دكتور محمد رجب، بكالوريوس الطب والجراحة العامة - جامعة الأزهر بالقاهرة
15/03/2026
مريضة ظهر في وشها طفح جلدي بالشكل ده وبتعاني من آلام في مفاصل اليدين،
ايه التشخيص اللي هنفكر فيه وايه التخصص اللي المريضة هتتابع معاه؟
10/03/2026
من الأخطاء الشائعة اللي بنشوفها هي الاستعجال في إعادة تحليل الميكروب الحلزوني أو جرثومة المعدة في البراز (H. pylori Ag) بمجرد انتهاء كورس العلاج.. وعشان تضمن نتيجة دقيقة وتتجنب "النتائج السلبية الكاذبة" (False Negative)، لازم تلتزم بالتعليمات دي:
✅ أولاً: المضادات الحيوية
دقة التحليل بتتأثر جداً بالمضادات الحيوية، وعشان كدة لازم تستنى شهر كامل بعد آخر حباية مضاد حيوي أخدتها، حتى لو كنت بتآخد المضاد لسبب تاني غير الجرثومة.
✅ ثانياً: أدوية الحموضة والمعدة (PPIs)
الأدوية دي بتأثر على نشاط الجرثومة في التحليل؛ فلو كنت بتآخد أدوية للمعدة، لازم توقفها قبل التحليل بأسبوعين على الأقل.
✅ ثالثاً: مادة ال (Bismuth)
لو بروتوكول العلاج بتاعك كان بيحتوي على مادة الـ "Bismuth"، يبقى لازم تستنى شهر كامل بعد نهاية العلاج قبل ما تتوجه للمعمل.
💡 الخلاصة:
عشان تتأكد إن الجرثومة انتهت تماماً والعلاج جاب مفعوله، القاعدة الذهبية هي: الانتظار لمدة شهر بعد آخر حباية في كورس العلاج.
نتمنى للجميع دوام الصحة والعافية. 🌹
13/01/2026
هل فعلاً المسكنات "بتقفل" الصدر؟.. حقيقة المخاوف المنتشرة ورأي العلم الحديث
لسه لحد النهاردة فيه قلق بيقابل أي حد بيفكر ياخد مسكن (زي البروفين، الديكلوفين، أو الكيتولاك) وهو عنده دور برد، بسبب اعتقاد قديم ومترسخ إن الأدوية دي خطر وممكن تسبب ضيق في الشعب الهوائية لأي حد بيكح. لكن الحقيقة العلمية مختلفة تماماً، والدراسات اللي اتعملت في الكام سنة الأخيرة حسمت الجدل ده.
تعالوا نصحح المفاهيم دي في 3 نقط واضحة:
✅ 1. لو أنت شخص طبيعي (معندكش ربو).. أنت في أمان!
زمان كان فيه حذر زايد وتعميم إن أي حد "صدره تعبان" يبعد تماماً عن المسكنات دي. لكن الأبحاث الضخمة اللي اتعملت من 2020 أثبتت إن الكلام ده ملوش أساس علمي للأشخاص الأصحاء. المسكنات دي مش بتسبب ضيق تنفس للشخص الطبيعي، ولو صدرك سليم، فهي وسيلة آمنة وفعالة جداً لتسكين تكسير الجسم وعلاج التهاب الزور.
⚠️ 2. مين اللي لازم يحذر فعلاً؟
التحذير الطبي موجه لمرضى الحساسية الصدرية أو الربو، وتحديداً اللي جسمهم عنده قابلية للتفاعل بشكل سلبي مع المادة الفعالة للمسكن. لو أنت مريض ربو "معروف"، أو بتعاني من "لحميات الأنف" وحساسية الجيوب الأنفية، هنا فعلاً لازم تتجنبهم وتخليك في (الباراسيتامول) كبديل آمن ليك.
❌ 3. الخطر "المستخبي" (تركّة لازم تعرفها)
أكبر غلطة ممكن تقع فيها مش إن المسكن هيقفل صدرك، لكن إنه ممكن "يخفي الأعراض" (Masking Effect). المسكنات دي قوية جداً في تنزيل الحرارة، فممكن مريض يكون مصاب بـ (التهاب رئوي) ومحتاج مضاد حيوي فوراً، فياخد المسكن ويحس إنه بقى "زي الفل" والحرارة نزلت، فيتخدع في حالته ويتأخر في العلاج الصح لحد ما الحالة تسوء.
💡 الخلاصة من الآخر:
لو أنت شخص طبيعي: خد المسكن بتاعك عادي في دور البرد عشان تكسير الجسم، ومتقلقش على صدرك نهائي (بس لازم بعد الأكل عشان تحمي معدتك).
لو أنت مريض ربو: بلاش تاخد الأدوية دي من نفسك، والباراسيتامول (باندول/سيتال) هو الأضمن ليك.
التشخيص أهم من المسكن: لو الكحة شديدة أو فيه نهجان، المسكن مش هو الحل، لازم دكتور يفحصك عشان يتأكد إنك مش محتاج بروتوكول علاج مختلف.
العلم بيتطور، وبلاش نخلي "مخاوف قديمة" تحرمنا من علاج فعال ودايما استشارة الطبيب من بدري بتفرق .. شير وعرف غيرك! 🌹
#المسكنات #البرد #الإنفلونزا #الربو #كحة #أدوية
12/01/2026
🚩 الـ Red Flags.. لما التفاصيل الصغيرة تنقذ حياة 🩺
دايماً أساتذتنا بيعلمونا إننا لازم ندور على الـ Red Flags في أي حالة، ومنكتفيش بس بالشكوى الظاهرية اللي المريض جاي بيها.. النصيحة دي حقيقي بتفرق كتير وممكن بفضل الله تنقذ حياة إنسان. 🚩
من فترة جالي مريض (60 سنة) بيشتكي من إمساك بقاله 3 أيام، والحقيقة إنه كان كشف مرتين قبل كدة وأخد أنواع ملينات مختلفة لكن مفيش أي نتيجة. 🩺 بالفحص السريري كان فيه انتفاخ واضح في البطن (Abdominal distension) مع ألم بسيط، ورغم إن الحالة في الظاهر كانت مستقرة، كان لازم نتأكد من كام نقطة أساسية. 🔍
بفضل الله، سألته: "هل في غازات بتخرج؟" وكانت الإجابة إنها متوقفة تماماً بقالها 3 أيام. ولما سألته عن وزنه، عرفنا إنه نزل حوالي 5 كيلو في شهر واحد، رغم إن مكنش فيه دم في البراز. ⚖️
وجهته فوراً لعمل أشعة (Erect abdomen x-ray)، والمريض رجع بالأشعة وهو متضجر شوية من نظام المستشفى، لكن للأسف الأشعة أظهرت (Air fluid level)، ودي علامة واضحة على وجود انسداد معوي (Intestinal obstruction). ⚠️
ولما عرفت إن الأشعة المقطعية في المستشفى هتتأخر يومين، كان الأمانة تقتضي إني أنصحه يتوجه فوراً لمكان تاني، لأن الحالة غالباً محتاجة تدخل جراحي عاجل وماينفعش فيها الانتظار. 🚨
توفيق ربنا وحده هو اللي بيخلينا نركز في التفاصيل دي في الوقت المناسب، والموقف ده كان تذكرة ليا قبل أي حد بضرورة مراجعة الـ Red Flags باستمرار في كل تخصص.. لعلها تكون سبب في نجاة مريض. ✨
دمتم جميعاً بخير وصحة. 🤲
11/01/2026
⚠️ "مغص عادي" ولا فشل تنفسي؟ (درس قاسي لكل أب وأم)
من الحالات اللي تفكرنا بأهمية الـ Red Flags أو "علامات الخطر" اللي مفيش فيها تهاون.
طفلة لسه مولودة عمرها 9 أيام، أهلها جابوها بعد نص الليل والشكوى كانت: "مش مرتاحة بقالها يومين بسبب المغص".
بمجرد ما بدأت الفحص، الصورة كانت واضحة وصادمة:
* صوت Grunting: (صوت "نّة" مع النفس) وده معناه إن الطفل بيعافر عشان يتنفس.
* Cyanosis: زرقان واضح في الأطراف واللسان (نقص أكسجين حاد).
* Intercostal Retraction: عضلات الصدر بتدخل لجوه بين الضلوع من مجهود النفس.
* معدل التنفس: 70 في الدقيقة (سرعة رهيبة).
الحالة كانت RD4 (فشل تنفسي من الدرجة الرابعة). وجهتهم فوراً لأقرب حضانة، وبالفعل استجابوا، لكن للأسف "صبرهم" لمدة يومين كان كفيل بإن الحالة تتدهور.. وقدر الله كان نافذ واتوفت الطفلة تاني يوم.
> قاعدة طبية لازم الكل يحفظها:
> "Most common cause of cardiac arrest in children is respiratory failure"
> (أشهر سبب لتوقف القلب في الأطفال هو الفشل التنفسي، مش القلب نفسه).
>
🚨 إزاي تعرف إن طفلك في خطر؟ (5 علامات للفشل التنفسي)
لو لاحظت أي علامة من دول، مفيش مجال للانتظار للصبح:
* نهجان واضح: ارتفاع ملحوظ في معدل التنفس.
* حركة الأنف: اتساع فتحات الأنف مع كل نفس (Working ala nasi).
* غرز الصدر: انكماشات واضحة بين الضلوع (Retractions).
* النّة (Grunting): صوت بيطلعه الطفل وهو بيخرج النفس.
* الزرقان (Cyanosis): تحول لون الشفايف أو اللسان للون أزرق (دي أخطر علامة).
📊 درجات الخطورة الطبية (RD):
* الدرجة الأولى (RD1): أول علامتين (النهجان وحركة الأنف).
* الدرجة الثانية (RD2): يظهر معاهم "غرز الصدر".
* الدرجة الثالثة (RD3): يبدأ صوت "النّة" يظهر.
* الدرجة الرابعة (RD4): وصول الزرقان، ودي قمة الخطر.
أرجوكم.. بلاش نشخص حالات الأطفال بـ "مغص" أو "برد" ونستنى يومين. النهجان في المواليد حالة طوارئ مش رفاهية.
📥 هسيب ليكم في الكومنتات فيديوهات توضح شكل العلامات دي عملياً عشان تقدروا تميزوها.
10/01/2026
دخل العيادة بألم شديد في البطن في منطقة التجويف الحرقفي الأيمن والتشخيص والقرار بدقة 100%
التهاب الزائدة الدودية الحاد من أعراضه : الإحساس بألم في منطقة التجويف الحرقفي الأيمن ودي بتكون أسفل البطن ناحية اليمين، والإحساس بألم شديد مع الضغط عليها ، الترجيع والغثيان، انسداد الشهية، ارتفاع درجة الحرارة.
مع طلب التحاليل اللازمة وعمل السونار داخل العيادة في عيادات أمواج التخصصية قدرنا بفضل الله وتوفيقه إننا نشخص الحالة،
وبتجميع الداتا ووضعها على أحدث البروتركولات المتبعة عالميا أخدنا القرار المناسب ليها بدقة 100% ودا اللي خلى مرافق الحالة يرجع يشكرنا ويعبرلنا عن ثقته فينا.
Signs of acute appendicitis at ultrasound.
CBC showed leucocytosis & neutrophilia.
Be the first to know and let us send you an email when Dr Mohammad Ragab - د. محمد رجب posts news and promotions. Your email address will not be used for any other purpose, and you can unsubscribe at any time.
