29/09/2025
2 ឆ្នាំមុន កើតកូនបាន ១ ខែ ត្រូវមកសាលាការពារសារណាលើកទី ២។ ពេលនេះ កើតកូនបាន ១ ខែ ឆ្លៀតមកដកយកសញ្ញាប័ត្រនិងអាវទុកពាក់ថតជុំគ្រួសារ ព្រោះមិនបានចូលរួមការទទួលសញ្ញាប័ត្រជាផ្លូវការដែលសាលារៀបចំដោយជាប់ពពោះ គេងគ្រែទប់កុំឱ្យកូនកើតមុនខែ។ គិតទៅជិត ១០ ឆ្នាំ (2016) តាំងពីដាក់ពាក្យយកអាហារូបករណ៍ដើម្បីរៀនថ្នាក់បណ្ឌិតនេះ ខណៈពេលដែលចាប់ផ្តើមយកកូន។ តាំងពីពពោះដំបូងរហូតដល់លើកចុងក្រោយ (5 លើក) ខ្ញុំជួបរឿងជាច្រើនពេលកំឡុងពពោះ ការរៀនពិបាកតែមិនពិបាកដូចការពពោះដែលប្រឈមនឹងហានិភ័យជាច្រើន ថែមទាំងការមើលកូនដោយផ្ទាល់ដៃ វាមិនងាយស្រួលដូចរៀនក្នុងទ្រឹស្តី ភាពខ្សោះអស់កម្លាំងពីការមើលថែកូន ការបារម្ភពីកូនពេលកូនឈឺ ឬមានបញ្ហាណាមួយ...។ល។
ដំណើរជីវិតខ្ញុំក្នុងការចាប់ផ្តើមធ្វើជាម្តាយគេ មិនងាយស្រួល ខណៈដែលខ្ញុំត្រូវផ្អាកការងារដែលខ្លួនចូលចិត្តនិងការសិក្សាមួយរយៈធំដើម្បីពពោះនិងមើលថែកូន តែខ្ញុំនៅតែបន្តអាជីពជាអ្នកចិត្តសាស្ត្រ។ ទោះជាខ្ញុំដើរយឺតជាងគេខ្លាំងក្នុងការបញ្ចប់ការសិក្សាដើម្បីពង្រឹងអាជីពខ្លួន តែខ្ញុំមិនបោះបង់ផ្លូវដើររបស់ខ្លួន មិនបោះបង់ក្តីសុបិន្តរបស់ខ្លួន មិនបង់បោះគោលដៅជីវិតរបស់ខ្លួន។ ឥឡូវគិតត្រឡប់ទៅវិញ ពិតជាមោទនភាពចំពោះខ្លួនឯងជាខ្លាំង ហើយក៏ដឹងគុណដល់ក្រុមគ្រួសារ ម្ចាស់ជំនួយ គ្រូ មេ មិត្តភក្តិ និងអ្នកដែលពាក់ព័ន្ធផ្សេងៗទៀតដែលជួយខ្ញុំឱ្យឆ្លងផុតការលំបាកគ្រប់បែបយ៉ាងក្នុងការរៀននិងការធ្វើជាម្តាយគេ 🙏
#ភាពជាស្ត្រី #ភាពជាម្តាយ #អភិវឌ្ឍខ្លួនឯង #បណ្ឌិតចិត្តសាស្ត្រ #លឹមប៊ួយហៀក
