكن مع حركة الجهاز البسيطة تقع وتدخل -لا قدر الله- في مجرى الهواء أو الرئة، وده بيعمل كارثة طبية إحنا في غنى عنها.
3️⃣ حماية 'ابتسامتك': لما بنعرف إن فيه (فينيرز) أو تركيبات غالية، بنتعامل بمنتهى الحرص وبنستخدم أدوات وتقنيات معينة عشان نركب انبوبة التنفس من غير ما نلمس سنانك أو نجرحها.

نصيحة مهمة:
الأمانة الطبية بتبدأ من التفاصيل الصغيرة. لما دكتور التخدير يسألك عن سنانك، اعرف إنه خايف على (نفسك) قبل (ضحكتك). صرح بكل تفاصيل أسنانك عشان تضمن رحلة تخدير آمنة وإفاقة بسلامة.

قولولي.. مين فيكم استغرب السؤال ده قبل كدة؟ وهل كنت تعرف إن سنانك ليها علاقة بالتنفس وقت البنج؟ 👇

01/03/2026

كتير منكم فاكرين إن دور دكتور التخدير بينتهي بعد الحقنة... وإن الباقي مجرد شرب قهوة.

الحقيقة إن دي اللحظة اللي بيبدأ فيها التركيز الحقيقي. كل نفس، وكل نبضة قلب بتبقى أمانة في رقبتنا لحد ما المريض يفتح عينيه بالسلامة ويرجع لأهله.

اللي على الترابيزة ده مش مجرد "حالة"، ده حياة إنسان.

اعمل منشن لدكتور تعرفه يستاهل كلمة شكر على مسؤوليته دي.

#طب #صحة #مصر
#اكسبلور

25/02/2026

دوخة و تعب ما قبل المغرب فى رمضان.. إرهاق صيام طبيعي ولا إنذار خطر؟" 🚑🌙

الساعة 4:00 العصر.. الساعات الأخيرة قبل الفطار... طبيعى ممكن نحس بشوية مجهود أو صداع بسبب نقص المياة والكافيين.. لكن أحيانا الجسم بيبعت رسايل تانية محتاجة مننا (تركيز) مش قلق.

بصفتي دكتور تخدير و عناية مركزة، هقولك إزاي تفرق بين 'تعب الصيام' وبين هبوط السكر أو الضغط الحقيقي، وإيه التصرف الصح:

1️⃣ إمتى أشك إن عندي هبوط (سكر)؟
لو حسيت برعشة واضحة في الإيد، عرق بارد (رغم إن الجو مش حر)، وضربات قلب سريعة جداً.
التصرف الصح: لو عندك (جهاز سكر) في البيت، قيس فورا. لو السكر أقل من 70، هنا لازم تتدخل.

2️⃣ إمتى أشك إن عندي هبوط (ضغط)؟
لو حسيت بزغللة في العين أو دوخة 'خفيفة' بتزيد أول ما تقف فجأة.
التصرف الصح: نام على ظهرك وارفع رجلك لمستوى أعلى من قلبك لمدة 10 دقائق؛ ده بيساعد الدم يوصل للمخ وهتحس بفرق كبير فوراً من غير ما تضطر تفطر.

3️⃣ إمتى يكون 'الإفطار' ضرورة طبية؟
لو المريض (مريض سكر معروف) وبدأ يحس بتوهان، أو مش عارف يجمع كلامه، أو السكر نزل عن المعدلات الآمنة والجهاز أكد ده. في اللحظة دي 'الرخصة الطبية' موجودة لأن صحتك أمانة.

نصيحة مهمة:
لو الدوخة بتكرر معاك يوميا، راجع سحورك.. ركز على الفول، البطاطس، أو الزبادي؛ لأنها بتديك طاقة 'طويلة المدى' وبتحافظ على ثبات سكرك وضغطك لأطول فترة ممكنة.

طمنوني.. مين فيكم جرب حركة 'رفع الرجل' دي قبل كدة وحس بفرق؟ وهل فيه حد بيعاني من الدوخة دي بشكل متكرر فى رمضان؟ 👇

Dr.Mahmoud Gamal

06/05/2026

02/05/2026

11/04/2026

07/04/2026

24/03/2026

14/03/2026

08/03/2026

06/03/2026

03/03/2026

01/03/2026

25/02/2026

Address

Website

Alerts

Shortcuts

Share

Category