عيادة د.أسامة الواعر لطب الأطفال

23/08/2026

علم ابنك إن يكون له هواية

مش كل وقت الطفل لازم يكون مذاكرة أو دروس أو موبايل
خليه يعرف إن في حاجة بيحبها ويستمتع بيها من غير ما يكون الهدف منها درجات أو منافسة

الهواية بتعلم الطفل الصبر والاستمرار وبتقوي ثقته بنفسه
الأطفال نعمة كبييرة من ربنا 🤍🤍🤍
شكرا جزيلا للفنانة وفاء اللاهوني علي الدعوة 🌹🙏
Wafaa Ellahoony

21/08/2026

من أسبوع وأنا بسأل كل أم داخلة تكشف..
▪️ابنك بياكل كويس ولا لأ؟
تخيلوا إن كل الحالات اللي شوفتها طول الأسبوع كانت الإجابة واحدة

ابني مش بياكل
ابني أكله وحش جدا

يمكن حالتين بس اللي أمهاتهم قالوا ابني بياكل كويس
مع إن ولا واحدة منهم كانت جاية أصلا بسبب مشكله في الأكل

فهل فعلا أغلب أطفالنا مش بياكلوا؟
ولا إحنا بقينا نقيس أكل الطفل على شهيتنا وإحنا كبار؟

والحقيقة بكل وضوح
إحنا عاوزين الطفل ياكل زينا
وده ببساطة مش هيحصل

الطفل له احتياجه الخاص وله شهيته الخاصة ومش معنى إنه أكل أقل من اللي إحنا متوقعينه إنه عنده مشكلة

▪️طيب إيه اللي نعمله عشان نحسن شهية الطفل؟
نظم مواعيد الأكل
٣ وجبات رئيسية ووجبتين خفيفتين
قلل اللبن والعصائر قبل الأكل خصوصا لو بياخد منهم كميات كبيرة
قدم له كمية صغيرة مناسبة لسنه وسيبه يطلب الزيادة لو لسه جعان
خلي الأكل وسط الأسرة ومن غير موبايل أو تلفزيون وخلي وقت الأكل هادي من غير زعيق ولا ضغط ولا خناقات
نوّع له الأكل وكرر تقديم الأصناف حتى لو رفضها قبل كده
▪️ولو الشهية ضعيفة بشكل واضح لازم ندور على السبب
-أنيميا
-إمساك
-مشاكل في الأسنان أو المضغ
ارتجاع
-أو أي مرض مزمن ممكن يكون مأثر على الأكل

▪️أما أدوية فتح الشهية فمش كل طفل محتاجها ومش المفروض تكون أول حل

🔶بعض المستحضرات تحتوي على Lysine وقد تساعد في بعض الحالات
🔶وكذلك Cyproheptadine مثل ترياكتين ممكن يساعد بعض الأطفال لكن استخدامه لازم يكون تحت إشراف طبي

د/أسامة طارق الواعر🌹

17/08/2026

-ابنك بيعمل امساك يام محمد؟
-لا لا يادكتور بيعمل كل يوم عادي
بس يادكتور بنسمع الحزق بتاعه واحنا في الصالة 😂😂😂😂
مهو دا امساك يام محمد
▪️تشخيص الامساك في الاطفال لازم احنا اللي نركز فيه لان الطفل عمره ماهيقول انا عندي امساك زينا

🔶اهم علامات الامساك في الاطفال:-
* براز صلب على شكل كرات صغيرة
* ألم أو صعوبة واضحة أثناء التبرز
* الحزق الشديد أو البكاء أثناء التبرز
* طفل بيحاول يمسك البراز أو يرفض دخول الحمام
* إحساس إن البراز لسه موجود ومش بيطلع كله
* انتفاخ أو ألم متكرر بالبطن
* اتساخ الملابس بالبراز أو تسريب براز عند الطفل اللي كان متحكم في التبرز ودي علامة مهمة في الإمساك المزمن

د/أسامة طارق الواعر🌹

14/08/2026

بيني وبين إيهاب

🔶حوار مع رجل صغير عن أسئلة مشهورة للامهات في طب الأطفال

-إيهاب: يا دكتور إيه رأيك في التطعيمات الإضافية؟
أنا: لو نقدر ماديًا نوفرها للطفل يبقى الأفضل ناخدها طبعا

-إيهاب: إيه الفرق بين الإمساك والديسكزيا؟
أنا: الديسكزيا الرضيع يزق ويعيط لكن البراز لين أما الإمساك فغالبًا البراز صلب ومؤلم

-إيهاب: يعني إيه ديسكزيا بالعربي؟
أنا: عسر التبرز عند الرضيع وغالبًا بتتحسن لوحدها

-إيهاب: هو إيه موضوع البكتيريا النافعة ده؟
أنا: دي البكتيريا الموجودة في أمعائنا وليها أدوار مهمة في الجهاز الهضمي زي تحسين الهضم وتنظيم حركة الأمعاء وبتساعد في بعض حالات المغص والإمساك والإسهال.
ولها أنواع وسلالات كتير وكل سلالة ليها دور مختلف في علاج بعض مشاكل الجهاز الهضمي.

-إيهاب: حاسك بتحبها اووي موضوع البكتيريا النافعة دا يادكتور؟
أنا: بصراحة اه جدا وجايبة نتايج هايلة مع الحالات ياهوبة

-إيهاب: طيب أبدأ أكل إمتى؟
أنا: غالبًا من 4 إلى 6 شهور مع استمرار الرضاعة

-إيهاب: وآكل إيه الأول؟
أنا: الخضار المسلوق و تفاح مسلوق و الحبوب المطحونة او سريلاك

-إيهاب: إمتى نقول إن الطفل متأخر في التطور الحركي؟
أنا: تقريبًا يثبت رأسه عند 4 شهور ويقعد عند 6 الي ٧ شهور ويزحف عند 9 شهور ويقف عند سنة لو اتاخر في الحاجات دي نراجع طبيب الاطفال

-إيهاب: ولو ما زحفش؟
أنا: مش مشكلة بالضرورة بعض الأطفال بيتخطوا مرحلة الزحف

-إيهاب: طب المشاية بتأخر المشي؟
أنا: اه ممكن لان الطفل يعتمد عليها

-إيهاب: لو ماما حست اني فيه نسبة حول في عيني إمتى نكشف؟
أنا: أي حول ثابت يحتاج كشف
انما لو بيروح ويجي ممكن نصبر لعمر ٤شهور ثم تقييمه عند طبيب عيون أطفال

-إيهاب: إمتى آكل حلويات علي بابا أصل بابا مدير المحلات؟ 😂
أنا: الأفضل تجنب السكريات والحلويات قبل سنتين قدر الإمكان

-إيهاب: إمتى آكل لحمة وفراخ؟
أنا: من حوالي 6 شهور مسلوقة كويس ومفرومة أو مهروسة وطرية

-إيهاب: إمتى أقلع البامبرز؟
أنا: غالبًا من عمر سنتين لما الطفل يكون مستعد ويفهم التعليمات مش بالسن بس

-إيهاب: إمتى أروح السباحة؟
أنا: ممكن من حوالي ١٠ شهور للتعود على الميه لكن لازم إشراف شخص ملاصق للطفل طول الوقت

-إيهاب: إمتى أمسك الفون؟
أنا: الأفضل تجنب الشاشات قبل سنتين قدر الإمكان

-إيهاب: وإمتى أنام لوحدي في سريري
أنا: من أول يوم ممكن تنام في سريرك لكن في نفس غرفة بابا وماما

دكتور /أسامة طارق الواعر
المحاور /ايهاب مصطفي عرفة
🌹🌹🌹

13/08/2026

أيها الابن والاخ 🌹
قل لأبيك وأمك وأهلك ومن حولك بلا خجل ولا انكسار إن الذي وهبني عقلا لم يسلبني القدرة على التعلم وإن الذي أنعم علي بجسدي لم يمنعني أن أمضي به إلى ما أريد وإن كان في طريقي من المرض ما يثقل الخطى فلن يكون أقوى من عزيمتي
وأنا شخصيا اعلم احد الاخوة الزملاء ابتلاه الله بالسكري من صغره وهى الان طبيب بارع في مجاله يشار اليه بالبنان
فامضي حيث قدر لك الله ولا تلتفت لأحد
د/أسامة طارق الواعر 🌹

13/08/2026

12/08/2026

جاءتني طفلة جميلة إلى العيادة أمس اسمها (وَنَسْ) وكانت وَنَسًا بالفعل🌹❤️

10/08/2026

متشكرين ياعم أحمد 😂😂😂
انا بقول مفيش فايدة برضه😂😂😂

02/08/2026

‏كَبُرْتُ على التصابي غيرَ أني
‏أَعُودُ إلى الصِّبا في حِضْنِ أُمي

‏إذا مَسَحَتْ عليّ براحتَيها
‏تَجَلَّتْ بَسْمَتي وانزاحَ هَمّي