09/07/2026
Við tókum smá útiveru um kvöldmatarleytið í gærkvöldi til að prufukeyra tvær uppskriftir af þurrmat. Það er nefnilega ekki það sama að borða þurrmat heima í stofu og úti í náttúrunni eftir góðan göngutúr.
Við gengum inn meðfram Þverá sem liggur þvert á Laxárdal í Nesjum hér í Hornafirði. Eftir um 1,5 km göngu var kominn tími til að slaka á og njóta.
Báðar uppskriftirnar voru virkilega góðar og að mínu mati betri en margur þurrmatur sem ég hef smakkað. Held að ég sé komin með tvær fínar uppskriftir til að taka með í Hornstrandaferðina sem styttist óðum í!
🥣 Miðjarðarhafskúskús
80 g kúskús
20–25 g þurrkað soyakurl
10 g sólþurrkaðir tómatar, þurrir og án olíu
10 g þurrkaðar súpujurtir
2 msk næringarger
1 tsk oregano
½ tsk basil
½ tsk hvítlauksduft
½ tsk laukduft
Salt og pipar eftir smekk
Saxið sólþurrkuðu tómatana og súpujurtirnar mjög smátt, t.d. í matvinnsluvél, svo allt mýkist hraðar þegar vatni er hellt yfir. Blandið öllu saman og pakkið í léttar og þéttar umbúðir.
🥜 Satay-kúskús
80 g heilkorna kúskús
20–25 g þurrkað soyakurl
2 msk hnetusmjörsduft, t.d. PB2
10 g þurrkaðar súpujurtir
1 msk næringarger
½ poki instant misósúpa, ca. 5 g
½ tsk hvítlauksduft
½ tsk engiferduft
Salt og chili eftir smekk
Saxið súpujurtirnar mjög smátt ef þið viljið að þær mýkist hraðar. Blandið öllu saman og pakkið í léttar og þéttar umbúðir.
➡️ Fyrir báðar uppskriftir: Hellið 200–250 ml af sjóðandi vatni yfir, lokið ílátinu og látið standa í 15–20 mínútur.
100% plöntumiðað, létt í bakpokanum og þarf bara sjóðandi vatn.
