29/11/2022
جاتلنا بنت بتعاني من تساقط الشعر والدكتور كان كاتب لها تحاليل صوره الدم الكامله CBC وتحليل مخزون الحديد في الدم واسمه ferritin والبنت بتشتكي انها مهما اهتمت بشعرها للاسف بينزل حتي بالادويه ، ومفكرتش ف التحاليل خالص وأنها ممكن يكون عندها انيميا أو نقص حديد زي ما الدكتور كاتب لها وفعلا عملنا لها تحليل CBC وظهر عندها انيميا و كان ف التحليل نسبه ال
Hgb قليل
RBCs قليله
Hct قليل
MCV قليله
MCH قليل
فعشان كدا عملت مخزون حديد عشان نتأكد فعلا أن الانيميا عندها بسبب نقص الحديد وفعلا طلع الferritin أقل من الطبيعي
كدا البنت اتشخصت بانيميا نقص الحديد وهل لو راحت مشت ع كبسولات الحديد يبقي كدا مشكله شعرها اتحلت ؟
الصراحه لا واحنا اقترحنا عليها تعمل تحليل نسبه الزنك ف الدم Zn لأن معروف أن الزنك بيدخل ف تصنيع البروتينات الي ف بصيلات الشعر وأنه لو أقل من الطبيعي كدا البروتينات دي هتتاثر فبصيلات الشعر تتأثر فيحصل تساقط له وفعلا لما حللت نسبه الزنك طلع عندها نسبته أقل من الطبيعي وده كان سبب رئيسي لتساقط الشعر
احنا منعرفش ايه سبب نقص الزنك عندها ممكن يكون سوء تغذية منها وخصوصا انها عندها انيميا وممكن يكون وراه مشاكل ف الجهاز الهضمي وممكن اكتر يكون وراه نقص فيتامين D ف الجسم وان فعلا لو فيتامين D نقص ف الجسم بيروح يأثر ع مستوي الزنك ف الدم فيحصل تساقط للشعر .
ده مش بس فيتامين د بياثر ع مستوي الزنك فالزنك يحصل له نقص فياثر ع الشعر ، لا طلع أن فيتامين D له دور في نمو بصيلات الشعر الجديده وعشان كدا النقص في فيتامين D بيقلل معدل نمو الشعر وكمان بيخلي الشعر ضعيف فيحصله تساقط ، فيتامين D بناخده من الشمس بتاعه قبل الضهر والشمس بتاعه بعد العصر ، أما الشمس بتاعه الضهر دي مضره جدا للجلد ومش عايزينها.
صحه شعرك بتبان من صحه الاكل الي بتأكله ولو بصيت ع الأربع تحاليل الي عملناهم دول CBC , ferritin, Zn ,Vit D هتلاقيهم كلهم متأثرين وقليلين عن الطبيعي بسبب سوء الاكل ونقص العناصر الاساسيه للجسم زي الحديد والزنك وفيتامين د وكل ده اثر ع البنت وخلي عندها تساقط شعر باستمرار رغم كل الادويه الي بتاخدها .
