د مدحت مخلوف اطفال اخصائي طب الأطفال و حديثي الولادة

06/09/2026

14/05/2026

اقسى ألم قد تشعر به امرأة… قد تتحمله وهي تدعو فقط أن يأتي طفلها بخير🥺♥️
تنسى وجعها كله مع أول نظرة، وأول لمسة، وأول بكاء لطفلها
لهذا… رفقًا بالأم، فهي خاضت معركة بين الألم والحب… وانتصر قلبها

14/05/2026

تعالي اكلمك شوية عن مخ الطفل اللي عايزة تدربيه علي الحمام 😂

بصي يا ماما، طفلك ذكي جدا و مخه يقدر يستوعب معني التدريب علي خلع الحفاض و معني التوليت من سن ٢ ونص ل ٣ 😉

بمعني انه يقدر كويس يحس بالإحتياج لدخول الحمام، و يقوم يمشي يروح لهناك، يقدر كمان يخلع ملابسه و يعمل حمام و يغسل ايده و كل دا بدون ما تحصل مشاكل خالص 😄

الفكرة فين بقي ؟؟ 🤔

👍في ترتيب الاولويات👌 و التشتت 😦

طفلك في السن دا مخه ممكن يستجيب لوجود كذا مثير موجود حواليه، و كل ما زادت الإثارة و التشويق و المرح كل ما مخه بعد عن ترتيب الاولويات 👇 فلو

١. مركز في اللعب و مندمج مع لعبة جديدة.
٢. لو بيتفرج علي فيلم كارتون.
٣. لو بيسمع اغاني.
٤. لو قاعد مع جدو او تبتة بيلعبوا.
٥. لو بيستكشف حاجة جديدة.

للأسف مخ طفلك في الوقت دا معندوش اي قابلية انه يوقف النشاط اللي بيقوم بيه عشان يسمع لإحتياج جسمه لدخول الحمام او الاكل عشان يلبي متطلباته 👌

و الحل هنا اننا نحط روتين للطفل، و علي الاقل لو الطفل معندوش روتين محدد ليومه فيفضل انك تحطي روتين لمواعيد دخول الحمام حسب مواعيد الاكل و الشرب و تفكري طفلك كل شوية بالموعد او تظبطي منبه 👇

عشان متلاقيهوش فجأه اخدله جمب و بدأ يعملها فتفقدي انتي عقلك بسببه 🥲😂

14/05/2026

على فكرة احنا مبنعلمش الطفل المشي ولا الحبو ولا الوقوف ..دول الطفل بيكتسبهم لوحده يعنى مش محتاجين تدريب
بس لو نيمنا الطفل على بطنه كل يوم ٥ او ١٠ دقايق ده هيقوى عضلات جسمه و هيساعده يكتسب المهارات الحركيه اسرع
حد عارف ايه ده 🤔
كان مالها، ما حلوة اهه
العيل يلعب بيها وبعد ما يلعب تلقاه ينام جنبها كمان من كتر اللعب
من يوم ما انقرضت والعيال مشتته
والدلع زاد عن حده
فعلا مش كل الجديد حلو، أحيانا القديم احلي 😃
حد لسه فاكرها او كان بيستخدمها يورينا نفسه 👇🤣

14/05/2026

خلع الحفاض 👶🚽

دليل عملي لكل أم محتارة تبدأ إمتى؟ وإزاي؟ ومن غير ما تتعبي أعصابك ❤️ بس محتاج منك فالأول لايك و شير للبوست عشان الكل يستفيد و المعلومه توصل.

خليني أقولك الأول حاجة تطمنك 👇
أغلب الأطفال بيتدربوا بسهولة…
اللي بيخلّي الموضوع باين صعب هو إننا بنسمع أكتر عن الحالات اللي اتعسرت شوية 😅

👧👦 الأولاد ولا البنات أسهل؟

غالباً البنات أسرع شوية في الاستجابة…
الأولاد ممكن ياخدوا وقت أطول بسيط، وده طبيعي جدًا.

بس الأهم من ده كله 👇
كل طفل حالة لوحده…
في طفل يخلص في 3 أيام
وفي طفل ياخد أسبوعين
وفي طفل عنيد شوية يحب يمشيها بمزاجه 😎

وفي كل الأحوال؟
هتوصلي 💪

⏰ أبدأ إمتى؟
✔️ السن المناسب

أفضل وقت حوالي سنتين
ممكن من سنة ونص لو الطفل مستعد
قبل كده غالباً التحكم العصبي لسه مش مكتمل.

التحكم الليلي ممكن يتأخر لحد 4–5 سنين وده طبيعي جدًا.

🟢 علامات إن طفلك جاهز

لو لقيتي الحاجات دي موجودة، ابدئي وانتي مطمنة:

الحفاض بيقعد ناشف ساعتين أو أكتر

بيصحى من النوم ناشف أحيانًا

بيعمل براز في مواعيد شبه ثابتة

بيقولك لما يعمل أو يستخبى يعمل

متضايق من الحفاض المتوسخ

بيعرف يعبّر أو يقول كلمة معينة لما يحتاج

لو العلامات دي مش موجودة؟
استني شوية… مفيش سباق ⏳

☀️ أحسن وقت في السنة؟

بداية الصيف أفضل
ليه؟

ملابس خفيفة

غسيل أسهل

مش خايفين من البرد

الطفل بيشرب أكتر فنتابع بسهولة

أهم مرحلة 👇
🟡 التمهيد (أسبوعين – شهر)

أغلب المشاكل بتحصل عشان بننط على المرحلة دي!

اعملي إيه؟

عرفيه الحمام وبنستخدمه إزاي

هاتي البوتي بدري وخليه يشوفها ويلعب بيها

مثلّي قدامه إن ماما/بابا بيروحوا الحمام

استخدمي عروسة بيلعب بيها ومثلي أنها يتعمل في البوتي وبعد ما تخلص تغسل ايديها

احكي قصة عن طفل كبر وبقى بيستخدم الحمام

علميه كلمة يقولها لما يحتاج

ازرعي في دماغه فكرة 👇
"إنت كبرت… الحفاض ده للبيبي الصغير"

لو التمهيد نجح، التنفيذ هيبقى سهل جدًا.

🟢 التنفيذ الفعلي

الصبح اول ما يصحى… الحفاض يتشال

كل ساعة أو ساعتين تقعديه 10–15 دقيقة

بعد الأكل دايماً

قبل النوم دايماً

مستنيش هو يقولك في الأول… انتي اللي تفكّريه.

🎉 التشجيع أهم من أي حاجة

أول مرة يعمل؟
احتفلي كأنه خد بطولة كأس العالم 😂👏

ستيكر
حضن
تصفيق
جملة تحفيزية

بس خليه يحس إنك مبسوطة عشانه هو… مش عشان ريحتي نفسك.

🚫 ممنوعات

لا زعيق

لا ضرب

لا مقارنة بابن خالته

لا تقوليله "عيب"

الغلط طبيعي جدًا.
دي مرحلة تعلّم مش امتحان.

🏠 خايفة على السجاد؟

افرشي مشمع في الأماكن اللي بيتحرك فيها
عشان أعصابك تفضل هادية 😌

🌙 موضوع الليل

متشيليش الحفاض بالليل غير لما ينجح نهاراً أسبوعين على الأقل

لازم يدخل الحمام قبل النوم

لو بيصحى ناشف لمدة شهر كامل… ساعتها نجرب نشيله

والتبول الليلي لحد 5 سنين طبيعي جدًا.

متصحيهوش نص الليل غصب عنه… ده مش حل تعليمي.

😣 لو حصل انتكاسة؟

طبيعي جدًا.

أسبابها ممكن تكون:

دخول حضانة

مولود جديد

مرض

ضغط أو عصبية

توقف مفاجئ للمكافآت

الحل؟
نرجع خطوة لورا بهدوء… ونشجع تاني.

😖 لو جاله إمساك؟

ده بيحصل لو بدأنا فجأة أو الطفل خايف.

الحل:

سوائل كتير

خضار وفاكهة

هدوء نفسي

لو استمر… نراجع دكتور أطفال

🧠 أهم قاعدة في الموضوع كله

لو خدتي قرار تبدأي 👇
مفيش رجوع.

الرجوع بيخلي الطفل يفهم إنه يقدر يضغط عليكي ويرجع الحفاض تاني.

ابدئي وإنتي جاهزة نفسياً
مش مسافرة
مش تحت ضغط
مش لسه مفطماه
مش واخد تطعيم وسخن

رسالة أخيرة لكل أم ❤️

خلع الحفاض مش معركة.
هو مرحلة نمو طبيعية.

ابنك مش بيعاندك…
هو بيتعلم يتحكم في جسمه لأول مرة في حياته.

الصبر + الهدوء + الحب
= طفل واثق ومبسوط بنفسه ✨

14/05/2026

عارفة ولا مش عارفة 🤔🤔

📌 ان الطفل لما بيتولد بياخد حقنة فيتامين ك عضل او بالفم في المستشفي والجرعة الصفرية للإلتهاب الكبدي ب عضل ونقطتين شلل الأطفال بالفم في مكتب الصحة👌👌

📌 ان (السرسوب) كافي جداً للطفل في أول ٧٢ ساعة ،، وفكرة الببرونة في الوقت دا سواء للأعشاب أو اللبن الصناعي غلط غلط غلط 😡،، لأن الطفل بيلاقي مصدر اسهل وبمجهود قليل يبدأ يتعود عليها،، حطيه ع صدرك كل ساعة واصبري عليه دا انتوا لسه بتتعرفوا ع بعض 😂

📌 رفقاء الدرب
محلول الملح ،، وظيفته تسليك الأنف
سيمثيكون أو دنتينوكس ،، للإنتفاخ
فيتامين د (الفيدروب) ،، ٤ نقط يومياً في أول سنة

📌أن الرضاعة أساس الطفل وإهتمامك بتغذية نفسك مهمة،، ابعدي عن المسبك والموالح والشيكولاته والمياة الغازية ،، الحاجات دي بتساعد في زيادة المغص والانتفاخ مع الطفل من خلال الرضاعة،، كلي بلح وعجوه وحلاوة طحينية وجرجير واشربي لبن وحلبة ومياة كتير هيزود ادارار اللبن

📌 ان الصفرا الفسيولوجية علاجها الرضاعه وبس وبس ،، مع المتابعه مع الدكتور بتاعنا واللي هيقولي لمبه هكهربه 👿

📌 ان وقت الرضاعة من ١٠-١٥ دقيقة من الثدي الواحد علشان نضمن وصوله للبن نهاية الرضعه اللي كله بروتينات مفيدة لزيادة الوزن وراحة بطن الطفل ،،، رَضع خلاص ،، كرعتيه ،، لأ ،، مش لازم يطلع صوت يسمع الجيران 🤦‍♂️ وهو بيتكرع ،، نيمية من غير مخده افضل ،، برافو عليكي 👍

📌الحديد من الشهر الرابع أو السادس ١١مجم =ربع قطارة هيدروفرين او انريتش يومياً خاصة لو بيرضع طبيعي👌👌

📌 فيتامين أ
( فيتامين أ ) سوف يتم إعطائه مع تطعيم ال ٦ شهور والسنه والسنه ونص
وبعدها يعطي لوحده كل ٦ شهور لحد ٥ سنوات
بواقع ٩ جرعات
و يكون متوفر في المكاتب الصحية والوحدات مجاناً

📌الكالسيوم ،، لو الطفل بيرضع ٣٠٠ سم لبن فدا كافي جداً.. ولو هياخد لازم يكون بتحليل 👌👌

📌 فيتامين د والأوميجا٣ للأم مفيد جداً جداً ليها وللطفل أثناء فترة الرضاعه 👌

📌 التطور الحركي
٣-٥ شهور يصلب راسه، ٦شهور يقعد مسنود، ٧-١٠ شهور يقعد لوحده، سنه يقف مسنود ، سنه و٣شهور لسنه و٦ شهور يمشي
والتأخر يعدي الفتره المذكوره 👌👌

📌 التسنين من ٦ شهور لسنه ومنقولش اتأخر غير لو مفيش ولا سنه طلعت ووصل ١٣ شهر

📌 أتأخر فعلا في التسنين او التطور الحركي ،، روحي لدكتور يطمن عليه وهيعمله تحاليل يشوف نسب الكالسيوم وفيتامين د ويستبعد مشكله في الجهاز العصبي

📌 التطعيمات الإختيارية عندنا ،،إجبارية في كل مكان في العالم ،، يعني مش سبوبه وربنا 😏
👈تطعيم روتا ،،ضد فيروس روتا اللي بيسبب نزله معوية وبيتاخد علي جرعتين بالفم لو روتاركس و٣ جرعات لو روتاتك ،، والاتنين كويسين
👈مكورات رئوية،، ودي بكتيريا بتسبب ٤ امراض التهاب رئوي-التهاب سحائي-التهاب اذن وسطي-تسمم دم
ودا منه نوعين بريڤنار-سينفلوريكس
وبيكون حقن عضل والاتنين تمام
👈 تطعيم الانفلونزا مهم جدا ونقدر ناخده من فوق ٦ شهور
لو الطفل اقل من ٩ سنين واول مرة ياخده ناخد جرعتين بفاصل شهر بين كل جرعة لو الطفل خده قبل كده او فوق ٩ سنين ناخد جرعة واحدة
الحقنة تتاخد كاملة لجميع الاعمار

📌 السيتال قبل التطعيم بطلناه وطلع بيأثر علي فاعلية التطعيم،، فنخلي السيتال بعد التطعيم وعند اللزوم لو فيه حراره عاليه او صراخ غير طبيعي من الالم 👌👌

📌 تطعيم الدرن لازم قبل الاربعين 👌👌

📌 تطعيمات المبتسرين بتبدأ من العمر الزمني والله العظيم زي باقي الاطفال،، الشهرين بعد شهرين مش بعد ٤ واصله نازل ناقص والكلام الفاكس دا ،،هو اولي انه ياخدها علشان مناعته القليله ،،🙏🙏

📌 مش كل بكا للطفل معناه انه جعان وهوووب لبن صناعي
، ادخال اللبن الصناعي للطفل محتاج اثبات ان الطفل مش بيزيد مع لبن الأم بالمعدل الطبيعي بعد تظبيط غذا الأم ووضعيات الرضاعه ومدرات اللبن ،، كل دا ومفيش نتيجه بندخل الصناعي 👌👌

📌 لو بترضعي صناعي انسب نوع لبن للطفل اللي بيحقق الوزن المطلوب ،، رخيص بقا غالي مش هتفرق المهم يكون بيزوده وبيريحه 👍 ولما تفتحي العلبة شوفي البودره مش كتل وريحتها كويسه ،،مشاكل سوء التخزين كتيير،،لو بتحضري الببرونة بمياه عاديه اغليها ٥-١٠ دقايق ولو معدنيه دفيها ١-٢ دقيقة،،كل مكيال ليه معدل ميه معين ،، الشائع ٣٠ مل = مكيال ،، القليل ٦٠مل=مكيال،، القليل جدا ٢٥مل =مكيال،، دايماً اتأكدي من علي العلبة،، ،،، كل شهر بنزود معدل حجم الرضعه من ١٠-٢٠ سم خدي بالك 👌👌

📌 مش كل شوية مغص او انتفاخ او ترجيع وتسلخات نجري نقول حساسية ألبان ،، الموضوع بقا أوفر شويتين 🤦‍♂️
تشخيص حساسية الألبان بيحتاج وجود عرضين متكررين في جهازين مختلفين من الأجهزة ال ٣..هضمي-جلد-تنفسي
فلو لقينا مثلا ارتجاع (هضمي) مع اكزيما (جلد)...او
اسهال (هضمي) مع كحة متكرره (تنفسي)
في الحاله دي من حقي اشك وامنع الام من منتجات البروتين البقري ونتابع التحسن بعد المنع ب ١٠-١٤ يوم

📌 ادخال الاكل مش قبل ٤-٦ شهور
*ولازم يكون بالطبق والملعقه
*وان الاكل يكون مسلوق في مياه بدون ملح او سكر
*وان اللبن البقري والجموسي (جهينه وغيره) ممنوع قبل السنه
*ومع كل صنف جديد نطبق قاعدة الاربع ايام مع ملاحظة الطفل لوحصله تحسس ع شكل اسهال او امساك او مغص 👌

14/05/2026

الحرارة النهارده 41 😇🌞
والجو حررررر خالص يا ماما 🌞💥💥

طبعا لازم تتوقعي اني هعرق اكتر، فهعمل حمام اقل 😎
بس تتطمني ان معنديش جفاف لو لقيتيني ببل حفاض كل ٤ ساعات ، وعشان ميجيليش جفاف لازم ارضع كتير ✅

قبل ٦ شهور رضاعة لبن بس يا مامي 🥰
وبعد ٦ شهور لازم اشرب مياه بعد السناكس و بعد الاكل و كمان بعد الرضاعة عشان الجفاف ❤

لازم اخد شاور كل يوم مرة او اتنين بمياه فاترة عشان اتخلص من العرق الزيادة و ميعمليش حساسية و التهابات 👌

بشرتي بتكون حساسة فمتحطيش بوردة و زيوت كتير خصوصا في منطقة الحفاض عشان الالتهابات و الاحمرار 😊

و ركزي ان لبسي يكون دايما اقطان خصوصا الملابس الداخلية 💜

ولو هتشغلي مروحة او تكييف متسيبينيش قصاد الهواء خليني بعيد عنه عشان مبردش 🤗

14/05/2026

مش حنية إنك تدي لطفلي حاجة أنا مانعاها عنه..
ومش حب إنك توافقه على تصرف أنا برفضه لمجرد إنك تكسبه في صفك.

مش تربية إننا نهدم كلام الأم قدام أولادها، ولا نشجع الطفل يعمل الغلط بحجة “سيبيه يفرح” أو “إنتِ معقداه”.

الأم مش مجرد شخص جاب طفل للدنيا وخلاص…
الأم هي اللي حملت وتعبت وولدت وسهرت وربّت، وعارفة تفاصيل ابنها أكتر من أي حد.

لما تكسروا قراراتها أو تتدخلوا طول الوقت في طريقتها، أنتم مش بتساعدوا… أنتم بتزودوا عليها الحمل النفسي والتعب.

لو فعلًا بتحبوا الأطفال وعايزين مصلحتهم:
ادعموا الأم، خففوا عنها، قوّوا كلامها قدام أولادها، مش العكس.

سيبوا الأمهات يربّوا أولادهم بهدوء…
وادعولهم ربنا يقويهم ويعينهم، لأن الحمل اللي شايلينه مش سهل أبدًا ❤️

13/02/2026

لأن طفلك غالي علينا.. صحته أمانة بين إيدينا! ❤️👶
في عيادة د مدحت مخلوف اطفال اخصائي طب الأطفال و حديثي الولادة اخصائي طب الاطفال جامعه عين شمس، بنقدم رعاية طبية متكاملة بلمسة حنان وأحدث الأجهزة الطبية عشان نضمن لطفلك نمو سليم وحياة صحية.
خدماتنا المتميزة:
✅ كشف بلسونار
✅ قياس نسبة الصفراء بدون سحب دم
✅ متابعة النمو: تشخيص وعلاج الأنيميا، سوء التغذية، ونقص الوزن
✅ حديثي الولادة: فحص شامل ودقيق فور الولادة ومتابعة التطور العقلي والبدني.
✅ رعاية تنفسية: جلسات استنشاق بأحدث أجهزة التشفيط لعلاج الالتهاب الرئوي.
✅ عناية تخصصية: متابعة دقيقة لحالات سكر الأطفال.
✅ تشخيص دقيق: فحص الأذن بجهاز "الأتوسكوب" المتطور وقياس الضغط والسكر بأجهزة مخصصة للأطفال.
🏥 العيادة مجهزة بالكامل لراحة طفلك وبأجواء كرتونية مبهجة تقلل من خوفه.
📍 مغاغة شارع اسواق حبيبة بجوار معمل النور يومياً (9صباحا-1ظهرا)(٨ مساء-١٢م)
📍العدوة مستشفى كرامة يوميا(2ظهرا - ٧ مساء)
📞 للحجز والاستفسار: 01144761735