BFI - ITALI Bashkësia Fetare Islame ne Itali

10/08/2026

TAKIM PUNE NË AGJENCINË E MËRGATËS SË REPUBLIKËS SË MAQEDONISË SË VERIUT

Sot, më 10 gusht 2026, Kryetari i Bfi së Italisë Dr. Reshat Ibishi realizoi një takim pune në zyrat e Agjencisë së Mërgatës së Republikës së Maqedonisë së Veriut në Shkup, me zëvendësdrejtorin e Agjencisë, z. Fatlum Jusufi, dhe zyrtarin e Agjencisë, z. Nusret Kovaçi.

Gjatë takimit i informova për aktivitetet dhe veprimtarinë e Bashkësisë Fetare Islame të Italisë – CRII (BFII), për punën e qendrave islame shqiptare, si dhe për angazhimin e imamëve shqiptarë në Itali, jo vetëm në aspektin fetar dhe komunitar, por edhe në atë shoqëror, kulturor dhe integrues.

Theksova se qendrat islame shqiptare dhe imamët që veprojnë në kuadër të BFII-së kanë ndërtuar ndër vite një prani të respektuar në shoqërinë italiane, duke kontribuar në ruajtjen e identitetit fetar dhe kombëtar të mërgatës sonë, në edukimin e brezave të rinj dhe njëkohësisht në integrimin dhe bashkëjetesën e mirë në shoqërinë italiane.

Me këtë rast, shpreha falënderimin tim për bashkëpunimin e deritanishëm dhe konfirmova gatishmërinë e BFII-së për ta vazhduar dhe thelluar bashkëpunimin me Agjencinë e Mërgatës dhe me institucionet përkatëse të Republikës së Maqedonisë së Veriut, në interes të mërgatës sonë.

Nga ana e tij, zëvendësdrejtori z. Fatlum Jusufi na informoi për aktivitetet dhe projektet e Agjencisë së Mërgatës, duke shprehur njëkohësisht gatishmërinë për bashkëpunim të mëtejshëm me BFII-në dhe me organizatat e mërgatës që veprojnë në Itali.

Takimi u zhvillua në një atmosferë të hapur, konstruktive dhe miqësore, me mirëkuptim të përbashkët për rëndësinë e forcimit të lidhjeve ndërmjet institucioneve të vendlindjes dhe mërgatës sonë.

Në përfundim të takimit, pata kënaqësinë t’i dhuroj zëvendësdrejtorit dy nga botimet e mia:

📘 “Sheriati si burim i së drejtës në disa shtete bashkëkohore (Arabia Saudite dhe Republika Islamike e Iranit)”
📘 “Përqasje mbi pakicat në sistemet politike Islame”

Falënderoj z. Fatlum Jusufi dhe z. Nusret Kovaçi për pritjen, respektin dhe bashkëbisedimin e frytshëm.

Dr. Reshat Ibishi
Kryetar i Bashkësisë Fetare Islame të Italisë – CRII (BFII)

04/08/2026

Falënderim dhe mirënjohje

Me ndjenja të veçanta respekti dhe mirënjohjeje, dëshiroj të falënderoj Reisul Ulemanë e Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetain, për mikpritjen vëllazërore dhe pritjen e ngrohtë që na rezervoi gjatë vizitës sonë.

Ishte kënaqësi e veçantë të zhvillonim një takim të frytshëm, në të cilin u trajtuan tema me rëndësi për të tashmen dhe të ardhmen e institucioneve tona fetare, duke theksuar domosdoshmërinë e forcimit të bashkëpunimit ndërinstitucional, ruajtjes së identitetit islam dhe shërbimit të përkushtuar ndaj besimtarëve tanë, kudo që ata jetojnë.

Shpreh falënderimet e mia edhe për vëllezërit e nderuar H. Nehat ef. Ismaili dhe H. Rijad ef. Aliu, për praninë dhe kontributin e tyre në këtë takim vëllazëror, i cili u zhvillua në frymën e respektit, unitetit dhe përgjegjësisë së përbashkët.

Në emër të Bashkësisë Fetare Islame të Italisë, riafirmoj gatishmërinë tonë për të thelluar bashkëpunimin me Bashkësinë Fetare Islame të Republikës së Maqedonisë së Veriut dhe me të gjitha institucionet islame, në projekte që i shërbejnë fesë, edukimit, ruajtjes së identitetit dhe mirëqenies së komuniteteve tona në Evropë.

Lus Allahun e Madhëruar ta ruajë dhe ta forcojë unitetin e umetit tonë, ta begatojë Reisul Ulemanë H. Hfz. Shaqir ef. Fetain në misionin e tij fisnik dhe t’i japë mbarësi çdo përpjekjeje që bëhet në shërbim të Islamit, besimtarëve dhe vlerave tona të përbashkëta.

Me respekt,

Dr. Reshat Ibishi
Kryetar
Bashkësia Fetare Islame e Italisë

01/08/2026

01/08/2026

01.08.2026
E shtunë ora 12:00

Sot Kryetari j Bfi së Italisë Dr. Reshat Ibishi mori pjesë në Inaugurimin e Insitutit të shkollës së Hifzit të Kuranit “ Hafiz Refik Ajeti “ në fshatin e likovës, në komunën e likovës.
Nën prezencën e operativës së lartë të Bashkësisë Fetare Islame të Republikës së Maqedonisë së Veriut në krye me Kryetarin Reis ul Ulema Hfz Shaqir ef Fetai, si dhe Muftiun e e Muftinisë së Komjnës së Kumanovës Abedin Imeri, perfaqëesuesin e bashkësisë Islame të Sanxhakut si dhe përfaqësuesin e Komunës së Likovës, imamë të komunës e më gjërë, profesorë dhe mësimdhënës si dhe shumë banorë të komunës së Likovës e më gjërë.

Sot është një ditë gëzimi, krenarie dhe shprese. Jemi mbledhur për të inauguruar një institucion që nuk ndërton vetëm mure, por ndërton zemra, mendje dhe karaktere.
Një shkollë ku do të mësohet Fjala e Allahut, libri që ka ndriçuar njerëzimin për më shumë se katërmbëdhjetë shekuj.
Allahu i Madhëruar thotë:
﴿إِنَّ هَذَا الْقُرْآنَ يَهْدِي لِلَّتِي هِيَ أَقْوَمُ﴾
“Vërtet, ky Kuran udhëzon në rrugën më të drejtë.”
(El-Isra, 9)
Prandaj, investimi në mësimin e Kuranit është investim në të ardhmen e një populli. Nuk ka pasuri më të madhe se një brez që e njeh Zotin e tij, e respekton familjen, e do atdheun dhe jeton sipas moralit të Kuranit.
Sot kujtojmë me respekt emrin që mban kjo shkollë, “Hafiz Refik Ajeti”. Mbajtja e emrit të një personaliteti është një amanet. Është një kujtesë që puna, sakrifica dhe shërbimi ndaj fesë e kombit nuk harrohen.
Lusim Allahun që çdo e mirë që do të lindë në këtë shkollë të jetë sadaka rrjedhëse edhe për të gjithë ata që kanë kontribuar në ndërtimin dhe themelimin e saj.

Të dashur prindër,
Fëmijët janë amaneti më i çmuar që Allahu ua ka besuar. Ata kanë nevojë për shkollë, për dituri, por mbi të gjitha kanë nevojë për edukim shpirtëror. Kurani është ai që ndërton personalitetin dhe i mbron ata nga devijimet e kohës sonë.

Të dashur nxënës,
Ju jeni shpresa e këtij vendi. Hapeni zemrën për Kuranin. Bëjeni atë shokun tuaj në rini, në pjekuri dhe në pleqëri. Ai do të jetë dritë në këtë botë dhe ndërmjetësues për ju në Ditën e Gjykimit.
Pejgamberi ﷺ ka thënë:
«اقرؤوا القرآن فإنه يأتي يوم القيامة شفيعًا لأصحابه»
“Lexojeni Kuranin, sepse ai do të vijë në Ditën e Kiametit si ndërmjetësues për ata që e kanë shoqëruar.” (Muslim)

Në një kohë kur të rinjtë përballen me sfida të shumta morale, kulturore dhe shpirtërore, shkolla të tilla janë ndër mbrojtjet më të forta të identitetit tonë fetar, kombëtar dhe njerëzor.

Le të jetë kjo shkollë një vatër e dijes, urtësisë dhe moralit. Le të dalin prej saj hafizë, imamë, mësues, profesionistë dhe qytetarë të ndershëm që do t’i shërbejnë Allahut, familjes, kombit dhe shoqërisë.

Në fund,
falënderoj të gjithë ata që kanë kontribuar në realizimin e këtij projekti: donatorët, imamët, mësuesit, prindërit dhe çdo dorë që ka ndihmuar në ngritjen e kësaj vatre të Kuranit.
Lusim Allahun e Madhëruar:
• Ta bëjë këtë shkollë burim drite dhe bereqeti.
• T’i bekojë mësuesit me sinqeritet dhe urtësi.
• T’i bëjë nxënësit prej bartësve të Kuranit dhe zbatuesve të tij.
• Ta ruajë Likovën, vendin tonë dhe mbarë umetin në paqe, unitet dhe mirësi.
رَبَّنَا تَقَبَّلْ مِنَّا إِنَّكَ أَنتَ السَّمِيعُ الْعَلِيمُ، وَتُبْ عَلَيْنَا إِنَّكَ أَنتَ التَّوَّابُ الرَّحِيمُ
“Zoti ynë, pranoje prej nesh, sepse Ti je Dëgjuesi dhe i Gjithëdijshmi. Pranoje pendimin tonë, sepse Ti je Pranuesi i pendimit dhe Mëshirëploti.”
Ve’s-selamu alejkum ve rahmetullahi ve berekatuhu.

31/07/2026

Ne garat ndërkombëtare të Kuranit që u mbajtën në Shkup morën pjesë edhe lexues të Kuranit nga Italia, në mesin e garuesve ishte edhe hfz Hashim Selmani djali i haxhi Gajur Selamanit dhe nipi i haxhi Selimit nga fshati Çajle, anëtarë dhe kontribues në qendrën islame shqiptare të Italisë, respektivisht selia zyrtare e bfi së Italisë

Nderim dhe respekt pafund për hafizin e ardhshëm Hashim Selamani

30/07/2026

Mirënjohje për mikpritjen vëllazërore në Bashkësinë Islame të Kosovës

Kryetari i BFI së Italisë Dr. Reshat Ibishi mori pjesë në takimin e organizuar nga Drejtoria për Diasporë e Bashkësisë Islame të Kosovës, ku u mblodhën imamë, kryetarë të qendrave islame, drejtues të unioneve dhe përfaqësues të komuniteteve islame shqiptare nga diaspora.

Me këtë rast, dëshiroj të shpreh falënderimin dhe mirënjohjen time të sinqertë ndaj Myftiut të Bashkësisë Islame të Kosovës, Naim ef. Tërnava, për mikpritjen e ngrohtë, respektin e treguar dhe përkushtimin e vazhdueshëm në forcimin e lidhjeve me diasporën shqiptare.

Një falënderim të veçantë shpreh edhe për Ministrin në detyrë të Punëve të Jashtme dhe Diasporës të Republikës së Kosovës, Glauk Konjufca, për pjesëmarrjen dhe mesazhet e tij mbështetëse për diasporën shqiptare, si dhe për Drejtorin e Medresesë “Alauddin”, për mikpritjen dhe organizimin e këtij takimi.

Ishte kënaqësi të takohesha dhe të shkëmbeja mendime me Hoxhë Tahir Kukaj, imam në Xhaminë Shqiptare në New York, si dhe me drejtuesit e Drejtorisë për Diasporë, kryetarët dhe përfaqësuesit e unioneve islame, ish-kryetarët e unioneve, imamët dhe përfaqësuesit e komuniteteve tona nga vende të ndryshme të botës.

Takime të tilla forcojnë unitetin tonë institucional, rrisin bashkëpunimin ndërmjet bashkësive islame dhe na motivojnë të punojmë edhe më shumë për ruajtjen e identitetit fetar, kombëtar dhe kulturor të shqiptarëve në diasporë.

Lus Allahun e Madhëruar t’i shpërblejë të gjithë organizatorët, ta bekojë Bashkësinë Islame të Kosovës, ta forcojë bashkëpunimin ndërinstitucional dhe të na udhëzojë në shërbim të fesë, kombit dhe besimtarëve.

Me respekt,

Dr. Reshat Ibishi
Kryetar i Bashkësisë Fetare Islame të Italisë

29/07/2026

Shkup, 29.07.2026

Ceremonia solemne e programit përmbyllës të Garave Kur’anore Ndërkombëtare të Ballkanit

Kryetari i Bashkësisë Fetare Islame të Italisë Dr. Reshat Ibishi ishte i pranishëm në finalen e Garës së Katërt Kur’anore Ndërkombëtare të Ballkanit, kushtuar memorizimit, recitimit dhe intonimit të Kur’anit Fisnik, e organizuar nga Bashkësia Fetare Islame e Republikës së Maqedonisë së Veriut.

Me këtë rast, shpreh mirënjohjen time të sinqertë ndaj Reisul Ulemasë H. Hfz. Shaqir ef. Fetai, Komisionit Organizativ dhe gjithë stafit të Bashkësisë Fetare Islame për mikpritjen e ngrohtë, respektin e treguar dhe organizimin shembullor të këtij manifestimi të rëndësishëm.

Përkushtimi, serioziteti dhe niveli i lartë organizativ i dhanë këtij eventi një dinjitet të veçantë, duke e shndërruar atë në një festë të vërtetë të Kur’anit dhe të vlerave islame.

Ishte kënaqësi të takohesha me krerë të bashkësive islame nga vendet e Ballkanit, myftinj, imamë, akademikë, personalitete të jetës shoqërore dhe përfaqësues të diasporës shqiptare, me të cilët ndamë mendime, përvoja dhe vizione për forcimin e bashkëpunimit dhe shërbimin ndaj besimtarëve.

Lus Allahun e Madhëruar ta shpërblejë çdo kontribuues të këtij projekti fisnik, t’i begatojë organizatorët, t’i nderojë fituesit dhe t’i shpërblejë të gjithë pjesëmarrësit që e madhëruan Fjalën e Allahut përmes mësimit dhe recitimit të Kur’anit Fisnik.

Dr. Reshat Ibishi

29/07/2026

28/07/2026

Bashkëpunimi i Bashkësive Islame në Diasporë me Bashkësinë Fetare Islame të Republikës së Maqedonisë së Veriut
I nderuari Reisul Ulema, H. Hfz. Shaqir ef. Fetai,
Të nderuar myfti, drejtorë, kryetarë të unioneve islame, imamë dhe të gjithë të pranishëm.
Esselamu alejkum ue rahmetullahi ue berekatuhu.
Në emrin tim personal dhe në emër të Bashkësisë Fetare Islame të Italisë, shpreh falënderimet më të sinqerta për këtë ftesë dhe për organizimin e këtij takimi vëllazëror, i cili dëshmon kujdesin e vazhdueshëm që Bashkësia Fetare Islame e Republikës së Maqedonisë së Veriut tregon ndaj diasporës sonë.
Ky është një moment i rëndësishëm për të reflektuar jo vetëm mbi atë që kemi bërë deri më sot, por edhe mbi atë që duhet të ndërtojmë së bashku për të ardhmen.
Diaspora shqiptare dhe ajo myslimane në Evropë nuk është më një komunitet i përkohshëm. Ajo është bërë pjesë përbërëse e jetës fetare, kulturore dhe shoqërore të vendeve ku jetojmë.
Prandaj përgjegjësia jonë është më e madhe se kurrë.
Sot nuk mjafton vetëm ndërtimi i xhamive. Duhet të ndërtojmë institucione të forta, imamë të përgatitur, të rinj me identitet të qartë islam dhe kombëtar, si dhe familje që ruajnë fenë, gjuhën dhe traditën.
Në Itali kemi parë se suksesi arrihet kur ekziston bashkëpunim, koordinim dhe respekt institucional.
Për këtë arsye besoj se bashkëpunimi ndërmjet Bashkësisë Fetare Islame të Maqedonisë së Veriut dhe institucioneve tona në diasporë duhet të hyjë në një fazë të re.
Një fazë ku të kemi:
• koordinim të rregullt ndërmjet institucioneve;
• shkëmbim përvojash dhe projektesh;
• trajnime të përbashkëta për imamët;
• programe për edukimin e rinisë;
• mbështetje në botime, literatura dhe projekte shkencore;
• organizime të përbashkëta fetare dhe kulturore.
Ne në Itali jemi të gatshëm të japim kontributin tonë në çdo projekt që i shërben Islamit, shqiptarëve dhe forcimit të institucioneve tona.
Jam i bindur se vetëm të bashkuar mund t’u përgjigjemi sfidave të kohës: sekularizmit, humbjes së identitetit, asimilimit dhe sfidave që përjetojnë të rinjtë tanë

Dr. Reshat Ibishi
Bfi e Italise

25/07/2026