26/03/2026
امتي اعرف ان طفلي هاي نيد ؟
مهم نعرف الاول ان ده مش مرض ده مجرد طفل احتياجاته أعلى شوية من غيره
المصطلح ده اتكلم عنه الدكتور William Sears
بس العلم نفسه بيشرحه من خلال حاجات زي المزاج الفطري ونظرية التعلق
أول حاجة لازم نفهمها
إن مفيش حاجة اسمها High Need في كتب التشخيص زي American Psychiatric Association
لكن فيه أطفال بيتولدوا بطبيعة حساسة أكتر
وده اتدرس في أبحاث أنماط المزاج
طيب يعني إيه طفل هاي نيد فعلًا ؟
هو غالبًا بيبقى:
ردود فعله قوية جدًا
لو زعل بيعيط جامد ولو فرح بيبقى مبسوط جدًا
وده مرتبط إن جهازه العصبي بيستجيب بشكل أعلى من الطبيعي
حساس زيادة عن اللزوم
الصوت العالي يضايقه
الضوء
الزحمة
حتى اللمس أوقات
وده اتكلم عنه Jerome Kagan إن في أطفال عندهم حساسية عصبية أعلى من غيرهم
مش بيعرف يهدي نفسه بسهولة
لازم حد يساعده
بالطريقة اللي بيحبها حضن او كلام او غيره
وده طبيعي جدًا حسب أبحاث Edward Tronick اللي وضحت إن الأطفال كلهم بيعتمدوا على الأم في تنظيم مشاعرهم
كمان بيكون
متعلق بمامته جدًا
وعايزهاز جنبه دايمًا
وللاسف ناس كتير بتقول طفل نكدي او زنان او متدلع
لكن ده احتياج بيولوجي طبيعي حسب نظرية John Bowlb. ولكل الاطفال ع فكره ولكن بشكل ازيد شوية للهاي نيد
نومه بيكون صعب
بيصحى كتير
وبيحتاج مجهود كبير عشان ينام
وده برضه بسبب إن جهازه العصبي شغال زيادة
طيب هل ده معناه إن في مشكلة ؟
لا خالص
ده مش مرض و هأكد تاني مش دلع
هو مجرد طفل اتولد بطبيعة مختلفة شوية و حساسة ومحتاج نلبي احتياجاته
العلم بيقول كمان إن الأطفال دول لما بيتفهموا صح
بيبقوا:
أكتر تعاطف
أكتر فهم للمشاعر
أذكى عاطفيًا
وعندهم عمق كبير في الشخصية
لإنهم ببساطة بيحسوا بكل حاجة بشكل أقوى
طب نعمل إيه معاهم ؟
نستجيب لهم مش نتجاهلهم
لإن الاستجابة مش بتدلّع لكن بتبني أمان جواهم وكمان بتطور من شخصيتهم
نستخدم الاحتواء
حضن
او الكلام معاهم
نخليهم يخرجوا مشاعرهم
روتين ثابت
نقلل الزحمة حوالين الطفل
لإن التحفيز الكتير بيتعبه
نقرأ إشاراته بدري
قبل ما يوصل لمرحلة الانفجار
وأهم حاجة
نحاول نهدى نفسنا إحنا كمان
لإن التعامل مع طفل هاي نيد فعلًا مرهق وبيحتاج صبر
الطفل الهاي نيد مش محتاج يتغير لانه طفل مش هيقدر يغير نفسه لوحده
هو محتاج يتفهم و يتعلم ازاي ينظم مشاعره و يهدي نفسه
و لما يكبر هتكوني كسبي احن ابن في الدنيا لأنه بيطلع فاهم كويس جداً المشاعر
#أمومةمفهومه
