Ewaa - إيواء

07/01/2026

03/01/2026

جاهز لفك الحبال الدايبة ؟

( عن التحرر من التعلق )

تعرف ان فيه فرق كبير بين انك تحب حد وبين انك تتحبس فيه الحب بيخليك تطير لكن التعلق بيخليك خايف طول الوقت كانك ماشي على قشر بيض خايف البيضة تتكسر فتقع في فراغ ملوش آخر

طب هي الحكاية بدأت منين ؟

العلم بيقولك ان الحكاية مش قلة كرامة زي ما الناس بتقول الحكاية ان جهازك العصبي متبرمج من وانت طفل ان الأمان مربوط بشخص معين لو الشخص ده مذبذب يوم يديك حنان وعشرة لا فمخك بيفرز كميات مرعبة من الدوبامين في اللحظات الحلوة القليلة فبتتحول لمدمن بتدور على الجرعة الجاية وده اللي بنسميه علميا ( التعزيز المتقطع ) انت مش بتحب الشخص انت مدمن الأمل انه يتغير

طب ليه الوجع بيكون شديد اوي كدا ؟

الوجع شديد لان التعلق المرضي بيخلي هويتك تدوب في هوية حد تاني لما بيبعد انت مش بتحس انك فقدت حد بتحبه انت بتحس انك فقدت نفسك ككل بتحس انك عاري نفسيا ومكشوف قدام خوفك القديم من الرفض وده مش مجرد فراق ده زلزال في اساسات بيتك الداخلي

وأخيرا روشتة التحرر من التعلق

وقف شحاتة بكلمك بأمانة والله بطل تشحت الأمان لان الأمان اللي بيجي من بره هو أمان مؤجر صاحبه ممكن يطردك منه في اي لحظة اتعلم تبني بيتك جوه نفسك لما تحس بالخوف طبطب على قلبك وقوله "أنا هنا أنا مش هسيبني حتى لو الكل مشي" علشان فعلا الكل بيمشي ويسيبك وبتكون انت ونفسك وبس في الاخر فالأولى لو استثمرت انك تستثمر في نفسك بيت ملك ولا فيلا ايجار

وبلاش سيناريوهات خيالية محصلتش لان احنا بنتعلق بالنسخة اللي احنا راسمينها للشخص مش بالحقيقة المُرة اللي قدامنا وده بيخليك تعامله بطريقة هو ميستحقهاش وبيخليك تستنزف نفسيا وعاطفيا فدايما بص للفعل مش للكلمة بص للي بيحصل دلوقتي مش للي ممكن يحصل لو اتغير

فك العقدة من الجدر اسأل نفسك " أنا خايف من ايه بجد ؟ " غالبا هتلاقي طفل جوه خايف يتساب لوحده حاول انت بقا تكبر الطفل ده قوله انك بقيت كبير كفاية عشان تحميه وان وجودك مع نفسك كفاية جدا

اعتزل ما يؤذيك " وده فرض "

لو الحبل اللي ماسك فيه بيجرح ايدك سيبه الوجع بتاع الوقوع مرة واحدة اهون ألف مرة من وجع نزيف ايدك وانت لسه ماسك في حبل هو اصلا دايب وكدا كدا هتقع

ضروري تعرف ان القلب اللي ربنا خلقه علشان يحب حرام يتقلب سجن انت مش نص بيدور على نص انت دايرة كاملة بتدور على دايرة تانية تمشي جنبها في الطريق مش تشيلها او تخنقها او تكررها في نفسها واللي يهون عليه وجعك يهون عليك بُعده سيب الإيد اللي بتسيبك في نص الطريق لإن الوحدة وانت مع نفسك أكرم بكتير من الوحدة وانت مع حد بيحسسك مع كل موقف انك حمل تقيل عليه حتى لو ده بينك وبين نفسك ومتقلقش هتتوجع شوية بس هتنسى بس الفرق ان وجعك جوه العلاقة مستمر ولسه مش عارف اللي جاي ايه لكن وجعك بعد ما تسيب هيكون إلتئام لنفسك وترميم ذاتي بعد وعي ومتقلقش لاني هكلمك المره الجاية عن الفجوة اللي هيسيبها وازاي نملاها ونقدر نتعافى

30/12/2025

جاني ولا مجنى عليه ؟؟

لو فاكر انك بتختار شريك حياتك بمزاجك فـ انت غلطان انت بتختاره بجروحك اللي انت قررت تكبتها للاسف احنا بننجذب للي يوجعنا بنفس الطريقة اللي اتوجعنا بيها واحنا صغيرين الوجع اللي اعتادنا عليها عشان الوجع اللي عارفينه أهون علينا من الأمان اللي منعرفوش

تعالى اكلمك عن أنماط التعلق علشان تعرف انت فين بالظبط وانت مين في العلاقة
في علم النفس بيكلمنا عن تلت أنماط مفيهمش خلاف

طبعا هنبدأ بالافضل وهو التعلق الآمن ( الساكن المستقر )
ده الشخص اللي عينه مليانة أمان لا بيخاف من القرب ولا بيترعب من الوحدة لو الشخص انشغل عنه شوية مبيحسش ان القيامة قامت ولو حصلت مشكلة بيعرف يتكلم بوضوح وده النمط اللي كلنا لما بنتوجع بنفتكر ان ياريتنا نوصله وبنقعد نفرك على بوستات فيس وحاجات تخلينا ازاي نتعامل صح وعشر حقائق عن الشخص النرجسي وبتاع وفي الاخر بيكون واحد من التلاته دول 👇🏻

اللي فوق ده الله يسهله اللي تحت بقا دول اللي محتاجين نعرفهم كويس اوي

أولًا : محتاج تعرف انك مش حنون بزيادة انت مرعوب تتساب وده اسمه ( النمط القلق )

انت اللي بتقيد صوابعك العشرة شمع وبتحرق نفسك عشان اللي قدامك يرضى وفي الآخر بتتحرق لوحدك فـ انت مش طيب بالفطرة انت مرعوب من الفراغ الرفض عندك بيساوي الموت وعشان كدة بتتحول لـ " شحات اهتمام " لامؤاخذه يعني فـ بتجري ورا ناس مبيشوفكش وبتهين كرامتك باسم التضحية والحقيقة انك مجرد طفل خايف ينام في الضلمة لوحده خايف من الوحدة

ثانيًا : انت مش مستقل انت ميت من جوه حرفيا وده اسمه ( النمط التجنبي )

تعالى بقا ياللي بتفتخر انك مبتتعلقش وانك بايع الدنيا باللي فيها الحقيقة انك جبان وبتخاف من القرب لدرجة انك بتموِّت العلاقة وهي في بدايتها بتعتبر المشاعر ضعف والاحتياج ذل بتبني سور عالي عشان محدش يوجعك بس نسيت ان السور ده هو اللي مخليك وحيد وان دي مش قوة ولا حاجه انت بس خايف تتكشف

ثالثًا : انت مش صعب الفهم انت مشوه من جواك وده اسمه ( النمط المشوش مزيج بين القلق والتجنبي )

والحقيقة ان انت هنا اللي بتعذب اللي بيحبك بتموته في دباديبك يوم وترميه في الشارع اليوم اللي بعده بمعنى تاني انت الضحية والجلاد في نفس الوقت عايز الحب بس اول ما يلمسك بتتكهرب وتجري لأن الأمان بالنسبة لك كان دايمًا مرتبط بالضرب او الإهانة او الغدر فـ انت اللي بتدمر اي حاجة حلوة قبل ما هي تدمرك ومفكر انك كدا بتحمي نفسك

الوجع اللي بجد بقا
اننا بنقضي عمرنا كله بنصلح في ناس تانية واحنا اللي محتاجين يتصلح فينا بوصلة الاختيار نفسها بنعشق اللي ببيذلنا وبنهرب من اللي بيحترمنا وبنسمي دي كيميا وهي في الحقيقة تسمم بيبدأ خفيف بس تأثيره قوي.

بص في المراية كدا واسأل نفسك

يا ترى انت بتحب الشخص ده بجد ولا الشخص ده مجرد أداه من ادواتك اللي بتستخدمها عشان تعذب بيها نفسك وتثبتلها انك فعلا متستاهلش تتحب وهل لو اتعالجت من نمط تعلقك ده فعلا هتفضل مكمل بردو في العلاقة ولا لا ؟

27/12/2025

احنا مبنحبش احنا بندور على اللي ناقصنا زمان

سألت نفسك ليه دايما بتحب اللي مبيحبكش ؟

او ليه اول ما حد يحبك بجد ويقرب منك بتحس انك مخنوق وعايز تهرب ؟

الحقيقة المرة اننا مش احرار في اختياراتنا زي ما احنا فاهمين احنا مجرد عرايس خشب بيحركها طفل صغير جوانا طفل لسه واقف عند باب البيت ومستني حد يطبطب عليه

اولا خلينا نتكلم عن " الويندوز بتاعك " اللي باظ في البداية

علاقتك بأهلك زمان مكانتش مجرد تربية دي كانت كتالوج المشاعر بتاعك لو كنت بتتحب بس لما تسمع الكلام او لما تنجح كبرت وانت فاهم انك لوحدك كدا متتحبش فبقيت النهاردة بتبذل مجهود خرافي وتيجي على نفسك عشان تشتري رضا اللي قدامك وخايف ولو بطلت يسيبوك ويمشوا 🌬️

لو كان اهلك موجودين يوم ويوم لأ او حنيتهم بالمزاج ده زرع جواك " رعب الهجر " وبقيت النهاردة بتمسك في الناس بإيدك وسنانك وبتخاف من اي تغيير في نبرة صوتهم وبتحلل السين على انها اعلان حرب ونهاية للعلاقة

ثانيا نظرية " المألوف اضمن من الحلو "
العقل البشري غريب جدا بيميل دايما للي عارفه حتى لو كان بيوجعه

لو نشأت في بيت فيه جفاء او قسوة هتلاقي نفسك أوتوماتيك بتنجذب للشخص البارد او اللي مش متاح عاطفيا
ليه بقا ؟ لأن بروده ده مألوف لنفسك ده الجو اللي انت متعود تتنفس فيه انت مبتدورش على السعادة انت بتدور على نسخة من جرحك القديم عشان تحاول المرة دي وبشكل يائس انك تعالجه او تغير نهايته وده عندنا في علم النفس اسمه التكرار القهري بس للأسف النهاية مبتتغيرش ♻️

ثالثا " السجن اللي بنيناه عشان نحمي نفسنا "

في ناس تانية قررت تقفل الحنفية خالص دول اللي اتوجعوا وهما صغيرين لدرجة انهم قرروا ميحتاجوش لحد النهاردة هما اللي بيقولوا انا مش فارق معايا حد او انا بحب وحدتي الحقيقة ان ده مش استغناء ده خوف ده الطفل اللي مد ايده زمان واتكسفت فقرر يحط قلبه في صندوق حديد ويرمي المفتاح فالقوة اللي إنت شايفها دي هي في الأصل عجز عن الثقة في اي حد

رابعا " كسر الدائرة المواجهة اللي بجد "
الوعي هو اول خطوة عشان تفك القيود دي لازم تفهم ان لهفتك الزيادة او هروبك الدائم مش عيب فيك ده مجرد صوت جوع قديم لسه بيصرخ وانت مش مضطر تفضل سجين للاوضة اللي اهلك بنوهالك او خلينا نقولها صح حاوطوك بيها انت النهاردة تقدر تكون الأمان لنفسك تقدر تبص للطفل اللي جواك وتقوله انا هنا ومش هسيبك ومش محتاجين نجري ورا حد عشان نحس اننا كويسين. 💬

عارف ايه اصعب حقيقة ممكن نواجه بيها نفسنا ؟ ان اغلب الناس اللي دخلناهم حياتنا وقولنا عليهم حبايبنا احنا في الحقيقة مكناش شايفينهم هما احنا كنا شايفين فيهم الحاجة اللي ناقصانا احنا بنحب الاهتمام اللي بيخلينا نحس اننا موجودين بنحب الكلمة الحلوة اللي بتطفي نار الشك في نفسنا بس هل احنا فعلا بنحب الشخص ده لشخصه بعيوبه بتعقيداته ؟
في اغلب الأوقات احنا بنتعلق بيهم زي ما الغرقان بيتعلق بقشة القشة مبتمثلش للغرقان جمال الخشب هي بتمثله فرصة نجاة وعلشان كدا اول ما القشة دي بتميل او بتغرق بننهار مش عشان فقدنا الشخص عشان فقدنا الخدعة اللي كنا عايشين فيها اننا كويسين بيهم.

27/12/2025

ده الحب اما عن انماط التعلق فـ دي هنتكلم عنها النهارده. 😁
#التعلق

27/12/2025

في ناس بتقرب اوي وتختفي فجأة وفي ناس بتخاف تقرب اصلا وفي ناس بتمسك في الوجع عشان خايفة من الوحدة.

والحقيقة ان ده مش حب ده " تعلق " مرايه لقصتنا واحنا صغيرين.

هنتكلم النهارده عن #التعلق انواعه وازاي نعرف نمط التعلق بتاعنا وازاي نفك الشفرة ونلحق اللي باقي مننا.

26/12/2025

ما يمر به عقلك الآن هو مجرد '' موسم '' وليس حياتك كلها.. الفصول تتغير دائمًا. ♥️

22/12/2025

دخلت الأوضة ووقفت في النص كدا وسألت نفسك أنا داخل هنا ليه ؟

طب ولا مره نسيت ترد على رسالة مهمة رغم انك شوفتها ؟

جربت مره تقرأ مقال زي ده كدا واتضح انك مش قادر تكمل تركيز حتى في سطرين على بعض ؟

إليك الحل السحري

لا بهزر معاك شد كرسي وتعالى هكلمك عن شوية حاجات كدا تاخد بالك منها 🙂‍↔️

النسيان وتشتت الانتباه عند الكبار من اكتر الشكاوى النفسية انتشارًا في الفترة الحالية وغالبًا بنفسره بسرعة على انه ضعف ذاكرة ويلا ناخد اوميجا ثري ولما ميجبش نتيجة نقول اصل ده مصري مش مستورد طب هاتلنا حاجه تانيه كدا 🤔

بس الحقيقة أعمق وأهدى من كدا
فخلينا نتفق اتفاق 🤝🏻

اولا النسيان مش دايمًا مرض والذاكرة مش درج ثابت او فايل لملفات مينفعش يضيع منها حاجه دي عملية حيوية بتتأثر بحاجات كتير جدا أهمها الضغط النفسي والتوتر المستمر القلق وكتر التفكير والاجهاد وقلة النوم
والاستخدام الكتير للموبايل والسوشيال ميديا وزيادة المهام اللي انت بتأجلها كل شوية للغد دي 🙆🏻‍♀️

العقل تحت الضغط بيشتغل على وضع النجاة فبيركز على القلق اكتر من التخزين والتذكر لذلك تشتت الانتباه بنقول عليه العدو الخفي لان كتير من حالات النسيان اصلها مش ضعف ذاكرة ولا حاجه لكن عدم تركيز وقت استقبال المعلومة يعني المعلومة مدخلتش صح فطبيعي متطلعش لما تحتاجها بعد كدا وده بيظهر غالبا في نسيان مواعيد او نسيان أسماء 🧾

كمان انك وقت القراءة بتقرأ الكلام بدون استيعاب احساس ان العقل مشبع زيادة عن اللزوم فهو مش مستحمل تاني

💬 وطبعا ده له اسباب نفسية 💬

القلق المزمن ان يكون العقل مشغول بالمستقبل زيادة عن اللازم 1️⃣

الاكتئاب طبعا بيسبب بطء ذهني وفقدان
اهتمام 2️⃣

الاحتراق النفسي ( ودي هشرحهالك بسرعة علشان منعيطش كلنا ) وهو استنزاف ذهني كامل لكل خلية وذرة في عقلك تقريبا 3️⃣

اضطراب نقص الانتباه عند الكبار ( ADHD ) 4️⃣
وده كتير بيكون غير مُشخَّص احيانا يكون عندنا اصلا واحنا منعرفش وبيكون هو السبب

🚫 امتى اقلق واروح اتطمن على نفسي ؟ 🚫

لازم ننتبه لو النسيان بيزيد بسرعة وبشكل ملحوظ زي انه يأثر على الشغل او العلاقات
او مصحوب بتوهان او لغبطة او فقدان مهارات كنت بتعملها بسهوله وبدأت تحس انك مش عارف كنت بتعمل ده ازاي اصلا
او في تاريخ مرضي عصبي يعني نسيان بسبب مشكله عندك وبتعالجها

ايه اللي يساعدني اعمله من البيت ؟

نام كويس النوم مش رفاهية النوم استعادة توازن كامل ♻️

قلل مُشتتات ( اشعارات – فتح اكتر من تطبيق ) اكتب بدل ما تعتمد على الذاكرة علشان ترحمها شوية 📵

ركز على مهمه واحده وخد فواصل بين كل مهمه والتانيه واهتم بصحتك النفسية قبل ما تلوم ذاكرتك 🗓️

وضروري تعرف ان مش كل نسيان معناه مشكلة في العقل احيانًا بيكون معناه ان العقل تعب والتعب محتاج رعاية مش جلد ذات فلو حاسس انك مش زي زمان فـ ده مش لأنك ضعفت ده لانك اتحملت اكتر من اللازم 🤍

19/12/2025

تعرف ضحى ؟؟
" الفراشة اللي مش بتهدى " 🙆🏻‍♀️

ضحى عندها 8 سنين مامتها دايما بتوصفها انها عاملة زي الموتور اللي مبيفصلش وفي المدرسة المدرسين بيشتكوا انها ذكية جدا بس مش بتركز، بتتحرك كتير في الفصل، بتقاطع زمايلها، وشنطتها دايما مش مترتبة

ضحى مش طفلة شقية بمزاجها هي فعلا حاسة ان جواها طاقة محبوسة لازم تطلع وعقلها زي الراديو اللي بيغير المحطات بسرعة أسرع من قدرتها على المتابعة هي بتعاني من

ADHD

( اضطراب فرط الحركة وتشتت الانتباه )
وده بيخليها دايما تحت ضغط وتسأل نفسها
" انا ليه مش قادرة أكون زيهم ؟ "

تعالوا بقا ناخد الروشتة 👌🏻🧾
احنا محتاجين نشتغل على مثلث متساوي الأضلاع وركز على متساوي دي اوي مين هما بقا الاضلاع ؟ ( الأهل - المدرسة - الطفل )

ركز معايا بقا

1️⃣ أولا : تعديل السلوك ( كل حاجه بنظام )
حاجه كدا زي الروتين الصارم لأن الاطفال اللي بيعانوا من فرط الحركة هما اطفال بيعشقوا الفوضى لازم جدول يومي ثابت ( وقت للأكل، وقت للمذاكرة، وقت نلعب فيه )
ويكون متعلق قدامهم بالصور زي جدول كدا على الحيطة

2️⃣ ثانيا : تقسيم المهام يعني بدل ما نقول لضحى " نضفي أوضتك " ودي بالنسبالها جملة كبيرة ومرعبة لعقلها ممكن نقولها " شيلي اللعب من الأرض " ولما تخلص المهمة الاولى نقولها " رتبي السرير " كدا الجمل بالنسبالها بقت أفضل ومرتبة واقصر وتقدر تستوعبها بدون ملل

3️⃣ ثالثا : نظام المكافآت الفوري عقلهم محتاج تحفيز سريع "لو ركزتي في حل الواجب تقدري تلعبي عشر دقايق بـ كذا ( اكيد مش الموبايل ) "

الدعم النفسي المقدم من الأهل ده نقدر نقول ٧٠٪ من العلاج
بلاش اللوم لازم الأهل يفهموا ان ده اضطراب عصبي بيولوجي مش قلة أدب ولا سوء تربية كمان لازم تفريغ للطاقة لازم رياضة فيها حركة مستمرة ( سباحة، كاراتيه، جري، كورة ) عشان الموتور اللي جواهم يفرغ طاقته صح
وطبعا العلاج الدوائي ( عند اللزوم )

واهم حاجة تشتغلي عليها هي الثقة بالنفس الأطفال دول بيسمعوا انتقادات طول اليوم
" بطل شقاوة، ركز، انت مهمل "
وده بيدمر صورتهم عن نفسهم خليكي انتي
المساحة الآمنة اللي بتشوف مميزاتهم قبل عيوبهم

مش هنساكي متقلقيش 😁
الأم اللي عندها الطفل ده بتبقى مستنزفة نفسيا وعصبيا لازم تاخدي وقت لنفسك عشان تقدري تكملي انتي كمان فرغي طاقتك بطريقتك لو متعرفيش الطرق اكتبيلي في الكومنتات وهعرفك ازاي نتعامل مع كل الضغوط دي وربنا يقدركوا ويقويكوا ♥️♥️♥️