13/05/2026
॥ मनातील युरोप ट्रीप जेव्हा प्रत्यक्षात उतरते तेव्हा ॥
अनेक वर्षापासूनची युरोपला जाण्याची इच्छा होती. युरोप बाबतीत जे काही ऐकलं होतं, वाचलं होतं त्यामुळे प्रत्यक्ष युरोप ला भेट देण्याची उत्सुकता होती. परंतु नेहमीच्या धावपळीमध्ये कामाच्या गडबडीमध्ये त्याचा योग अनेक वर्षापासून काही येत नव्हता.
परंतु दोन्ही चिरंजीवांनी व दोन्ही सुनांनी मनावर घेऊन पासपोर्ट व व्हिसाची पुर्तता करून एकदाची २०२६ ची एप्रिल महिन्यातील १६ दिवसांची ट्रीप बुक केली.
त्यात लंडन ते रोम या प्रवासाच्या दरम्यान १० देशांना भेट देण्याचे नियोजन होते. त्यामुळे मोठी तयारी करणे क्रमप्राप्त होते. परंतु अमेरिका व इराणमधील युध्दामुळे ट्रीप सुरू होणार का ? आणी गेलो तर ती सुरळीत पार पडणार का ? या मोठ्या प्रश्नांमुळे गाडी काही पुढे जाईना.
आंतरराष्ट्रीय ख्यातीच्या केसरी टुर बरोबर हे सर्व नियोजन केले होते त्यामुळे त्यांच्या पुण्याच्या व मुंबईच्या ॲाफिसला फोना फोनी सुरू झाली परंतु सुरुवातीला ठाम असे काही ऊत्तर मिळेना परंतु नंतर शेवटच्या ८ दिवसात नक्की झाले ट्रीप ही ठरल्याप्रमाणे नक्की जाणार. थोडेफार विमान प्रवासातील बदल करून एकदाचे जाणे नक्की झाले.
त्यानंतर सौभाग्यवतींनी सुनांना बरोबर घेऊन खरेदी व बॅग भरणे या गोष्टींसाठी वेगाने तयारीला सुरवात केली. कारण नेहमीचा अनुभव लक्षात घेता माझ्याकडून माझ्या धावपळीमुळे या दोन्ही गोष्टी मध्ये काहीही मदत होणार नाही याची त्यांना खात्री असल्याने सुरुवातीला त्यांनी तुमची बॅग तुम्ही भरा व तुमची खरेदी तुम्ही करा हे सांगून पाहिले. परंतु त्याला काही यश आले नाही. त्यामुळे त्यांनी नंतर माझी व त्यांची खरेदी व बॅग भरणे एकदाचे पुर्ण केले व आमची तयारी पूर्ण झाली.
आम्ही जातांना महाराष्ट्रातील व पुण्यातील तापमान साधारणतः ३८ ते ४१ अंश सेल्सिअस होते व आम्ही लंडन पासून पुढे प्रवास सुरू केला तेव्हा तिथले तापमान ऊने ५ ते ७,८ अंश सेल्सिअस होते.आम्ही १३ फॅमिली म्हणजे २६ जण व चित्ते फॅमिलीतले चिरंजीव देव यांना आम्ही सगळे आधुनिक श्रावण बाळ असं नाव ठेवलं कारण तो आपल्या आई-वडिलांची काळजी घेण्यासाठी आला व आमची सर्वांचीच काळजी त्याने ऊत्तम घेतली. आमचे सायक्लोपिडीया गाईड सुदर्शन असे मिळून आम्ही२८जण होतो. कृष्णाच्या हातात सुदर्शन चक्र होते तसेच या सुदर्शन च्या मेंदुमध्ये लंडन, पॅरिस व सर्व युरोप च्या माहितीचे खचाखच भरलेले मोठे गोडाऊन होते.
याला काहीही युरोपची माहिती विचारा त्याचे ऊत्तर सेकंदात मिळायचे अशा या टुर लिडर बरोबर या ट्रीप ची सुरुवात झाली लंडन मधून.
नेहमीच प्रवास आपल्याला तिथली संस्कृती, संस्कार, प्रथा, भौगोलिक परिस्थिती,आधुनिकता व ज्ञान यात भर घालतो. अनेक नवनवीन अनुभव आपल्याला शिकायला मिळतात आणि आपल्या ज्ञानामध्ये खूप मोठी भर पडते. तसंच या प्रवासात आम्हाला अनुभवायला मिळालं.
प्रवासाची सुरुवात झाली मुंबई ते लंडन व ( पुढे महत्त्वाचे देश व महत्वाचे गावे/ शहरे)पॅरिस, ब्रुगेश, ब्रुसेल्स, नेदरलॅंड्स, वडूझ, ॲास्ट्रिया, इनडोव्हेन, ब्रेडा, जर्मनी, ॲमस्टरडॅम, स्टुटगार्ड, झुरिच, स्विझर्लंड, एनगेलबर्ग, टिटलीस्, जंगफ्राजेच, व्हटेनस्, सॅलझबर्ग, बोलोग्ना, फेरारा, सियेना, व्हॅाटिकन सिटी व शेवटी इटली/ रोम मधील पिसा, व्हेनीस, कलोझीयम असा प्रवास सुरू झाला.
या प्रवासात आम्हाला टॉवर ऑफ लंडन, आपला कोहिनूर हिरा (डायमंड), त्याचप्रमाणे मेणाच्या पुतळ्यांचं खूप मोठं म्युझियम व त्या म्युझियम मध्ये आपले भारतीय व जगातील हिरो, हिरोइन, नामांकित खेळाडू, राजकीय नेते , सामाजिक काम केलेले दिग्गज यांचे मेनाचे पुतळे पाहायला मिळाले. हे सगळं पाहिल्यानंतर ते खरंचच पुतळे आहेत का ? की प्रत्यक्ष त्यांनाच तिथे उभे केलंय असा प्रश्न पडावा इथपर्यंत ते हुबेहूब केले आहेत.
थेम्स नदीवरील टावर ब्रिज हे एक सगळ्यात महत्त्वाचे आकर्षण होतं, मोठे जहाजे जातायेतांना तो दरवाजा ऊघडतो तसा ऊघडतो व बंद होतो.तिथेही आम्ही भेट दिली व त्यावर प्रवास केला.
त्यानंतर आम्ही भल्या पहाटे लंडनवरून पॅरिसला तिथल्या इंग्लिश चॅनेल पार करून रेल्वेने प्रवास केला. तो रेल्वेचा प्रवास समुद्राच्या खालून होता. गप्पा व पॅन्ट्रीला भेट देऊन कॅाफीची मजा घेई पर्यंत पॅरिसला कधी पोहोचलो हे कळलेही नाही. तिथे पोहोचल्यानंतर आयफेल टॉवर व पॅरिस शहर दिवसाचे आणि रात्रीचे बघण्यातली एक वेगळी मजा अनुभली. परफ्यूम फॅक्टरी, क्रुझची सफर व दुसऱ्या दिवशी पुर्ण वेळ भव्य दिव्य असे डिस्नेलॅंडचा आनंद सर्वांनीच आपले वय विसरून मनमुराद घेतला.
आपण जसे जसे पुढे युरोपकडे जाऊ तसा आपला दररोजचा बसचा प्रवास कमीत कमी ४०० किलोमीटर ते सहाशे किलोमीटर असा प्रत्येक दिवशी होतो पण तो कंटाळवाणा होत नाही त्याचं कारण बस ही ऊत्तम सस्पेंशन असलेली असते. रोडवरती एकही खड्डा नाही, त्याचबरोबर कुठे स्पीड ब्रेकर नाही, तसेच तिथे कधी हॉर्न वाजलेला पण ऐकायला मिळत नाही, सगळे सिग्नल आणि ट्रॅफिकचे रुल्स प्रत्येक जण पाळतो त्यामुळे तो ३५०० किलोमीटर चा प्रवास निसर्गाचा आनंद घेत आपण अनेक ठिकाणी भेटी देत देत करतो. त्यामुळे युरोपला जाताना आपली दररोज कमीत कमी पाच-सहा किलोमीटर चालण्याची व कमीत कमी चार-पाचशे किलोमीटर प्रवास करण्याची मानसिकता व शारीरिक तंदुरूस्ती हवी हे मात्र नक्की.
जर्मनी मध्ये पिवळे धमक गालीचे अंथरल्याप्रमाने शेतीचे मोठे मोठे प्लॉट्स पाहायला मिळतात हे रॅपसीड म्हणजेच रॅप्स या पिकांमुळे आपल्याला पाहायला मिळतात व ते दिसायला अत्यंत आकर्षक व सुंदर दिसतात. कोलोन शहरातील चर्च हे जगातील सर्वात उंच असलेल्या चर्च पैकी तीन नंबरचे चर्च आहे व त्याची युनेस्को जागतिक वारसा स्थळ म्हणून नोंद आहे . त्या ठिकाणी डोंगर उतारा वरती वाईन साठी लागणारे जे द्राक्ष आहेत ते भरपूर प्रमाणात त्याची लागवड केली जाते त्याची ऊत्तम रित्या काळजी घेतात.
जर्मनीमध्ये पोर्शो ,मर्सिडीज बेंज व फाक्सव्हगन या अत्याधुनिक कार तयार होतात त्यातील पोर्शो कारच्या म्युझियमला आम्हाला भेट देण्याची संधी मिळाली व तिथे ठेवलेल्या अनेक कार्सचे मॅाडेल बघता आले व माहिती घेतली. ब्लॅक फॉरेस्ट ला भेट दिली त्या जंगलामध्ये घनदाट पाईन व फिर या वृक्षामुळे ते जंगल काळे दिसते म्हणून त्याला ब्लॅक फॉरेस्ट म्हणतात. तसेच कुकू क्लॉक हे जगप्रसिद्ध , सुंदर लाकडी घड्याळ १८ व्या शतकापासून तिथे बनवतात व त्याला बॅटरीची गरज नसते ते त्याच्या लंबकावर चालते.
नेदरलँड ची राजधानी ॲमस्टरडॅम इथे १२ व्या शतकातील बांधलेलं धरण आहे ते कालव्याचे शहर म्हणून ते प्रसिद्ध आहे. १६५ पेक्षा जास्त कालवे, १५०० पेक्षा जास्त पुल व ९० बेटांवर वसलेले शहर आहे. युनेस्को जागतिक वारसा याला लाभला आहे. येथे लोकसंख्येपेक्षा जास्त सायकली आहेत हे सर्वात महत्त्वाचे. कालव्यामध्ये २५०० हाऊस बोट वरती लोक राहतात.
यापासून ४० किलोमीटर वरतीच ७९ एकरामध्ये ट्युलिप गार्डन हे जगातील सगळ्यात मोठं गार्डन आपल्याला पाहायला मिळतं व हे गार्डन मार्च ते मे या महिन्यामध्ये फक्त आठ आठवडे पाहण्यासाठी उघडे असते, ८०० प्रकारचे वेगवेगळे फुले पाहायला मिळतात. एप्रिल हा महिना त्यासाठी उत्तम आहे आम्ही त्यामुळे एप्रिल महिन्यात तिथे जाण्याचे नियोजन केले. त्यामुळे आम्हाला ट्युलिप गार्डन चा पुरेपूर आनंद घेता आला.
स्वित्झर्लंड म्हणजे खऱ्या अर्थाने स्वर्ग आहे. निसर्गाने हातचे काहीही राखुन न ठेवता आपल्याला जे देता येईल ते भरभरून इथे दिले आहे. तिथे शहरांमध्ये, गावांमध्ये मानसे तर दिसतच नाहीत व शांतता म्हणताल काय ती सांगायची गोष्ट नाही ती शांतता अनुभवायचीच गोष्ट आहे. तिथे अत्यंत उंच च्या उंच बर्फांचे डोंगर व वर्षभर त्यावर बर्फ असतो. आईस पॅलेस म्हणजेच बर्फाने कोरलेल्या गुहा तुम्हाला पाहायला मिळते, युरोपातील सर्वात उंच रेल्वे स्टेशनवर जायला मिळते. हे बर्फाचे ऊंच डोंगर चढण्यासाठी कॅागव्हील रेल्वे खास दात्रांचे डिझाईन केलेली तुम्हाला प्रवासाला मिळते.
स्वित्झर्लंडमधील लुसेन हे सर्वात सुंदर शहर आहे व टिटली हे प्रसिद्ध हिम शिखर आहे. त्याची उंची ३२३८ मीटर म्हणजेच १०६२३ फुट आहे. या ठिकाणी आम्हाला दोन दिवस राहण्याचा आनंद मिळाला. इथे झुलत्या पुलावर जाण्याचा आनंद घेता आला. इथे ट्युबिंग, स्लेजिंग व स्कीइंग चा आनंद घेणारे अनेक पर्यटकांची गर्दी असते.या ठिकाणी आपल्या अनेक भारतीय चित्रपटांची शुटींग झालेली आहे. राईन फॅाल्स हा युरोपमधील मोठा धबधबा पहाता येतो.
ऑस्ट्रिया हा देश आल्प्स पर्वतांच्या मध्ये वसलेला अतिशय सुंदर , टुमदार असा देश या देशात जन्मलेले मोझार्ट बोथोव्हन यांच्यामुळे संगिताचा देश म्हणूनही ओळखला जातो. वटिन्स हे छोटे टुमदार असे औद्योगिक गाव आहे या औद्योगिक गावामध्ये स्वरोव्हस्की क्रिस्टल्सची फॅक्टरी आहे व याच्यामुळे हे अतिशय जगप्रसिद्ध असे ठिकाण आहे. सालसबर्ग मध्ये प्रचंड मोठी मीठाची खान आहे व ते पाहण्यासाठी दोन टप्प्यात छोट्या रेल्वेने व बोटीने व घसरगुंडीने डोंगराच्या खाली तळाशी आपल्याला प्रत्यक्ष घेऊन जातात तो अनुभव अतिशय अविस्मरणीय आहे. इन्सब्रुक हे ही प्रेमात पडावे असे निसर्गाने भरभरून दिलेले वरदान असलेले सुंदर टुमदार शहर आहे.
लिश्टेंस्टाइनची वाडुस ही राजधानी आहे. वाडुस ची लोकसंख्या फक्त ५७०० आहे. जगातील सर्वात लहान राजधानी पैकी एक व युरोप मधील सर्वात लहान व सर्वात श्रीमंत देश म्हणून त्याची ख्याती आहे. मुंबई शहरापेक्षा लहान व स्वित्झर्लंड व ऑस्ट्रिया यांच्यामध्ये वसलेले हे राजेशाही राजवट असलेला देश आहे. या देशातील बेरोजगारी फक्त १.५% टक्के एवढी आहे. इथे प्रचंड नोकऱ्या उपलब्ध आहेत.
आता परतीच्या प्रवासातील शेवटच्या देशाकडे वाटचाल चालू होते त्यामध्ये इटली/ रोम या हजारो वर्षाचा इतिहास सांभाळणारा देश आहे. पिसा या शहरात हजारो वर्षांपूर्वीचा झुकलेला मनोरा तुम्हाला पाहायला मिळतो. तो पाहतांना तुम्ही आश्चर्यचकित व आचंबीत होता की हा मनोरा इतके वर्ष ऊभा कसा आहे?. पुढे वेनीस या ठिकाणी पोहोचण्यासाठी छोटे क्रुझ किंवा बोटींचा वापर करावा लागतो. कारण तिथे रस्ते नाहीत. वेनीस हे इटलीतील पाण्यावर तरंगणारे शहर आहे . ११८ बेटांवर वसलेले शहर आहे. येथे छोट्या टुमदार बोटीने फिरवे लागते त्या बोटींना ‘गोंडोला’ म्हणतात. ज्या वेळी समुद्राला भरती येते व वेनीस शहरात पाण्याची पातळी वाढते त्यावेळी लोक पाण्यावर लाकडी फळ्यांवरुन चालतात.
वेनिस मध्ये राजवाडा, वॉटर बस व हजारो वर्षांची परंपरा संस्कृती जपलेले हे शहर आहे. रोम मधील बोलोन्या शहरात १०८८ साली स्थापना झालेले जगातील सर्वात जुने प्रसिद्ध विद्यापीठ आपणास पाहायला मिळते. खाद्यसंस्कृती साठी प्रसिद्ध असा हा देश आहे. पिझ्झा, पास्ता आणि अनेक पदार्थ खवय्या साठी तयार असतात.
जगातील ७ आश्चर्यां पैकी एक आश्चर्य कलोझीयम ॲाडीटोरियम रोम मध्ये आहे. हे हजारो वर्षांपूर्वी जमिनीखाली दोन मजले व वरती ९ मजले असे भव्य दिव्य कलोझीयम बांधताना त्यावेळी लिफ्ट चे नियोजन होते म्हणजे यांच्याकडे हजारो वर्षांपूर्वी किती तरी अत्याधुनिक टेक्नालॅाजी ऊपलब्ध होती.
या सर्व सोळा दिवसाच्या प्रवासामध्ये आम्ही बऱ्याच फॅमिली ५०, ५५ वयोगटाच्या वरती असुनही केसरीचे टुर लिडर सुदर्शन यांनी अतिशय चांगली व्यवस्था व काळजी घेतल्यामुळे कोणालाही काहीही त्रास झाला नाही. खाण्याची व राहण्याची व्यवस्था ऊत्तम होती. बटाट्या वड्या पासून ते पिठलं भाकरी, जिलेबी आणि आपल्या मराठमोळ्या महाराष्ट्रीयन स्वादिष्ट जेवणाचा आनंद युरोपमध्ये घेता आला तो केवळ केसरीच्या ऊत्तम नियोजनामुळे हे मात्र नक्की.
आम्ही १३ फॅमिली ट्रिप मध्ये प्रथमच भेटलो परंतु दोन दिवसातच सगळ्यांचे सुर इतके जुळून आले की आम्ही एकमेकांचे अनेक वर्षापासूनचे मित्र/ पारिवारीक संबंध असलेले एकच कुटुंब आहोत. त्यामुळे १६ दिवस ट्रिपचे खुपच आनंदात व मजा करण्यात कधी संपले ते कळालेही नाही.
Kesari Tours
