📚არჩილ ხომასურიძის რეპროდუქტოლოგიის ინსტიტუტმა აღნიშნული სახელით ფუნქციონირება დაიწყო 2014 წლის 14 იანვარს. ინსტიტუტი შეიქმნა ჟორდანიას ინსტიტუტის თანამშრომლების მიერ. ახალი ინსტიტუტის დამფუძნებელი და სულისჩამდგმელი არის პროფესორი არჩილ ხომასურიძე, საქართველოს რეპროდუქციული ჯანმრთელობის ასოციაციის პრეზიდენტი, თბილისის ივანე ჯავახიშვილის სახ. სახელმწიფო უნივერსიტეტის მედიცინის ფაკულტეტის რეპროდუქტოლოგიისა და მეანობა-გინეკოლოგიისა დეპარტამენტის ხელმძღვანელი, სრული პროფესორი, რეპროდუქტოლოგთა საერთაშორისო აკადემიის წევრი, საბუნებისმეტყველო, მედიკო-ბიოლოგიურ და სამედიცინო- სოციალურ მეცნიერებათა აკადემიების აკადემიკოსი.
📌პროფ. არჩილ ხომასურიძე 1984-2012 წლებში იყო ჟორდანიას ინსტიტუტის გენერალური დირექტორი. მის სახელს უკავშირდება ქართულ მედიცინაში უამრავი პროგრესული წამოწყება - კონტრაცეპციის, ლაპაროსკოპიული და ,,ინ-ვიტრო“ განაყოფიერების ტექნოლოგიების დანერგვა.
პროფ. არჩილ ხომასურიძის და მისი თანამებრძოლების ძალისხმევით პირველად საქართველოს ისტორიაში ჩამოყალიბდა დამოუკიდებელი სამედიცინო დისციპლინა ,,რეპროდუქტოლოგია“. ქვეყანის მასშტაბით დაიწყო მოსახლეობისა და ექიმებისათვის საინფორმაციო-საგანმანათლებლო და სასწავლო პროგრამების შემუშავება და განხორციელება რეპროდუქციული ჯანმრთელობის საქმეში. ინსტიტუტის ექიმების პროფესიონალიზმის წყალობით საქართველოში უშვილო ოჯახებში დაბადებულ ბავშვთა რაოდენობამ წელიწადში 1000-ს გადააჭარბა.
👉 ბოლო წლებში ქვეყანაში განვითარებულმა მოვლენებმა, მათ შორის, მედიცინაზე კომერციალიზაციის უარყოფითმა გავლენამ განაპირობა ახალი რეპროდუქტოლოგიის ინსტიტუტის გახსნის აუცილებლობა, რომელიც ამჟამად აგრძელებს იოსებ ჟორდანიას დაწყებულ საქმეს ახალ მისამართზე.
♦ინსტიტუტი დაკომპლექტდა ჟორდანიას ინსტიტუტის ინტელექტუალური გუნდით, რომელსაც აქვს 50 წლიანი შეუფასებელი გამოცდილება გინეკოლოგიურ ენდოკრინოლოგიასა და უშვილობის მკურნალობაში. დღეს ინსტიტუტში საქმიანობას აგრძელებენ ქვეყნის წამყვანი რეპროდუქტოლოგ-გინეკოლოგები: პროფ. არჩილ ხომასურიძე, მედ. აკად. დოქტორი ლალი ფხალაძე, თინათინ ფირცხალავა, მედ. აკად. დოქტორი ნინო რაჟამაშვილი, მედ. აკად. დოქტორი ნინო დათოშვილი, ნინო დავიდოვა, ვივი ბიბილაშვილი, თამარ დიაკონიძე, ბავშვთა და მოზარდთა გინეკოლოგები ნანა ჩოფიკაშვილი და ნანა მინდელი,სალომე საბულუა. უროლოგ-ანდროლოგი გიორგი ნადარეიშვილი, ენდოკრინოლოგი ნანა ლევიძე, მამოლოგები რევაზ ციციშვილი და ირინე მარღანია, თერაპევტი ქეთევან ჯაფარიძე.
♦ რეპროდუქტოლოგიის ინსტიტუტის მნიშვნელოვანი სიამაყე და დასაყრდენია ჰორმონული ლაბორატორია. ლაბორატორიულ სამსახურს ხელმძღვანელობს მედ. აკად. დოქტორი ნანა კვაშილავა, რომელიც 2007-2013 წლებში იყო ჟორდანიას ინსტიტუტის ჰორმონული ლაბორატორიის გამგე.
👉არჩილ ხომასურიძის რეპროდუქტოლოგიის ინსტიტუტის საქმიანობის ძირითადი პრინციპებია: პროფესიონალიზმი, გულისხმიერება, კეთილსინდისიერება. მისი პრიორიტეტია - მომავალი თაობების აღზრდა და მთელი საქართველოს მასშტაბით სასწავლო-საგანმანათლებლო მუშაობა საკუთარი გამოცდილებისა და ცოდნის გასაზიარებლად.
✅ არჩილ ხომასურიძის რეპროდუქტოლოგიის ინსტიტუტი აგრძელებს საქმიანობას მსოფლიო მედიცინის თანამედროვე მიღწევების კვალდაკვალ თქვენი ჯანმრთელობისა და თქვენი ოჯახების ბედნიერი მომავლისათვის.
