20/08/2026
لما "الطيبات" توصّل المريض للبتر .. يبقي لازم يراجع نفسه
لما مناعه جسمه تقع ف الارض مايبقاش اسمه طيبات ❌️
ولما يجيله عدوي بكتيريه تاكل الانسجه وتعمل تسمم شديد في الدم مايبقاش اسمه طيبات ❌️
لما الحرارة تفضل عالية🤒، والجسم يترعش، والمريض يهبط بسبب عدوى شديدة
ده مش "تنظيف جسم"… دي حالة خطيرة.
ولما العدوى توصل لمرحلة تستدعي بتر جزء كبير من القدم، ونبقى بنجري على العمليات عشان نحاصر العدوى قبل ما الضغط يقع وتحدث صدمة تسممية.
ده مش اسمه طيبات❌️
دي واحدة من أخطر صور "دس السم في العسل".
منع البيض واللحوم أو بعض الأطعمة ممكن فعلًا يريح الجهاز الهضمي عند بعض الناس، وده موضوع له سياقه وتقييمه.
لكن إننا نسمح بكل أنواع السكريات، وفي نفس الوقت نوقف الإنسولين أو الأدوية الضرورية لضبط السكر…
هنا الموضوع خرج من فكرة التغذية إلى تعريض المريض للخطر 💣
بلسان الطب ⚕️:
العلاج مش بيتبني على تجارب او اهواء شخصية ، لكنه بيتبني على متابعة، ومراجع علمية، وتقييم مستمر لحالة كل مريض.
وبلسان القرآن 📚:
ربنا قال
﴿وَلَا تُلْقُوا بِأَيْدِيكُمْ إِلَى التَّهْلُكَةِ﴾
وقال سبحانه:
﴿وَكُلُوا وَاشْرَبُوا وَلَا تُسْرِفُوا﴾
وقال برده:
﴿فَاسْأَلُوا أَهْلَ الذِّكْرِ إِنْ كُنْتُمْ لَا تَعْلَمُونَ﴾
الطيبات اللي بجد ( كلوا من طيبات ما رزقناكم )
مش ترك العلاج.
والغذاء الصحي لا يعني إلغاء الدواء.
والاستغناء عن دواء غير ضروري شيء… وإيقاف كل الأدوية الحيوية بدون إشراف طبي شيء آخر تمامًا.
لو زهقت من كثرة الأدوية، غيّر الطبيب..
لكن ما ترميش نفسك للتهلكة بإيقاف العلاج من نفسك.
ومتبقاش أناني…
إنت مش لوحدك.
وراَك بيت، وأهل، وأصحاب، وأولاد…
وفي ناس كتير حياتك فارقة معاهم.
إنت مهم في حياة حبايبك. ❤️
الصحة نعمة كبيرة…
فحافظ عليها، وخد بالأسباب.
ملحوظه : الصوره الحقيقه للقدم صعب جدا رؤيتها😓 . الصوره ده للتوضيح فقط.
اللي ماشي علي علاج وبرده سكر مش بيتزبط غالبا هنلاقي اهمال في المتابعه مع الدكتور او الدكتور نفسه مش ملم باحدث برتوكولات العلاج .. ف يغير العلاج ويغير الدكتور ويقف علي السبب لعدم استجابه جسمه للعلاج . مش يرمي بنفسه للتهلكه ونقول ما اللي ماشي ع العلاج استفادوا اي
