20/08/2026
波波日記（四）
我家波波話咁快就歲半😱 時間過得快到恐怖。
仲要再隔多陣就要報N班interview🤦♂️
佢就開心呀，日日扮可愛（波波：我真係可愛）做開心果搞搞震。氹到成間育嬰園啲人鬼死咁開心。
佢學嘢好快，睇嚟真係好聰明。
佢有好多嘢都好叻，不過唯獨有樣嘢好難搞🤦♂️
就係集中力嘅問題
佢坐唔定。
叫佢乖乖坐喺小凳仔同張枱玩玩具，坐唔夠 30秒又起身週圍走去搵嘢玩 好似個腦轉數快得滯停唔到咁。
諗住叫佢留心啲，收起啲玩具淨係畀佢玩兩三樣， 點知又係一樣。
就算佢冇其他玩具都唔會集中玩手頭嗰啲， 又係企起身週圍行。
見我哋收起的玩具仲發脾氣打我哋🤦♂️
結果出到去啲playgroup 效果都打折扣
自從識行識走之後就唔多願意坐低。 叫佢坐低就扭計喊，搞到堂都上唔到又騷擾到其他bb
見到波波越嚟越有性格，又有自己嘅行動方式唔鍾意其他人搞佢， 真頭痛😅 又驚佢咁落去專注力失調之後就更加難處理。 睇嚟育兒真係要tailor made 夠曬高難度，各家施各法。
傳統坐定定嘅學習方法波波又有啲抗拒， 依家又唯有試啲新嘢。
搵搵下又搵到間Montessori 蒙特梭利教學嘅地方試下。 睇佢呢套教學法嘅concept又好似好啱波波個性格。
蒙氏教學法， 歐洲好流行。
喺香港就似乎係啲小眾嘢。
喺香港真正攞到Montessori 認證嘅老師同certified 到standard 嘅 Montessori institution 真係唔多
同埋蒙氏教學唔係淨係得個老師識就得。 而係要成個學習環境，班房，屋企，教材， 家長嘅行為等等，要有曬成套嘢成件事先至成立。
相比傳統嘅學習方式，教師係個“控制者”教你乜乜乜乜乜， 你今日要做乜乜乜乜乜功課 今日要寫乜乜乜乜嘅字。
Montessori 嘅老師似係一個陪你自學嘅朋友， 一個私家保姆式嘅trainer。（ 我其實一路都想搵個咁嘅人喺屋企， 當然係請唔起無可能發生 ）
Montessori 嘅教室係一個開放式嘅地方, 好似超級市場咁. 所有嘅教材玩具擺晒喺度。
小朋友自己行嚟行去搵， 搵到自己有興趣嘅嘢拎嚟玩，老師先會在旁教。 唔會話有 “老師今日一定要你叠五舊積木先放學” 的情況，避免小朋友學一啲佢根本唔鍾意嘅嘢。 佢哋嘅concept係想小朋友係一啲佢有興趣嘅地方發揮所長到最大。
當然呢個概念未必人人都buy或者有效.
但係我聽落就幾乎合波波 ， 一試無妨吖
哈，試完之後又真係幾好效果喎
你越叫佢坐定，佢就偏偏唔坐扭計.
到你放晒海量嘅嘢喺度任玩任揀，玩10秒唔玩？由佢吖，任你發揮，唔玩執返佢先再拎其他嘢。。。
到你任放佢玩，佢又肯乖乖坐耐啲玩佢鍾意嘅嘢
佢喺嗰度玩咗成兩個鐘都冇扭過計。 佢平時上堂冇可能上到咁耐。
佢雖然第一次見面，但係就好鍾意個外國人miss😏， 佢兩個竟然溝通到。波波聽得明啲英文嘅指示。（波波好少聽全英文句子的）
同埋老師好好心機 蒙氏教學嘅師生比 最理想係一對一的
老師跟咗佢一陣好快已經發現到波波嘅習慣，例如鐘意藍色同埋鍾意車車。並唔係hea住陪玩，佢真係assess緊個小朋友
BB啲反應有時真係好難預計。
個個小朋友發展嘅進程同道路都唔同， 就算父母畀小朋友玩到氣咳都唔使氣餒，繼續試，繼續畀佢玩殘就啱㗎喇😂😂
我都就快畀波波玩到暴斃🤣🤣
唔緊要
有愛就繼續衝呀～
不過爸爸的腰骨真係就斷了😮💨
#波波日記
#蒙氏教學
#蒙特梭利教學
