01/08/2026
لما كنت بشتغل كمهندس حاسب الى افتكر من حوالي اكتر من 17 سنه كان في محاضره داخل الشركه اللي كنت شغال فيها من احد الدكاتره المهندسين الزملاء في العمل و كان مسؤل عن البحث العلمي داخل الشركه و قال جمله منستهاش من الوقت دا
قال انه السوشيال ميديا بيتغير شكلها و فيها المستخدم بيتحول تدريجيا كل سنه بسرعه كبيره و كميه كبيره من المعلومات من متلقي معلومات الى مشارك
من 17 سنه دي فعلا كانت فكره غريبه , و فاكر في المحاضره قعدت افكر ايه في الاتجاه دا و قدر تاثيره على الواقع بتاعنا. مكنتش بفكر في المستخدم حيعملها ازي بل كنت بفكر في الوعي اللي حيكون بيتحكم في المنظومه دي حتدار ازاي ؟
النهارده افتكرت المحاضره دي , لانه اللي وصلنا له النهارده من 17 سنه عمري ما كنت اتخيله كمهندس حاسب الي متخصص في المجال دا , لانه حجم التغير اللي حصل كبير جدا , النهارده فرد واحد ممكن ياثر على حكومات و على صناعات و على اقتصاد , بس فرد او شحص بمجرد انه يتحول الى مصدر او نقطه انطلاق معلومه.
و الاخطر هو حجم التخبط البياني و المعلوماتي اللي موجود على السوشيال ميديا و مؤسسات و شركات و كيانات بتجيب شخص و تنفخ فيه و تحوله لمصدر معلومه لاغراض ربحيه او اغراض اخرى المهم انه في هدف.
كنا زمان بناخد المعلومات من مصادر رسميه او مؤسسات او كيان ما بيمثل الجهات الرسميه او الغير رسميه. النهارده الناس بتمشي ورا فرد قاعد في بيتهم , اكيد في ناس كويسه بس دا مش كفايه انه يكون مصدر معلومه و بيان و تحليل. و مفيش حد كويس في كل حاجه.
النهارد بشوف ناس masters of all اللي هوا سياسه يفتي اقتصاد يفتي دين يفتي اجتماع يفتي علم نفس يفتي , ازاي ؟ ازاي كدا ؟ مفيش كدا
و الناس مخها فين ؟ الواقع اللي بنعيشه بيخلي الناس عاطفيه , عندهم خوف و قلق و غضب و دا بيخلي الناس في حال داخلي عدم التاكد من اي حاجه و يتحول الفرد نفسه الى انه ينفصل عن كل حاجه و يختار هوا اللي يريحه و يمشي مع وجهة نظره.
القصه بالنسبه ليا نفس السؤال اللي انا سالته من 17 سنه , هوا الوعي دا حيكمل ازاي و يا ترى ايه الوعي اللي حيدير كل دا و حيوصلنا لفين ؟
افتكر من زمان اوي اوي اي , لما سمحت الحكومه بدخول الدش او طبق الستالايت زي ما كنا بنسميه لاستقبال القنوات العالميه و كنت صغير جدا في العمر في الوقت دا , افتكر وزير الاعلام عمل مؤتمر و قعد يتكلم كتير مش فاكر و لا حاجه من المؤتمر دا لانه مش في اهتماماتي كطفل في الوقت دا و لكن قال جمله برده مش بنساها و هي الوحيده اللي علقت معايا
قال " كل واحد هو المسؤل يحافظ على بيته "
سيادة الوزير ساعتها لما فتحت الحكومه انه الناس تستخدم طبق الستالايت و انه دا نوع من الانفتاح هوا نفسه كان مدرك حجم المخاطر اللي احنا حنواجها كمجتمع من الانفتاح على ثقافات اخرى اغلبيتنا ميعرفهاش و تاثير دا على وعي الفرد و وعي المجتمع.
النهارده انا بقول جمله مقتبسه من كل اللي فات
كل واحد فيكم مسؤل عن دماغه و وعيه لانه في مصادر و منابر هدفها مش زي ما انت معتقد او شايف , التحري شئ مهم , التخصص شئ مهم , محاولة تخويف الناس و ايهامهم بالضعف و عدم القدره و المصير المحتوم كل دا كلام لازم تراجعه.
و اقولها اخيرا
كل واحد فيكم مسؤل عن اللي دماغه بتستقبله , راجع اكتر من مره المصدر اللي بتستقبل منه
و ربنا معاكم جميعا و معايا باذن الله
هو الحافظ
