08/09/2026
🔹 მითი №1 - თაფლი დიაბეტის დროს უსაფრთხოა.
✅ ფაქტი: თაფლი, ისევე როგორც სხვა შაქრები, მკვეთრად ზრდის სისხლში გლუკოზის დონეს, ამიტომ ის არ წარმოადგენს შაქრის „უსაფრთხო“ ალტერნატივას.
🔹 მითი №2 - ინსულინი დამოკიდებულებას იწვევს.
✅ ფაქტი: ინსულინი დამოკიდებულებას არ იწვევს. პირიქით, საჭირო დროს დაწყებული ინსულინთერაპია აუმჯობესებს გლიკემიის კონტროლს და ამცირებს გართულებების განვითარების რისკს.
🔹 მითი №3 - თუ ინსულინს ვიკეთებ, ყველაფრის ჭამა შემიძლია.
✅ ფაქტი: ინსულინთერაპია არ ნიშნავს, რომ კვებას მნიშვნელობა აღარ აქვს. დაუბალანსებელმა კვებამ შეიძლება გამოიწვიოს სისხლში გლუკოზის დონის დეკომპენსაცია და გაზარდოს დიაბეტის გართულებების განვითარების რისკი.
🔹 მითი №4 - თუ გამხდარი ვარ, დიაბეტი არ დამემართება.
✅ ფაქტი: დიაბეტი შეიძლება ნებისმიერი წონის ადამიანს განუვითარდეს. ჭარბი წონა ტიპი 2 დიაბეტის მნიშვნელოვანი რისკფაქტორია, თუმცა არა ერთადერთი.
🔹 მითი №5 - დიაბეტის დროს ხილის მიღება აკრძალულია.
✅ ფაქტი: ხილის სრულად გამორიცხვა რეკომენდებული არ არის. მისი მიღება შესაძლებელია ინდივიდუალური კვების გეგმის ფარგლებში, ულუფების და ნახშირწყლების რაოდენობის გათვალისწინებით.
🔹 მითი №6 - თუ კვებას ვიცავ და მედიკამენტებს ვიღებ, ფიზიკურ აქტივობას მნიშვნელობა აღარ აქვს.
✅ ფაქტი: ფიზიკური აქტივობა შაქრიანი დიაბეტის მართვის ერთ-ერთი მთავარი კომპონენტია. რეგულარული მოძრაობა აუმჯობესებს ინსულინის მიმართ მგრძნობელობას, ხელს უწყობს გლიკემიის კონტროლს, ამცირებს გულ-სისხლძარღვთა დაავადებების რისკს და აუმჯობესებს ცხოვრების ხარისხს. ამიტომ, დაბალანსებულ კვებასა და მედიკამენტურ მკურნალობასთან ერთად, რეგულარული ფიზიკური აქტივობაც აუცილებელია.
🔹 მითი №7 - დიაბეტის განკურნება ჩაით, ბალახებით ან სხვა „ბუნებრივი“ საშუალებებით არის შესაძლებელი.
✅ ფაქტი: დღეისათვის არ არსებობს საკმარისი სამეცნიერო მტკიცებულება, რომ რომელიმე მცენარეული ან „ბუნებრივი“ საშუალება შაქრიან დიაბეტს კურნავს ან უზრუნველყოფს სისხლში გლუკოზის ეფექტურ და უსაფრთხო კონტროლს. ასეთმა საშუალებებმა არ უნდა ჩაანაცვლოს ექიმის მიერ დანიშნული მკურნალობა.
დიაბეტის ეფექტური მართვა იწყება სწორი ინფორმაციით.
გისურვებთ ჯანმრთელობას!
