03/08/2026
معالي وزير الصحة المحترم …
بعد التحية والسلام ..
رح احجي باللهجة العامية وباختصار شديد ..
من منتسب سابق لدى وزارتكم ( مجاز اجازة طويلة حالياً )
معالي الوزير ..
مرت علينا ايام طويلة والمستشفى بدون عمال خدمة نتيجة عدم دفع اجور العمال المتعاقد معهم من قبل ادارة المستشفى
ولك ان تتخيل مستشفيات تعليمية تعمل بدون عمال خدمة
وهنا داحجي عن تراكم النفايات والملوثات واثارها على الصحة العامة …
ايام طويلة جداً والمستشفيات بدون اي مستلزمات وابسطها
( فولي ، كانيولا ، خيط جرح ، جهاز اعطاء ، قطن ، بلاستر )
وحتى السرنجة ندز المراجع عليها من برة المستشفى
بدون اي ادوية حتى البراسيتول او المحاليل الوريدية ( المغذي ) غير متوفرة …
مرت ايام والمستشفى بدون تحاليل طبية …
بدون اجهزة DC shock وECG او اجهزة قديمة عفى عليها الزمن …
وصلنا لمرحلة حتى الكفوف الطبية ( الگلوفز ) والبدلة الطبية ( الگاون ) نجيبها من برة …
ورحنا ابعد من هذا
صار المراجع من نصورة اشعة نگلة ( اخذ صورة للاشعة بموبايلك لان ماعدنا ورق لطباعة الاشعة …
وصلنا مرحلة حتى صار المريض يشوف المستشفى = الموت
بدل ماتكون الامل بالحياة …
صرنا نخجل نواجه المرضى لان مانعرف شنو نجاوبهم من يسألنا ( انتوا شنو شغلكم هنا اذا كلشي ماعدكم ؟ )
ولكن كل الي اعرفة انه المواد توفرت قبل يوم من زيارة رئيس الوزراء ووزير الصحة السابقين مستشفانا …
معالي الوزير المحترم …
بدل الشو الاعلامي الي دتسوي حضرتك حالياً
اقترح على جنابك الالتفات لموضوع توفير الادوية والمستلزمات …
ونقول عفا الله عما سلف باعتباره كان بفترة سابقة لم تكن فيها في موقع المسؤولية …
ولكن كل المحيطين بيك حالياً همة موجودين وتكدر تسألهم فأن كانوا يدرون فـ تلك مصيبة … وان لم يكونوا فـ المصيبة اعظم …
وكل ماذكرته اعلاه هو فقط ما اجة على بالي واني داكتب البوست هذا
ومع كل ذلك اني ما تطرقت لمعاناة الكوادر وموضوع الاعاشة وضغط جداول الدوام وباقي التفاصيل الاخرى
اني تطرقت فقط لـ امور تمس مصلحة المريض
والله على ما اقول شهيد …
