22/07/2026
【今日好easy】關注腦健康 腦腫瘤未必等於惡性
大腦係人體最複雜嘅器官，掌管人類意識、思考、記憶、感覺同控制身體活動。《好醫時》藉住世界腦健康日🧠帶大家一齊認識其中一種常見腦部疾病：腦腫瘤。
唔少人一聽到「腦腫瘤」，就以為一定係惡性，甚至等同絕症😨其實，腦腫瘤可以分為「良性」同「惡性」。相較於惡性腫瘤，良性腫瘤一般生長較慢、擴散風險較低，而且喺完全切除後復發機會亦較低。
⚠️不過，無論良性定惡性腫瘤，都有可能影響腦部功能！如果身體出現以下警號，就要提高警覺，及早求醫：
👉🏻頻繁或嚴重頭痛
👉🏻平衡力差、行路困難
👉🏻癲癇
👉🏻不明原因嘅噁心嘔吐
👉🏻視力問題：如視力模糊、複視（俗稱「重影」），甚至喪失視力
👉🏻聽力障礙
顱內腫瘤治療一直都係醫學界面對嘅一大挑戰。但隨住醫療科技一直進步，腦腫瘤患者近年都有唔少關於治療希望嘅好消息💡例如去年中大機械與自動化工程學系聯同深圳學者共同研發一種利用患者血液製作而成嘅微型機械人，能夠喺複雜腦區移動，釋放其攜帶嘅化療藥物，為顱內腫瘤提供無創、精準同高效嘅新治療方案。
除咗腦腫瘤之外，其實仲有好多腦部疾病值得我哋關注🧠多啲了解腦部疾病，並留意身體發出嘅警號，一齊守護腦部健康❤️
#好醫時 #世界腦健康日 #腦健康 #腦腫瘤
